શું તમે બ્રશ કર્યા પછી તરત જ ચા પીઓ છો? આ આદત તમારા દાંત માટે હાનિકારક સાબિત થઈ શકે છે. જાણો નિષ્ણાતોના મતે બ્રશ કર્યા પછી કેટલો સમય રાહ જોવી જોઈએ અને કઈ રીતે તમારા દાંતને નુકસાન થતું અટકાવવું. સંપૂર્ણ માહિતી અને સચોટ સલાહ માટે વાંચો.
અમદાવાદ, રવિવાર
મોટાભાગના ભારતીયો માટે સવારની શરૂઆત એક કપ ગરમા-ગરમ ચાથી થાય છે. ભલે તે ગ્રીન ટી, બ્લેક ટી કે પછી આપણી ફેવરિટ મિલ્ક ટી હોય, તે આપણા જીવનશૈલીનો એક અભિન્ન અંગ બની ગઈ છે. પરંતુ શું તમને ખ્યાલ છે કે, બ્રશ કર્યા પછી તરત જ ચા પીવાની તમારી આ આદત તમારા દાંત માટે કેટલી જોખમી છે?
આ એક એવી કોમન પ્રેક્ટિસ છે જેનાથી દાંત ધીમે ધીમે ખરાબ થઈ શકે છે, અને કદાચ તમને તેનો અંદાજ પણ નહીં હોય. ચા તમને તાજગી જરૂર આપે છે, પણ ડેન્ટલ હેલ્થના મામલે આ ટાઈમિંગ બહુ જ મેટર કરે છે.
એસિડનો એટેક અને સંવેદનશીલ સપાટી
અમેરિકાની નેશનલ ઈન્સ્ટિટ્યૂટ ઓફ હેલ્થના સંશોધન મુજબ, દાંત પર વારંવાર એસિડનો સંપર્ક થવાથી તે કમજોર બને છે. જ્યારે આપણે બ્રશ કરીએ છીએ, ત્યારે ટૂથપેસ્ટ અથવા બ્રશના ઘર્ષણથી દાંતની સપાટી થોડી નરમ અને સંવેદનશીલ બની જાય છે.
આ સંવેદનશીલતા વચ્ચે, જો તમે તરત જ ચા પીઓ છો (ખાસ કરીને લીંબુ સાથે અથવા દૂધ વગરની ચા જે પ્રમાણમાં વધુ એસિડિક હોય છે), તો ચામાં રહેલો એસિડ દાંતના દંતવલ્કને વધુ નરમ બનાવી દે છે. આનાથી તમારા દાંત પર ડાઘ પડવાની અને ચમકદાર પડને નુકસાન થવાની પ્રક્રિયા ઝડપી બની જાય છે.
પીળાશ અને ફ્લોરાઇડનું નુકસાન
બ્રશ કર્યા પછી તરત ચા પીવાથી 2 મુખ્ય સમસ્યાઓ વધે છે:
દાંત પીળા થવા: NIHના સંશોધનમાં કહેવાયું છે કે, ચામાં ટેનીન નામનું તત્વ હોય છે. જ્યારે દાંત સંવેદનશીલ હોય છે, ત્યારે આ ટેનીન દાંતની સપાટી પર ચોંટી જાય છે, જેનાથી દાંત પીળા થવાની શક્યતા વધી જાય છે.
ફ્લોરાઇડનું ધોવાણ: ટૂથપેસ્ટમાં દાંતને મજબૂત બનાવતું ફ્લોરાઇડ હોય છે. પરંતુ બ્રશ કર્યા પછી તરત ચા પીવાથી આ ફ્લોરાઇડનું સ્તર ઝડપથી દૂર થઈ શકે છે, જે દાંતના રક્ષણ માટે બિલકુલ યોગ્ય નથી.
તો, કેટલો સમય રાહ જોવી?
સંશોધકો સ્પષ્ટપણે સલાહ આપે છે કે, બ્રશ કર્યા પછી તમારે ઓછામાં ઓછી 30 થી 60 મિનિટ સુધી રાહ જોવી જોઈએ. આ સમયગાળો તમારા મોં માં PH લેવલને બેલેન્સ થવાનો અને દંતવલ્કને ફરીથી સખત થવાનો સમય આપે છે.
જો તમે આટલો વખત રાહ ન જોઈ શકો તો, આ સમય દરમિયાન પાણી પીવું, કોગળા કરવા અથવા કેલ્શિયમયુક્ત ખોરાક જેમ કે દૂધ કે દહીં જેવી હળવી વસ્તુઓનું સેવન કરવું સારું છે, જે એસિડની અસરને ઘટાડી શકે છે.
યાદ રાખો, ચા પીવાની મજા માણી શકાય છે, પરંતુ સમયનું ધ્યાન રાખીને તમે તમારા દાંત ને લાંબા ગાળા માટે તંદુરસ્ત અને ચમકદાર રાખી શકો છો. ડેન્ટલ કેરમાં આ એક નાની પણ મહત્વની વાત છે.
