અમદાવાદને ભિક્ષાવૃત્તિ મુક્ત બનાવવા AMC અને પોલીસ દ્વારા હાથ ધરાયેલી સંયુક્ત ડ્રાઇવમાં ૭૨ બાળકો અને ૮૯ વયસ્કો સહિત કુલ ૧૬૧ લોકોને રેસ્ક્યુ કરી મેડિકલ તપાસ કરાઈ છે.
અમદાવાદ શહેરને સંપૂર્ણપણે ભિક્ષાવૃત્તિ મુક્ત બનાવવાના સુનિયોજિત આયોજનના ભાગરૂપે અમદાવાદ મ્યુનિસિપલ કોર્પોરેશન (AMC) ના યુ.સી.ડી. વિભાગ, પોલીસ વિભાગના એન્ટી હ્યુમન ટ્રાફિકિંગ યુનિટ (AHTU) અને ગુજરાત સરકારના સમાજ સુરક્ષા વિભાગ દ્વારા એક સંયુક્ત ઝુંબેશ હાથ ધરવામાં આવી છે. તા. ૯ સપ્ટેમ્બરના રોજ શહેરના તમામ ઝોનમાં હાથ ધરાયેલી આ ખાસ ‘એન્ટી બેગિંગ ડ્રાઇવ’ હેઠળ ટ્રાફિક સિગ્નલો અને મુખ્ય હોટસ્પોટ્સ પર સઘન તપાસ અને કાર્યવાહી કરવામાં આવી હતી.
૭૨ બાળકો અને ૮૯ વયસ્કોનું રેસ્ક્યુ અને મેડિકલ ચેક-અપ
-
કુલ ૧૬૧ લોકોનું રેસ્ક્યુ: આ વિશેષ ઝુંબેશ દરમિયાન ભિક્ષાવૃત્તિ સાથે સંકળાયેલા કુલ ૮૯ વયસ્ક વ્યક્તિઓ (સ્ત્રી-પુરુષ) અને ૭૨ બાળકો મળીને કુલ ૧૬૧ લોકોને સફળતાપૂર્વક રેસ્ક્યુ કરવામાં આવ્યા છે.
-
આરોગ્ય તપાસ: રેસ્ક્યુ કરાયેલા તમામ લોકોને તંત્ર દ્વારા નક્કી કરાયેલા સુરક્ષિત સ્થળે લાવીને તેમનું પ્રાથમિક મેડિકલ ચેક-અપ કરાવવામાં આવ્યું હતું.
-
આગળની કાર્યવાહી: આ ડ્રાઇવ અંતર્ગત રેસ્ક્યુ કરાયેલા ૧૭ પુરુષો સહિતના અન્ય ઇસમોને કાયદાકીય અને પુનર્વસનની પ્રક્રિયા હેઠળ યોગ્ય માર્ગે મોકલવાની તંત્ર દ્વારા કાર્યવાહી હાથ ધરવામાં આવી છે.
