જૂનાગઢના ગિરનાર પર્વત પર 50 પગથિયા નજીક 12 વર્ષીય બાળકને સિંહ ઉપાડી જતા તેનું કરૂણ મોત નીપજ્યું છે, જેના પગલે વન વિભાગે સિંહને પકડવા સર્ચ ઓપરેશન શરૂ કર્યું છે.
જૂનાગઢના ગિરનાર પર્વત પર શ્રદ્ધાળુઓ અને યાત્રિકો માટે એક અત્યંત આઘાતજનક અને દુઃખદ ઘટના સામે આવી છે. ગિરનારના પગથિયા ચડી રહેલા 12 વર્ષીય બાળકને સિંહે તરાપ મારીને જંગલમાં ઉપાડી જતા વિસ્તારમાં ભારે ચકચાર મચી ગઈ છે. લાંબી શોધખોળ બાદ જંગલમાંથી બાળકના કપડાં, બૂટ અને શરીરના અવશેષો મળી આવ્યા હતા.
શું હતી ઘટના?
મળતી માહિતી મુજબ, પરિવાર ગિરનાર પર્વત પર દર્શનાર્થે આવ્યો હતો અને પગથિયા ચડી રહ્યો હતો. માંડ 50 પગથિયા ચડ્યા હશે ત્યાં જ જંગલમાંથી નીકળેલા એક સિંહે અચાનક બાળકની ઉપર હુમલો કરી દીધો હતો. પરિવારજનો કંઈ સમજે તે પહેલા સિંહ બાળકને જડબામાં પકડીને ગીચ જંગલમાં નાસી ગયો હતો. વ્હાલસોયા પુત્રને નજર સામે સિંહ ઉપાડી જતાં પરિવારજનોએ આક્રંદ સાથે ચીસાચીસ કરી મૂકી હતી.
તંત્રની કામગીરી અને સર્ચ ઓપરેશન
ઘટનાની ગંભીરતાને ધ્યાનમાં રાખીને વન વિભાગ અને પોલીસ તંત્ર એલર્ટ થઈ ગયું છે.
-
વિસ્તાર બંધ: સુરક્ષાના ભાગરૂપે ગિરનારની મુખ્ય સીડીવાળો વિસ્તાર હાલ સંપૂર્ણપણે બંધ કરી દેવામાં આવ્યો છે.
-
વૈકલ્પિક માર્ગ: યાત્રિકોની સુરક્ષા માટે તેમને જટાશંકર નજીકની જૂની સીડીવાળા રસ્તેથી અવરજવર કરવા સૂચના આપવામાં આવી છે.
-
સર્ચ ઓપરેશન: સિંહને પકડવા માટે વન વિભાગની અલગ-અલગ ટીમો બનાવવામાં આવી છે અને ઘટનાસ્થળની આસપાસ પાંજરા પણ ગોઠવી દેવામાં આવ્યા છે.
