પાકિસ્તાનથી ગેરકાયદેસર રીતે થતી આયાત સામે DRIએ મોટું ઓપરેશન પાર પાડ્યું છે. 12.04 કરોડનો માલ જપ્ત કરીને અનેક ખુલાસા કર્યા છે. આ માલ UAE મારફતે ભારત લાવવામાં આવતો હતો. આ વિશે વિગતવાર જાણો.
નવી દિલ્હી, ગુરૂવાર
કેન્દ્રીય નાણા મંત્રાલયે સંસદમાં આપેલી માહિતી અનુસાર, ડિરેક્ટોરેટ ઓફ રેવન્યુ ઈન્ટેલિજન્સ (DRI) એ પાકિસ્તાનથી થતી ગેરકાયદેસર આયાત સામે મોટી કાર્યવાહી કરી છે. આ ઓપરેશનને ‘ઓપરેશન ડીપ મેનિફેસ્ટ’ નામ આપવામાં આવ્યું છે, જે હેઠળ જુલાઈ 2025 સુધીમાં કુલ 5 કેસ નોંધવામાં આવ્યા છે. આ કેસોમાં 12.04 કરોડનો પાકિસ્તાની માલ જપ્ત કરવામાં આવ્યો છે.
આ કાર્યવાહી એવા સમયમાં થઈ છે જ્યારે પહેલગામ આતંકવાદી હુમલા બાદ પાકિસ્તાની માલની આયાત પર કડક પ્રતિબંધો લાદવામાં આવ્યા છે. નાણા રાજ્યમંત્રી પંકજ ચૌધરીએ જણાવ્યું કે આ તમામ 5 કેસોમાં, માલ ત્રીજા દેશ, એટલે કે સંયુક્ત આરબ અમીરાત (UAE) દ્વારા ગુપ્ત માર્ગો વાપરીને ભારતમાં લાવવામાં આવતો હતો. આ ગેરકાયદેસર આયાતને રોકવા માટે જ DRIએ આ ઓપરેશન શરૂ કર્યું હતું.
ગુપ્ત રૂટનો થયો પર્દાફાશ
તપાસમાં એક આશ્ચર્યજનક નેટવર્ક સામે આવ્યું છે. 26 જૂનના રોજ, 9 કરોડની કિંમતના 1,115 મેટ્રિક ટન માલવાહક 39 કન્ટેનર જપ્ત કરવામાં આવ્યા હતા. આ કેસમાં એક વ્યક્તિની ધરપકડ પણ કરવામાં આવી હતી. તપાસમાં જાણવા મળ્યું કે પાકિસ્તાનના કરાચી બંદરથી માલ પહેલા દુબઈના જેબેલ અલી બંદર સુધી જહાજમાં લઈ જવામાં આવતો હતો. ત્યાંથી, તેને ભારત જતા અન્ય કન્ટેનર જહાજોમાં લોડ કરવામાં આવતો હતો. આ રીતે, પાકિસ્તાની માલની આયાત પરના પ્રતિબંધોને ટાળવાનો પ્રયાસ કરવામાં આવતો હતો.
અન્ય કેસો પણ નોંધાયા
આ સિવાય કસ્ટમ અધિકારીઓએ 12 લાખની ગેરકાયદેસર આયાતના 13 અન્ય કેસ પણ શોધી કાઢ્યા છે. આ કેસોમાં, માલની આયાત ડાયરેક્ટોરેટ જનરલ ઓફ ફોરેન ટ્રેડ (DGFT) દ્વારા લાદવામાં આવેલા નિયમો અને પ્રતિબંધોનું ઉલ્લંઘન કરતી હોવાનું જાણવા મળ્યું છે. આ તમામ ઘટનાઓ ભારતમાં ગેરકાયદેસર વેપારને અટકાવવા માટે સરકારની પ્રતિબદ્ધતા દર્શાવે છે.
