ગ્રેટર નોઈડામાં યમુના એક્સપ્રેસ-વે પર ચાલતી ડબલ ડેકર બસમાં આગ લાગવાથી ૯ મુસાફરોના જીવતા ભીષાયાવાથી મોત થયા છે, જ્યારે ૨૦ થી વધુ મુસાફરોએ બારીમાંથી કૂદીને જીવ બચાવ્યો છે.
ગ્રેટર નોઈડાના યમુના એક્સપ્રેસ-વે પર એરપોર્ટ ઈન્ટરચેન્જ નજીક બુધવારે રાત્રે ૧૨ વાગ્યાની આસપાસ એક અત્યંત ગમખ્વાર અને હચમચાવી નાખનાર અકસ્માત સર્જાયો હતો. દિલ્હી અને નોઈડાથી મહોબા તરફ જઈ રહેલી ‘રાજ કલ્પના ટ્રાવેલ્સ’ની ડબલ ડેકર AC સ્લીપર બસમાં અચાનક ભીષણ આગ ફાટી નીકળતાં અફરાતફરી મચી ગઈ હતી. આ ભયાનક દુર્ઘટનામાં બસની અંદર ફસાયેલા ૯ મુસાફરોના આગમાં બળી જવાથી કરૂણ મોત નીપજ્યા છે.
દુર્ઘટનાની મુખ્ય વિગતો અને મોડસ ઓપરેન્ડી
-
એન્જિનમાંથી ફાટી નીકળી આગ: પ્રત્યક્ષદર્શીઓ અને બચેલા મુસાફરોના જણાવ્યા અનુસાર, આગ ડ્રાઈવર સીટ અને એન્જિન પાસેના ભાગમાંથી શરૂ થઈ હતી. ડ્રાઈવરે આગ જોતા જ સમજદારી વાપરીને બસને બાજુ પર લીધી અને આગ ઓલવવાનો પ્રયાસ કર્યો હતો, પરંતુ આગે ક્ષણભરમાં વિકરાળ સ્વરૂપ ધારણ કરી લીધું હતું.
-
બારીઓમાંથી કૂદીને જીવ બચાવ્યો: બસની અંદર ધુમાડો ભરાઈ જવાથી મુસાફરોનો શ્વાસ રૂંધાવા લાગ્યો હતો. પોતાનો જીવ બચાવવા માટે ૨૦ થી વધુ મુસાફરો ઉતાવળમાં બસની બારીઓમાંથી નીચે કૂદી પડ્યા હતા, જ્યારે બાળકો, મહિલાઓ અને વૃદ્ધો સહિત ૯ લોકો અંદર ફસાઈ ગયા હતા.
-
રેસ્ક્યુ ઓપરેશન અને મૃતદેહો: ઘટનાની જાણ થતાં જ પોલીસ, ફાયર વિભાગની ૫ ગાડીઓ અને યમુના એક્સપ્રેસ-વે સુરક્ષા ટીમ તાત્કાલિક ઘટનાસ્થળે દોડી આવી હતી. ફાયર ટીમે ૪૫ મિનિટમાં આગ પર કાબૂ મેળવ્યો હતો. આગ એટલી તીવ્ર હતી કે અંદર ફસાયેલા ૯ મુસાફરોના મૃતદેહો બળીને હાડપિંજરમાં ફેરવાઈ ગયા હતા. સુરક્ષા ટીમોએ ગેસ કટરની મદદથી બસના પતરા કાપીને મૃતદેહો બહાર કાઢ્યા હતા.
