BMC ચૂંટણીમાં ભાજપ ગઠબંધનને બહુમતી મળતા સાંસદ નિશિકાંત દુબેએ ઉદ્ધવ અને રાજ ઠાકરેને ખુલ્લો પડકાર ફેંક્યો છે. જાણો ‘પટકી-પટકીને મારવાની’ જૂની ટિપ્પણી અને મુંબઈ આવવાના એલાન પાછળ શું છે રાજકીય ઈશારો.
મહારાષ્ટ્ર, શુક્રવાર
મહારાષ્ટ્રના રાજકારણમાં અત્યારે ભારે ગરમાવો જોવા મળી રહ્યો છે. ખાસ કરીને મુંબઈ મહાનગર પાલિકા (BMC) ચૂંટણીના પરિણામો અને રુઝાન ભાજપ ગઠબંધન (મહાયુતિ) માટે સારા સમાચાર લઈને આવ્યા છે. મુંબઈમાં ભાજપને સ્પષ્ટ બહુમતી મળતી જોઈને બીજેપી સાંસદ નિશિકાંત દુબેએ સોશિયલ મીડિયા પર મોરચો માંડ્યો છે અને ઠાકરે પરિવારને સીધો પડકાર ફેંક્યો છે.
‘હવે મુંબઈ આવીને મળીશ…’
સાંસદ નિશિકાંત દુબેએ સોશિયલ મીડિયા પ્લેટફોર્મ ‘X’ પર પોતાની ખુશી વ્યક્ત કરતા ઉદ્ધવ ઠાકરે અને રાજ ઠાકરે માટે એક પોસ્ટ કરી છે. તેમણે લખ્યું છે કે તેઓ ટૂંક સમયમાં મુંબઈ પહોંચશે અને બંને નેતાઓને રૂબરૂ મળશે. રાજકીય પંડિતો આ પોસ્ટને સામાન્ય મુલાકાત તરીકે નહીં, પણ એક કટાક્ષ અને ચેતવણી તરીકે જોઈ રહ્યા છે. આ પોસ્ટ દ્વારા દુબેએ સંકેત આપ્યો છે કે મુંબઈ પર હવે વર્ષોથી ચાલતું ‘ઠાકરે રાજ’ ખતમ થવા જઈ રહ્યું છે અને હવે ત્યાં ‘સબકા સાથ, સબકા વિકાસ’ની નીતિ કામ કરી રહી છે.
ચૂંટણીના આંકડા શું કહે છે?
BMC ચૂંટણીના તાજા રુઝાન પ્રમાણે ભાજપ ગઠબંધન (BJP+) 115 બેઠકો પર આગળ ચાલી રહ્યું છે, જે બહુમતી માટે જરૂરી 114ના આંકડા કરતા વધારે છે. બીજી તરફ, ઉદ્ધવ ઠાકરેની સેના અને રાજ ઠાકરેની MNSનું ગઠબંધન માત્ર 68 બેઠકો આસપાસ સમેટાઈ રહ્યું હોય તેવું લાગે છે.
કોંગ્રેસને માત્ર 10 બેઠકો મળતી દેખાઈ રહી છે.
માત્ર મુંબઈ જ નહીં, પરંતુ નાગપુર, થાણે અને પુણેમાં પણ ભાજપ ગઠબંધન જીત તરફ આગળ વધી રહ્યું છે. આ આંકડાઓએ જ નિશિકાંત દુબેનો આત્મવિશ્વાસ વધાર્યો છે.
‘ભાષાવાદ’ અને મરાઠી કાર્ડ ફેલ
આ પરિણામો સ્પષ્ટ કરે છે કે રાજ ઠાકરે અને ઉદ્ધવ ઠાકરેનું એક થવું અને ‘મરાઠી કાર્ડ’ રમવું મતદારો પર ખાસ અસર કરી શક્યું નથી. નિશિકાંત દુબેનો આ મેસેજ એ પણ સાબિત કરવા માંગે છે કે મુંબઈ હવે કોઈ એક પરિવાર કે ભાષાવાદની જાગીર નથી રહી.
શું હતો જૂનો વિવાદ?
નિશિકાંત દુબેની આ ચેતવણી પાછળ એક જૂનો વિવાદ રહેલો છે. ગયા વર્ષે જુલાઈમાં જ્યારે મહારાષ્ટ્રમાં ગેર-મરાઠી દુકાનદારો સાથે મારપીટની ઘટના બની હતી, ત્યારે નિશિકાંત દુબેએ રાજ ઠાકરેની પાર્ટી MNS સામે વાંધો ઉઠાવ્યો હતો. તેમણે ત્યારે કહ્યું હતું કે, “હિંમત હોય તો ઉર્દૂ કે દક્ષિણ ભારતીય ભાષા બોલવાવાળાને અડી બતાવો. યુપી-બિહાર આવશો તો પટકી-પટકીને મારીશું.” હવે જ્યારે BMCમાં ભાજપનો વિજય નિશ્ચિત દેખાઈ રહ્યો છે, ત્યારે દુબેએ પોતાની જૂની સ્ટાઈલમાં જ ફરી મુંબઈ આવવાની વાત કરીને ઠાકરે જૂથની મુશ્કેલી વધારી દીધી છે.
