‘પાકિસ્તાન ગમે તેટલા ફાંફા મારે, ભારતનું કદ નાનું નહીં થાય’, શશિ થરૂરે પાક.ની વિશ્વસનીયતા અને વિદેશ નીતિ પર આપ્યું મોટું નિવેદન

કોંગ્રેસના વરિષ્ઠ નેતા શશિ થરૂરે ભારતની વિદેશ નીતિ અને પાકિસ્તાન-અમેરિકાના સંબંધો પર ખુલીને વાત કરી છે. જાણો કેમ તેમણે પાકિસ્તાનની મધ્યસ્થતા છતાં ભારતને મજબૂત ગણાવ્યું.

નવી દિલ્હી, બુધવાર
પાકિસ્તાનના ઈસ્લામાબાદમાં હાલમાં જ અમેરિકા અને ઈરાન વચ્ચે શાંતિ મંત્રણા યોજાઈ હતી. આ ઘટના બાદ ભારતીય રાજકારણમાં વિદેશ નીતિને લઈને ચર્ચાઓ તેજ થઈ છે. આ દરમિયાન કોંગ્રેસના દિગ્ગજ નેતા અને વિદેશ નીતિના જાણકાર શશિ થરૂરે એક ખાનગી ઈન્ટરવ્યૂમાં ભારત અને પાકિસ્તાનની સ્થિતિ પર પોતાનો સ્પષ્ટ અભિપ્રાય રજૂ કર્યો છે.

પાકિસ્તાનની મધ્યસ્થતાથી ભારતને કોઈ જોખમ નથી
શશિ થરૂરે જણાવ્યું હતું કે, જો પાકિસ્તાન અમેરિકા અને ઈરાન જેવા દેશો વચ્ચે મધ્યસ્થતા કરાવવામાં સફળ રહે, તો પણ તેનાથી વિશ્વસ્તરે ભારતનું કદ જરાય નાનું નહીં થાય. સામાન્ય રીતે કોંગ્રેસ પક્ષ વિદેશ નીતિ મુદ્દે મોદી સરકારને ઘેરતો હોય છે, પરંતુ થરૂરે આ બાબતે ભારતની મજબૂત સ્થિતિનો સ્વીકાર કર્યો છે. તેમણે કહ્યું કે ભારતની ગણના વિશ્વના પ્રભાવશાળી દેશોમાં થાય છે.

પાકિસ્તાનની વિશ્વસનીયતા પર આકરા પ્રહાર
થરૂરે પાકિસ્તાન પર નિશાન સાધતા કહ્યું કે, જે દેશની નાક નીચે વર્ષો સુધી આતંકવાદી ઓસામા બિન લાદેન છુપાયેલો રહ્યો હોય, તેની વિશ્વસનીયતા કેટલી હોય તે સમજી શકાય છે. જોકે, તેમણે એમ પણ ઉમેર્યું કે પશ્ચિમી દેશોએ અત્યારે લાદેન વાળી વાત ભૂલીને પાકિસ્તાનને માફ કરી દીધું હોય તેવું લાગે છે.

ભારતની વિદેશ નીતિ અંગે વાત કરતા તેમણે સ્પષ્ટ શબ્દોમાં કહ્યું કે જ્યાં સુધી પાકિસ્તાન પોતાની ધરતી પરથી ચાલતા આતંકવાદી જૂથોનો સફાયો નહીં કરે, ત્યાં સુધી ભારતની નીતિમાં કોઈ ફેરફાર નહીં આવે. ભારતે 26/11 મુંબઈ હુમલાના અસંખ્ય પુરાવા આપ્યા હોવા છતાં પાકિસ્તાને હજુ સુધી તેના દોષિતોને સજા આપી નથી. સરહદ પારથી થતો આતંકવાદ બંધ થાય તે જ વાતચીત શરૂ કરવા માટેની પ્રથમ શરત હોવી જોઈએ.

ભારતના સંબંધો પાકિસ્તાન કરતા વધુ મજબૂત
જ્યારે થરૂરને પૂછવામાં આવ્યું કે ભારતે અમેરિકા-ઈરાન વચ્ચે મધ્યસ્થતા કેમ ન કરી? તેના જવાબમાં તેમણે કહ્યું કે, ભારત આજે દુનિયાના તમામ શક્તિશાળી દેશો સાથે ખૂબ જ સારા અને સંતુલિત સંબંધો ધરાવે છે. પાકિસ્તાન માટે આવી સ્થિતિ નથી. પાકિસ્તાનના મધ્યસ્થતાના પ્રયાસો માત્ર એક પ્રક્રિયા છે, તેનાથી ભારતની વૈશ્વિક પ્રતિષ્ઠાને કોઈ આંચ નહીં આવે.

ડોનાલ્ડ ટ્રમ્પની ટિપ્પણી અને ભારતનો સંયમ
થોડા સમય પહેલા અમેરિકાના પૂર્વ રાષ્ટ્રપ્રમુખ ડોનાલ્ડ ટ્રમ્પે ભારત વિશે ‘નરક’ (Hellhole) જેવી વિવાદાસ્પદ ટિપ્પણી કરી હતી. આ મુદ્દે શશિ થરૂરે ભારત સરકારને સલાહ આપી છે કે આવા નિવેદનો પર આક્રમક થવાને બદલે સંયમ રાખવો જોઈએ. તેમણે કહ્યું કે, સોશિયલ મીડિયાની પોસ્ટ કે કોઈના વ્યક્તિગત મંતવ્યોને રાજદ્વારી સ્તરે મહત્વ આપવાની જરૂર નથી. જો હું સરકારમાં હોત, તો આવી નાની વાતોને સંપૂર્ણપણે નજરઅંદાજ કરી દેત.

શશિ થરૂરના આ નિવેદનથી સ્પષ્ટ થાય છે કે ભલે ઘરેલું રાજકારણમાં પક્ષો વચ્ચે મતભેદ હોય, પરંતુ જ્યારે વાત પાકિસ્તાન અને ભારતની વિદેશ નીતિની આવે છે, ત્યારે ભારતની મજબૂતી પર કોઈ બાંધછોડ થઈ શકે તેમ નથી. પાકિસ્તાને જો ખરેખર વિશ્વમાં પોતાની છબી સુધારવી હોય, તો આતંકવાદ સામે કડક પગલાં લેવા જ પડશે.

Author: VANDNA