સોમવારે ભારતના વિદેશ મંત્રી ડૉ. એસ. જયશંકરે અનેક દેશોના ટોચના નેતાઓ સાથે અલગ-અલગ મુલાકાત કરી હતી
ક્વાલા લમ્પુર ખાતે આયોજિત આસિયાન (ASEAN) અને 20મી ઈસ્ટ એશિયા સમિટ દરમિયાન સોમવારે ભારતના વિદેશ મંત્રી ડૉ. એસ. જયશંકરે અનેક દેશોના ટોચના નેતાઓ સાથે અલગ-અલગ મુલાકાત કરી હતી. તેમણે ઓસ્ટ્રેલિયાના વડાપ્રધાન એન્થની આલ્બનીઝ અને ન્યૂઝીલેન્ડના વડાપ્રધાન ક્રિસ્ટોફર લક્સન સાથે દ્વિપક્ષીય સંબંધો પર વિસ્તૃત વાતચીત કરી.
જયશંકરે જાપાનના વિદેશ મંત્રી મોતેગી તોશિમિત્સુ અને મલેશિયાના વિદેશ મંત્રી મોહમ્મદ હાજી હસન સાથે પણ ક્ષેત્રીય અને વૈશ્વિક મુદ્દાઓ પર ચર્ચા કરી.
ઓસ્ટ્રેલિયન વડાપ્રધાન આલ્બનીઝ સાથેની મુલાકાતને સકારાત્મક ગણાવતા જયશંકરે કહ્યું કે, આગામી દાયકામાં ભાગીદારીને મજબૂત કરવા અને હિંદ-પ્રશાંત ક્ષેત્રમાં સહયોગ વધારવા પર સહમતિ સધાઈ છે. તેમણે કહ્યું કે, આ વાતચીત ભારત અને ઓસ્ટ્રેલિયાની વિશેષ વ્યૂહાત્મક અને વૈશ્વિક ભાગીદારીની મજબૂતી દર્શાવે છે.
ન્યૂઝીલેન્ડના વડાપ્રધાન ક્રિસ્ટોફર લક્સન સાથેની બેઠકમાં જયશંકરે વડાપ્રધાન નરેન્દ્ર મોદી તરફથી શુભેચ્છાઓ પાઠવી અને દ્વિપક્ષીય સહયોગને વધુ આગળ વધારવાની પ્રતિબદ્ધતા વ્યક્ત કરી. આ બેઠકો વૈશ્વિક અને ક્ષેત્રીય પડકારો વચ્ચે ભારતના આસિયાન અને ઈસ્ટ એશિયાના સહયોગીઓ સાથેના સંબંધોને મજબૂત કરવાના પ્રયાસોનું પ્રતિબિંબ પાડે છે.
