અમદાવાદના નરોડા વિસ્તારમાં અમેરિકન નાગરિકો સાથે લોન સેટલમેન્ટના નામે છેતરપિંડી આચરતા ગેરકાયદે કોલ સેન્ટર પર પોલીસે દરોડો પાડી બે મહિલાઓ સહિત સાત આરોપીઓની ધરપકડ કરી છે.
અમદાવાદ શહેરના નરોડા વિસ્તારમાં અમેરિકન નાગરિકોને લોન સેટલમેન્ટના નામે કરોડો રૂપિયાની છેતરપિંડી આચરતા એક હાઈ-ટેક અને ગેરકાયદેસર કોલ સેન્ટરનો પોલીસે સફળ પર્દાફાશ કર્યો છે. નરોડા હંસપુરા રાજચંદ્ર સર્કલ પાસે આવેલા સાહિત્ય આર્કેડના પ્રથમ માળે દુકાન નંબર ૧૧૨ માં છેલ્લા ત્રણ મહિનાથી આ પ્રવૃત્તિ ચલાવવામાં આવી રહી હોવાની બાતમીના આધારે પોલીસે દરોડો પાડીને બે મહિલાઓ સહિત કુલ સાત આરોપીઓની ધરપકડ કરી છે.
કોલ સેન્ટરની કામ કરવાની મોડસ ઓપરેન્ડી
-
લીડ ડેટા અને ખોટી ઓળખ: પોલીસ તપાસમાં ખુલાસો થયો છે કે આરોપીઓ અમેરિકન નાગરિકોના બેંક એકાઉન્ટ સંબંધિત લીડ ડેટા મેળવીને તેનો દુરુપયોગ કરતા હતા. આ ડેટા કોલ સેન્ટરમાં કામ કરતા કર્મચારીઓને આપવામાં આવતો હતો, જેઓ અમેરિકાની અલગ-અલગ બેંકોના વકીલ હોવાની બનાવટી ઓળખ આપીને લોન સસ્તામાં સેટલ કરાવવાની લાલચ આપતા હતા.
-
ક્રેડિટ કાર્ડ વિગતો અને ક્રિપ્ટોકરન્સી ટ્રાન્ઝેક્શન: કોઈ અમેરિકન નાગરિક ફસાઈ જાય ત્યારબાદ લોન સેટલમેન્ટના નામે ક્રેડિટ કાર્ડની સંપૂર્ણ વિગતો મેળવી લેવામાં આવતી હતી. આ વિગતો ટેલિગ્રામ અને વોટ્સએપ દ્વારા અન્ય પેમેન્ટ હેન્ડલર્સને મોકલીને બેંક ખાતામાંથી નાણાં કપાવવામાં આવતા હતા.
-
હવાલા અને બિટકોઈનનો ઉપયોગ: છેતરપિંડીથી મેળવેલા નાણાંમાંથી મોટો હિસ્સો ક્રિપ્ટોકરન્સી (બિટકોઈન) દ્વારા પ્રાપ્ત કરવામાં આવતો હતો. ત્યારબાદ ટેલિગ્રામ ગ્રુપના માધ્યમથી બિટકોઈનને ભારતીય ચલણમાં રૂપાંતરિત કરી હવાલા અથવા આંગડિયા મારફતે નાણાં મેળવવામાં આવતા હતા.
