પાંચ બાંગ્લાદેશીઓ લાલ કિલ્લા પરિસરમાં પ્રવેશવાનો પ્રયાસ કરી રહ્યા હતા. આ દરમિયાન સુરક્ષા માટે તહેનાત પોલીસકર્મીઓને શંકા ગઈ, ત્યારે તે બધાને કસ્ટડીમાં લેવામાં આવ્યા.
નવી દિલ્હી, મંગળવાર
દિલ્હી પોલીસના જણાવ્યા અનુસાર સોમવારે મોડી સાંજે પાંચ યુવકો લાલ કિલ્લાના પરિસરમાં બળજબરીપૂર્વક પ્રવેશવાનો પ્રયાસ કરી રહ્યા હતા. આ દરમિયાન ત્યાં ફરજ પર રહેલા પોલીસકર્મીઓએ તેમની ગતિવિધિઓ પર શંકા થતાં તેમને કસ્ટડીમાં લીધા હતા. પ્રાથમિક તપાસમાં જાણવા મળ્યું છે કે આ બધાની ઉંમર 20 થી 25 વર્ષની વચ્ચે છે અને તેઓ ગેરકાયદેસર રીતે ભારતમાં પ્રવેશ્યા છે.
પોલીસે તેમની પાસેથી કેટલાક બાંગ્લાદેશી દસ્તાવેજો જપ્ત કર્યા છે. પૂછપરછમાં તેમણે જણાવ્યું કે તેઓ દિલ્હીમાં મજૂરીકામ કરે છે. જોકે, પોલીસે હજુ સુધી તેમના લાલ કિલ્લામાં પ્રવેશ કરવાના હેતુ વિશે કોઈ ચોક્કસ માહિતી આપી નથી. પોલીસ આ મામલાની ગંભીરતાથી તપાસ કરી રહી છે અને 15 ઑગસ્ટ પહેલા આવી ઘટનાઓને ગંભીરતાથી લઈ રહી છે.
ડમી બોમ્બ ડિટેક્ટ ન થતાં 7 પોલીસકર્મીઓ સસ્પેન્ડ
આ ઘટનાની સાથે જ લાલ કિલ્લાની સુરક્ષામાં થયેલી એક અન્ય મોટી ભૂલ પણ સામે આવી છે. 15 ઑગસ્ટની તૈયારીના ભાગરૂપે, દિલ્હી પોલીસના સ્પેશિયલ સેલની ટીમે સુરક્ષા વ્યવસ્થા ચકાસવા માટે એક મોકડ્રિલ યોજી હતી. આ મોકડ્રિલ દરમિયાન, સિવિલ ડ્રેસમાં રહેલા એક અધિકારી ડમી બોમ્બ સાથે સરળતાથી લાલ કિલ્લાના પરિસરમાં પ્રવેશવામાં સફળ રહ્યા હતા. આ ઘટના બાદ, સુરક્ષામાં નિષ્ફળ રહેલા સાત પોલીસકર્મીઓને તાત્કાલિક અસરથી સસ્પેન્ડ કરવામાં આવ્યા છે. આ ઘટના દર્શાવે છે કે 15 ઑગસ્ટ પહેલા પણ સુરક્ષા વ્યવસ્થામાં કેટલીક ખામીઓ છે.
15 ઑગસ્ટ પહેલા દિલ્હીમાં હાઈ એલર્ટ
15 ઑગસ્ટના રોજ વડાપ્રધાન નરેન્દ્ર મોદી લાલ કિલ્લા પરથી દેશને સંબોધિત કરવાના હોવાથી, દિલ્હીમાં સુરક્ષા વ્યવસ્થા અત્યંત કડક કરી દેવામાં આવી છે. શહેરભરમાં ચેકિંગ અને પેટ્રોલિંગ વધારી દેવામાં આવ્યું છે. આ બંને ઘટનાઓને જોતા, પોલીસ અને સુરક્ષા એજન્સીઓ વધુ સતર્ક થઈ ગઈ છે અને કોઈ પણ સંભવિત ખતરાને નિષ્ફળ બનાવવા માટે તમામ પ્રયાસો કરી રહી છે.
