બિહારમાં રાજકીય ગરમાવા બાદ અંતે સસ્પેન્સ સમાપ્ત થયો છે. નીતીશ કુમાર ૧૦મી વખત મુખ્યમંત્રી તરીકે શપથ લેવા જઈ રહ્યા છે.
બિહારમાં રાજકીય ગરમાવા બાદ અંતે સસ્પેન્સ સમાપ્ત થયો છે. નીતીશ કુમાર ૧૦મી વખત મુખ્યમંત્રી તરીકે શપથ લેવા જઈ રહ્યા છે. ૨૦ નવેમ્બરના રોજ પટણાના ગાંધી મેદાનમાં સવારે ૧૧:૩૦ કલાકે શપથ ગ્રહણ સમારોહ યોજાવાની સંભાવના છે. શપથ ગ્રહણ સાથે જ નીતીશ કુમાર બિહારના ૧૯મા મુખ્યમંત્રી બનશે. નીતીશ કુમારને જેડીયુ (JDU) અને ત્યારબાદ એનડીએ (NDA) ધારાસભ્ય દળના નેતા તરીકે સર્વસંમતિથી પસંદ કરવામાં આવ્યા હતા. આ નિર્ણય બાદ તેમણે રાજ્યપાલને પોતાનું રાજીનામું સુપરત કર્યું અને સરકાર બનાવવાનો દાવો રજૂ કર્યો.
નવી સરકાર બની રહી હોવા છતાં, બંને નાયબ મુખ્યમંત્રી (Deputy CMs) ના ચહેરા જૂના જ રહેશે. સમ્રાટ ચૌધરીને ભાજપના નેતા અને વિજય સિન્હાને ઉપનેતા તરીકે ફરીથી પસંદ કરવામાં આવ્યા છે અને તેઓ નાયબ મુખ્યમંત્રી તરીકે શપથ લેશે. શરૂઆતમાં બંને નેતાઓને બદલવાની અટકળો હતી, પરંતુ છેલ્લી ઘડીએ નીતીશ કુમારે સમ્રાટ ચૌધરી સાથે કામ કરવામાં પોતાની સરળતા દર્શાવી, જેના કારણે ભાજપે કોઈને રિપ્લેસ કરવાનું જોખમ ન લેતા, બંને નેતાઓને રિપીટ કરવાનો નિર્ણય લીધો. એવી પણ ચર્ચા છે કે નીતીશ કુમારની સાથે લગભગ ૨૦ મંત્રીઓ શપથ લઈ શકે છે, અને ત્યારબાદ મંત્રીમંડળનું વિસ્તરણ થશે, જેમાં કુલ ૩૪ મંત્રીઓને નવી સરકારમાં સ્થાન મળી શકે છે. શપથ ગ્રહણ સમારોહમાં વડાપ્રધાન નરેન્દ્ર મોદી સહિત અનેક કેન્દ્રીય મંત્રીઓ અને અન્ય રાજ્યોના મુખ્યમંત્રીઓ હાજર રહે તેવી સંભાવના છે.
