ગુજરાતમાં રવિ સીઝન માટે ખાતરની અછત નહીં. રાજ્ય સરકાર દ્વારા ખાતરનું સુદ્રઢ આયોજન. હાલમાં 2.08 લાખ મેટ્રિક ટન યુરિયા અને 49 હજાર મેટ્રિક ટન DAP નો જથ્થો ઉપલબ્ધ. ખેડૂતોને જરૂરિયાત મુજબ જ ખરીદી કરવા અપીલ.
ગાંધીનગર, સોમવાર
ગુજરાતના ખેડૂતો માટે એક સારા સમાચાર છે. રાજ્ય સરકારની સઘન વ્યવસ્થાના કારણે, રવિ સીઝનમાં ખેડૂતોને સમયસર અને પૂરતા પ્રમાણમાં ખાતર મળી રહે તે માટે સંપૂર્ણ આયોજન કરવામાં આવ્યું છે. ખેતી નિયામકની કચેરી દ્વારા સ્પષ્ટતા કરવામાં આવી છે કે હાલમાં રાજ્યમાં ખાતરનો જથ્થો પૂરતા પ્રમાણમાં ઉપલબ્ધ છે, તેથી ખેડૂતોએ સહેજ પણ ચિંતા કરવાની જરૂર નથી.
ભારત સરકારે ગુજરાત માટે રવિ ઋતુના (ઓક્ટોબર 2025 થી માર્ચ 2026) સમયગાળા માટે યુરિયા ખાતરના કુલ 13.90 લાખ મેટ્રિક ટન અને ડી.એ.પી. (DAP) ખાતરના 2.90 લાખ મેટ્રિક ટન જથ્થાની ફાળવણી મંજૂર કરી દીધી છે.
યુરિયા અને DAP ની વર્તમાન સ્થિતિ:કુલ ઉપલબ્ધ જથ્થો (અત્યાર સુધી): 5.48 લાખ મેટ્રિક ટનથી વધુ યુરિયા અને 2.18 લાખ મેટ્રિક ટનથી વધુ ડી.એ.પી. ખાતર રાજ્યમાં પહોંચી ગયું છે.વપરાશ: ચાલુ રવિ સીઝનમાં અત્યાર સુધી ખેડૂતો દ્વારા કુલ 3.44 લાખ મેટ્રિક ટનથી વધુ યુરિયા અને 1.68 લાખ મેટ્રિક ટનથી વધુ ડી.એ.પી. ખાતરનો ઉપયોગ કરવામાં આવ્યો છે.હાલમાં ઉપલબ્ધ જથ્થો: રાજ્યના વિવિધ જિલ્લાઓમાં મળીને કુલ 2.08 લાખ મેટ્રિક ટનથી વધુ યુરિયા અને 49 હજાર મેટ્રિક ટનથી વધુ ડી.એ.પી. ખાતર ખેડૂતો માટે તૈયાર છે.
સપ્લાય વ્યવસ્થા અને આગામી આયોજન
રાજ્ય સરકારે દરેક જિલ્લાની જરૂરિયાતને ધ્યાનમાં રાખીને એક મજબૂત સપ્લાય પ્લાન તૈયાર કર્યો છે. છેલ્લા ત્રણ દિવસમાં જ આશરે 12,500 મેટ્રિક ટન યુરિયા ખાતર રેલવે રેકના માધ્યમથી જુદા-જુદા જિલ્લાઓમાં મોકલવામાં આવ્યું છે, અને હાલમાં 7 રેક પોઈન્ટ પરથી ખાતરનો સપ્લાય ચાલુ છે.
આગામી એક અઠવાડિયામાં પણ અંદાજે 22,000 મેટ્રિક ટન યુરિયા ખાતરનો સપ્લાય કરવા માટે સૂચનાઓ આપી દેવામાં આવી છે, જેથી રાજ્યના કોઈ પણ ખેડૂતને ખાતરની તકલીફ ન પડે.
ખેડૂતોને અપીલ
ખાતરનો જથ્થો પૂરતા પ્રમાણમાં હોવા છતાં, ખેતી નિયામકની કચેરીએ ખેડૂતોને એક ખાસ વિનંતી કરી છે: ખેડૂતોએ માત્ર જરૂરિયાત મુજબ જ ખાતરની ખરીદી કરવી, વણજોઈતી કે બિનજરૂરી ખરીદી કરવી નહીં. સાથે જ, ખાતરની અછત અંગે ફેલાતી કોઈપણ અફવાઓથી દૂર રહેવા પણ અનુરોધ કરવામાં આવ્યો છે.
