માસિક આવકના 20થી 30 ગણા સુધીની પર્સનલ લોન ઓફર કરતી હોય : સમજો સેલેરીના આધારે લોનની રકમનું ગણિત
અમદાવાદ, રવિવાર : પૈસાની અચાનક જરૂરિયાત ઉભી થાય ત્યારે પર્સનલ લોન સૌથી સરળ અને ઝડપી ઓપ્શન સાબિત થાય છે. ખાસ કરીને પગારદાર વ્યક્તિઓ માટે બેન્કો સરળતાથી પર્સનલ લોન મંજૂર કરી દેતી હોય છે. પરંતુ, આ એક અનસિક્યોર્ડ લોન હોવાને કારણે તેના પર વ્યાજ દર પણ ઉંચો હોય છે, જે સામાન્ય રીતે 12%થી 24% વાર્ષિક સુધીનો હોઈ શકે છે.
તમારા મનમાં પણ આ સવાલ ચોક્કસ થતો હશે કે તમારી માસિક આવક એટલે કે સેલેરી પર બેન્ક તમને કેટલી રકમની પર્સનલ લોન આપી શકે છે. ચાલો, આજે અમે તમારી આ મૂંઝવણ દૂર કરીએ અને વિગતમાં જણાવીએ કે તમારી સેલેરીના આધારે તમને મેક્સિમમ કેટલી પર્સનલ લોન મળી શકે છે.
સેલેરીના આધારે લોનની રકમનું ગણિત
સામાન્ય રીતે મોટાભાગની બેન્કો અને ફાઇનાન્સિયલ સંસ્થાઓ તમારી માસિક આવકના 20થી 30 ગણા સુધીની પર્સનલ લોન ઓફર કરતી હોય છે. ઉદાહરણ તરીકે, જો તમારી માસિક સેલેરી 1 લાખ છે, તો તમને સરળતાથી 20 લાખથી લઈને 30 લાખ સુધીની પર્સનલ લોન મળી શકે છે.
ચાલો, જુદી જુદી સેલેરી બ્રેકેટ પ્રમાણે મળવાપાત્ર મેક્સિમમ લોનની રકમને સમજીએ:
25,000 5 લાખ સુધી
50,000 10 લાખ સુધી
75,000 15 લાખ સુધી
1 લાખ 20 લાખ સુધી
1.25 લાખ 25 લાખ સુધી
1.5 લાખ 30 લાખ સુધી
1.75 લાખ 35 લાખ સુધી
2 લાખ 40 લાખ સુધી
એ નોંધવું ખૂબ જ જરૂરી છે કે ઉપર દર્શાવેલ રકમ એક અંદાજ છે અને તે બેન્કની પોલિસીને આધીન છે. કેટલીક બેન્કો પર્સનલ લોનની મેક્સિમમ મર્યાદા 25 લાખ રાખે છે, જ્યારે એક્સિસ બેન્ક જેવી કેટલીક બેન્કો 40 લાખ અને ICICI બેન્ક જેવી બેન્કો 50 લાખ સુધીની પર્સનલ લોન પણ ઓફર કરે છે.
બેન્ક તમારી લોનની અરજી મંજૂર કરતા પહેલા ઘણા પરિબળોને ધ્યાનમાં લે છે. તમારી લોનની રકમ ફક્ત તમારી સેલેરી પર જ નહીં, પરંતુ નીચેના ફેક્ટર્સ પર પણ આધાર રાખે છે:
માસિક આવક: આ સૌથી મહત્વનું પરિબળ છે. તમારી માસિક આવક જેટલી વધારે હશે, તમારી લોન ચૂકવવાની ક્ષમતા તેટલી વધુ ગણવામાં આવશે અને તમને તેટલી મોટી રકમની લોન મળી શકશે.
ક્રેડિટ સ્કોર: તમારો ક્રેડિટ સ્કોર તમારી નાણાકીય શિસ્ત દર્શાવે છે. જો તમારો ક્રેડિટ સ્કોર 750 કે તેથી વધુ હોય, તો બેન્ક તમને સારો ગ્રાહક માને છે અને વધુ રકમની લોન ઓછા વ્યાજ દરે ઓફર કરી શકે છે.
હાલની લોનના હપ્તા: જો તમે પહેલાથી જ કોઈ લોન લીધેલી હોય અને તેના EMI ચૂકવી રહ્યા હો, તો બેન્ક તમારી નવી લોનની પાત્રતા નક્કી કરતી વખતે તે રકમને બાદ કરશે. ઉદાહરણ તરીકે, જો તમારી મેક્સિમમ લોન પાત્રતા 17 લાખ હોય અને તમે પહેલેથી જ 5 લાખની કાર લોન ચૂકવી રહ્યા છો, તો બેન્ક તમને હવે મેક્સિમમ 12 લાખની જ નવી લોન આપશે.
બેન્કની મેક્સિમમ લોન મર્યાદા: દરેક બેન્કની પર્સનલ લોન આપવા માટે એક મેક્સિમમ સીમા (Cap) નિર્ધારિત હોય છે. ભલે તમારી આવક ગમે તેટલી વધારે હોય, તમે તે બેન્કની નિર્ધારિત મર્યાદાથી વધુ લોન મેળવી શકતા નથી.
