કેન્દ્રીય ગૃહમંત્રી અમિત શાહ શનિવારે અમદાવાદની મુલાકાતે આવી રહ્યા છે. આ દરમિયાન તેઓ ગુજરાતની કાયદો અને વ્યવસ્થાની સ્થિતિ અંગે ઉચ્ચસ્તરીય સમીક્ષા બેઠક યોજશે.
કેન્દ્રીય ગૃહમંત્રી અમિત શાહ શનિવારે અમદાવાદની મુલાકાતે આવી રહ્યા છે. આ દરમિયાન તેઓ ગુજરાતની કાયદો અને વ્યવસ્થાની સ્થિતિ અંગે ઉચ્ચસ્તરીય સમીક્ષા બેઠક યોજશે. બેઠકમાં રાજ્યની આંતરિક સુરક્ષા, ડ્રગ્સની હેરાફેરી, સાયબર ક્રાઈમ અને નવા ફોજદારી કાયદાના અમલીકરણ સહિતના મહત્વપૂર્ણ મુદ્દાઓ પર ચર્ચા કરવામાં આવશે.
નવા ફોજદારી કાયદાના અમલીકરણની સમીક્ષા
ગુજરાતમાં ભારતીય ન્યાય સંહિતા સહિતના ત્રણ નવા ફોજદારી કાયદાના અમલીકરણ અંગે અમિત શાહ અધિકારીઓ પાસેથી વિગતો મેળવશે. નવા કાયદા હેઠળ પોલીસ તપાસ, પુરાવા એકત્ર કરવાની પ્રક્રિયા અને ગુનાના કેસોમાં નવી જોગવાઈઓના ઉપયોગ અંગે ચર્ચા થશે.
આ ઉપરાંત નવા કાયદાના અમલીકરણ દરમિયાન પોલીસ તંત્રને પડતા વ્યવહારુ પડકારો અને આધુનિક તપાસ પદ્ધતિઓની કામગીરીની પણ સમીક્ષા કરવામાં આવશે.
ડ્રગ્સની હેરાફેરી અને સાયબર ક્રાઈમ પર વિશેષ ધ્યાન
બેઠકમાં ગુજરાતમાં ડ્રગ્સના ગેરકાયદે કારોબારને ડામવા માટેની કાર્યવાહી અંગે ચર્ચા થશે. ખાસ કરીને દરિયાઈ સરહદ મારફતે થતી ડ્રગ્સની ઘૂસણખોરી અને આંતરરાજ્ય સંગઠિત ગુનાખોરી સામે સુરક્ષા એજન્સીઓની કામગીરીની સમીક્ષા કરવામાં આવશે.
બીજી તરફ વધતા સાયબર ગુનાઓ અને ડિજિટલ છેતરપિંડી સામે કેવી રીતે અસરકારક કાર્યવાહી કરી શકાય તે અંગે પણ ચર્ચા થશે. નાણાકીય સાયબર ફ્રોડ અને ગુનેગારો સુધી પહોંચવામાં આવતી મુશ્કેલીઓના ઉકેલ માટે નવી વ્યૂહરચના ઘડવામાં આવશે.
બેઠકમાં મુખ્યમંત્રી સહિતના અધિકારીઓ હાજર રહેશે
અમિત શાહની અધ્યક્ષતામાં યોજાનારી આ બેઠકમાં મુખ્યમંત્રી ભૂપેન્દ્ર પટેલ, નાયબ મુખ્યમંત્રી હર્ષ સંઘવી, મુખ્ય સચિવ એમ.કે. દાસ અને રાજ્યના પોલીસ વડા જી.એસ. મલિક ઉપસ્થિત રહેશે.
આ ઉપરાંત ગૃહ વિભાગના વરિષ્ઠ અધિકારીઓ અને વિવિધ સુરક્ષા એજન્સીઓના ઉચ્ચ અધિકારીઓ પણ બેઠકમાં ભાગ લેશે. આ બેઠકમાં ગુજરાતની સુરક્ષા વ્યવસ્થાને વધુ મજબૂત બનાવવા અને ગુનાખોરી સામે સંકલિત કાર્યવાહી કરવા અંગે મહત્વપૂર્ણ ચર્ચા થવાની શક્યતા છે.
