સંત સરોવરમાં હાલ એક દરવાજો ખોલવામાં આવ્યો છે, જેના કારણે પાણીનો પ્રવાહ ચાલુ છે. આ જ પટ વિસ્તારમાં યુવાનો બેખોફ થઈને ક્રિકેટ રમી રહ્યા છે.
ગાંધીનગર, રવિવાર
સામાન્ય રીતે ક્રિકેટનો રોમાંચ દર્શકોને મેદાન તરફ ખેંચે છે, પરંતુ ગાંધીનગરમાં સંત સરોવરના પટમાં રમાઈ રહેલી ક્રિકેટ મેચ દર્શકો જ નહીં, પણ ખેલાડીઓ માટે પણ જીવનું જોખમ બની રહી છે. હાલમાં જ એક વાયરલ વીડિયો સામે આવ્યો છે, જેમાં યુવાનો વહેતા પાણીની બરાબર બાજુમાં ક્રિકેટ રમતા જોવા મળી રહ્યા છે. આ દ્રશ્યો ચોંકાવનારા છે અને મોટી દુર્ઘટનાને આમંત્રણ આપનારા છે.
સંત સરોવરમાં હાલ એક દરવાજો ખોલવામાં આવ્યો છે, જેના કારણે પાણીનો પ્રવાહ ચાલુ છે. આ જ પટ વિસ્તારમાં યુવાનો બેખોફ થઈને ક્રિકેટ રમી રહ્યા છે. સહેજ પણ ચૂક થાય તો કોઈ પણ વ્યક્તિ પોતાનો જીવ ગુમાવી શકે તેવી ગંભીર પરિસ્થિતિ છે. વરસાદની સિઝન ચાલુ છે અને કેચમેન્ટ એરિયામાં વધુ વરસાદ પડવાના કારણે જો સરોવરના વધુ દરવાજા ખોલવાની ફરજ પડે તો કોઈ મોટી દુર્ઘટના સર્જાઈ શકે છે.
વાઈરલ વીડિયોથી ચિંતા
આ ખતરનાક ક્રિકેટનો વીડિયો સોશિયલ મીડિયા પર ઝડપથી વાયરલ થઈ રહ્યો છે. લોકો આ વીડિયો જોઈને ચિંતા વ્યક્ત કરી રહ્યા છે અને તંત્ર દ્વારા તાત્કાલિક પગલાં લેવાની માંગ કરી રહ્યા છે. યુવાનોએ પણ આવા જોખમી સ્થળોએ ક્રિકેટ જેવી રમતો રમવાનું ટાળવું જોઈએ, કારણ કે એક ક્ષણની મજા જીવનભરનો અફસોસ બની શકે છે.
શું તંત્ર જાગશે?
સવાલ એ છે કે શું તંત્ર આ ગંભીર બાબતની નોંધ લેશે અને આવા જોખમી ક્રિકેટ મેચો રોકવા માટે કોઈ કાર્યવાહી કરશે? યુવાનોના જીવ સાથે ચેડા ન થાય તે સુનિશ્ચિત કરવું એ તંત્ર અને સમાજ બંનેની જવાબદારી છે.
