પશ્ચિમ બંગાળમાં અભિષેક બેનરજી પર હુમલા બાદ મમતા બેનરજીનો કોલકાતાની હોસ્પિટલના CEOને ધમકાવતો ઓડિયો વાયરલ. ભાજપના દબાણમાં અધૂરી સારવારે ડિસ્ચાર્જ કરવાનો આરોપ.
પશ્ચિમ બંગાળ, રવિવાર
પશ્ચિમ બંગાળના રાજકારણમાં હિંસા અને નિવેદનબાજી અટકવાનું નામ નથી લઈ રહી. હાલમાં જ ટીએમસી (TMC) નેતા અભિષેક બેનરજી પર સોનારપુર વિસ્તારમાં એક ઉગ્ર ભીડ દ્વારા જીવલેણ હુમલો કરવામાં આવ્યો હતો. ભીડ દ્વારા તેમના પર પથ્થરમારો કરાયો અને ઈંડા ફેંકવામાં આવ્યા હતા. આ ઘટનામાં અભિષેક બેનરજી ગંભીર રીતે ઘાયલ થયા હતા. સુરક્ષાકર્મીઓએ ભારે જહેમત બાદ તેમને હેલ્મેટ પહેરાવીને સુરક્ષિત રીતે ભીડમાંથી બહાર કાઢ્યા હતા. ઘટના બાદ તાત્કાલિક ધોરણે તેમને કોલકાતાની જાણીતી બેલ વ્યુ હોસ્પિટલમાં દાખલ કરવામાં આવ્યા હતા. પરંતુ, હવે આ મામલાએ એક નવો જ વળાંક લીધો છે. પૂર્વ મુખ્યમંત્રી મમતા બેનરજી અને હોસ્પિટલના વહીવટી સ્ટાફ વચ્ચેની વાતચીતનો એક કથિત ઓડિયો સોશિયલ મીડિયા પર ભારે વાયરલ થઈ રહ્યો છે, જેના કારણે રાજકીય માહોલ વધુ ગરમાયો છે.
ભગવાન તમને માફ નહીં કરે…: વાયરલ ઓડિયોમાં શું છે?
સોશિયલ મીડિયા પર જે ઓડિયો વાયરલ થઈ રહ્યો છે, તેમાં મમતા બેનરજી હોસ્પિટલના સીઈઓ (CEO) મિસ્ટર ટંડન પર ભારે ગુસ્સે થતા અને તેમને ધમકાવતા સાંભળી શકાય છે. આ વાતચીત બાંગ્લા અને અંગ્રેજી ભાષામાં થઈ રહી છે. ઓડિયોમાં મમતા બેનરજી કહે છે કે, “મિસ્ટર ટંડન, આઈ એમ સોરી, પરંતુ તમે ઘણું ખોટું કામ કર્યું છે. યાદ રાખજો કે ભૂતકાળમાં અમે તમારી કેટલી મદદ કરી છે. ભગવાન તમને આ માટે ક્યારેય માફ નહીં કરે. તમે લોકોને ગેરમાર્ગે દોરવાનું કામ કરી રહ્યા છો, તમને શરમ આવવી જોઈએ. તમારો આ અહંકાર દરેક વ્યક્તિ યાદ રાખશે.”
વાત અહીં જ નથી અટકતી, તેઓ આગળ ચીમકી આપતા કહે છે કે, “તમે હોસ્પિટલ ચલાવો છો અને અત્યારે કેન્દ્રમાં ભાજપ (BJP) ની સરકાર છે. પરંતુ યાદ રાખજો, કાલે જો કેન્દ્રમાં ભાજપની સરકાર નહીં હોય, તો અમે આ બાબતનું પૂરું ધ્યાન રાખી લઈશું.
ભાજપના દબાણમાં અધૂરી સારવારે ડિસ્ચાર્જ કર્યાનો આરોપ
આ ઓડિયો ક્લિપ સામે આવે તે પહેલાં જ મમતા બેનરજીએ મીડિયા સામે આવીને હોસ્પિટલના પ્રશાસન અને રાજ્યની કાયદો-વ્યવસ્થા પર આકરા સવાલો ઉઠાવ્યા હતા. તેમણે સીધો આક્ષેપ કર્યો છે કે હોસ્પિટલે ભાજપના નેતાઓના દબાણમાં આવીને અભિષેક બેનરજીને અધૂરી સારવાર સાથે જ રજા આપી દીધી છે.
તેમણે વેધક સવાલ કરતા પૂછ્યું કે, “જો અભિષેકની તબિયત ખરેખર ગંભીર નહોતી, તો પછી તેમને હોસ્પિટલના આઈટીયુ (ITU) વોર્ડમાં કેમ દાખલ કરવામાં આવ્યા હતા? અને જો તેમની હાલત ખરેખર નાજુક હતી, તો પછી આટલી ઉતાવળમાં તેમને ડિસ્ચાર્જ કેમ કરી દેવામાં આવ્યા?”
ઘટનાને લોકશાહીની હત્યા ગણાવી
મમતા બેનરજીએ આ પૂરા ઘટનાક્રમને લોકશાહીની હત્યા સમાન ગણાવ્યો છે. અભિષેક બેનરજીની હેલ્થ અપડેટ આપતા તેમણે જણાવ્યું કે હુમલાના કારણે તેમના શરીરમાં લોહીના ગંઠાવા (Blood Clots) જામી ગયા છે. જો હુમલા વખતે સમયસર તેમને હેલ્મેટ ન પહેરાવવામાં આવ્યું હોત, તો તેમનો જીવ પણ જઈ શકતો હતો.
આગળની સારવાર ઘરે જ થશે
હાલમાં અભિષેક બેનરજીની સારવાર તેમના ઘરે જ શરૂ કરવામાં આવી છે. ઘરે જ એક મિની હોસ્પિટલ જેવો સેટઅપ તૈયાર કરાયો છે, જેમાં ઓક્સિજન સિલિન્ડર અને અન્ય જરૂરી મેડિકલ સાધનો લગાવવામાં આવ્યા છે. મમતા બેનરજીએ સ્પષ્ટ ચેતવણી આપી છે કે જો અભિષેકને કંઈ પણ થશે, તો તેની 100% જવાબદારી હોસ્પિટલ પ્રશાસનની જ રહેશે.
ભાજપ અને સીઆઈડી પર પ્રહાર
પોતાના નિવેદનના અંતમાં મમતા બેનરજીએ બંગાળના સ્થાનિક ભાજપ નેતાઓ પર પણ આકરા પ્રહાર કર્યા હતા. તેમણે કહ્યું કે દિલ્હીમાં બેઠેલા નેતાઓ કરતા બંગાળના ભાજપ નેતાઓ વધુ ખરાબ અને ખતરનાક છે. આ ઉપરાંત, તેમણે રાજ્યની તપાસ એજન્સી સીઆઈડીની કામગીરી પર પણ સવાલો ઉઠાવતા તેમને ડરપોક ગણાવી છે. હાલ આખો મામલો ભારે ચર્ચામાં છે અને વાયરલ ઓડિયો બાદ રાજકીય ગરમાવો હજુ વધવાની પૂરેપૂરી શક્યતા છે.
