GPSC પરીક્ષામાં ઉમેદવારના સાચા જવાબને ખોટો ઠેરવવા મામલે ગુજરાત હાઈકોર્ટ લાલઘૂમ! પેપર સેટર અને ચેકર સામે તિરસ્કારની કાર્યવાહી કેમ ન કરવી? જાણો આખો વિવાદ.
અમદાવાદ, બુધવાર
ગુજરાત જાહેર સેવા આયોગ (GPSC) દ્વારા લેવાતી સ્પર્ધાત્મક પરીક્ષાઓમાં વારંવાર થતા છબરડાઓ હવે હાઈકોર્ટના દરવાજે પહોંચી ગયા છે. તાજેતરમાં GPSC પરીક્ષાના એક કિસ્સામાં ગુજરાત હાઈકોર્ટે અત્યંત કડક વલણ અપનાવ્યું છે. પરીક્ષામાં એક ઉમેદવારે સાચો જવાબ આપ્યો હોવા છતાં તેને ખોટો ગણી લેવામાં આવતા હાઈકોર્ટે જીપીએસસીના અધિકારીઓની આકરી ઝાટકણી કાઢી છે. એટલું જ નહીં, હાઈકોર્ટે રાજ્ય સરકાર પાસે ખુલાસો માંગ્યો છે કે પેપર સેટર અને પેપર ચેકર સામે કોર્ટ ઓફ કન્ટેમ્પ્ટ ની કાર્યવાહી કેમ ન કરવી?
શું છે આખો વિવાદ?
આ સમગ્ર મામલો એક યુવતીની સરકારી નોકરી અને તેના ભવિષ્ય સાથે જોડાયેલો છે. GPSC ની પરીક્ષામાં આ યુવતીએ એક પ્રશ્નનો એકદમ સાચો જવાબ આપ્યો હતો. આમ છતાં, ચેકરે તે જવાબ ખોટો ગણાવ્યો અને તેના માર્ક્સ કાપી લીધા. પરિણામે, યુવતીને ઇન્ટરવ્યુ માટે બોલાવવામાં ન આવી. આ અન્યાય સામે યુવતીએ ગુજરાત હાઈકોર્ટના દરવાજા ખખડાવ્યા હતા.
અરજદાર યુવતી તરફથી હાજર રહેલા એડવોકેટ મેઘા જાનીએ કોર્ટમાં સ્પષ્ટ દલીલ કરી હતી કે, ગુજરાત રાજ્યના પાઠ્યપુસ્તક મુજબ યુવતીએ લખેલો જવાબ 100% સાચો છે. પરંતુ અધિકારીઓએ અન્ય સંદર્ભ પુસ્તકોનું બહાનું કાઢીને જવાબ ખોટો પાડી દીધો, જેના લીધે એક હોશિયાર ઉમેદવારની નોકરી અટકી ગઈ છે.
કૌટિલ્યનું અર્થશાસ્ત્ર બન્યું વિવાદનું મૂળ
આ પ્રશ્ન કૌટિલ્યના અર્થશાસ્ત્ર પુસ્તક અને તેના વિષયને લગતો હતો. રાજ્ય સરકારે કોર્ટમાં બચાવ કરતા કહ્યું કે, કૌટિલ્યના અર્થશાસ્ત્રમાં માનવીની આર્થિક પ્રવૃત્તિઓનું વર્ણન છે. નિષ્ણાતોના મતે આ વિષય રાજ્યશાસ્ત્ર નો ગણાય છે, જ્યારે ઉમેદવારે તેને અર્થશાસ્ત્ર ના સંદર્ભમાં જવાબ આપ્યો હતો. સરકારે એવો પણ બચાવ કર્યો કે પાઠ્યપુસ્તક અને અન્ય મોટા સંદર્ભ પુસ્તકોની માહિતીમાં વિરોધાભાસ છે, તેથી હાઈકોર્ટે આવા શૈક્ષણિક વિષયોમાં દખલ ન કરવી જોઈએ.
હાઈકોર્ટનો જડબાતોડ જવાબ: શંકાનો લાભ વિદ્યાર્થીને જ મળવો જોઈએ
સરકારની આ ગોળ-ગોળ દલીલો સાંભળીને હાઈકોર્ટ નારાજ થઈ હતી. કોર્ટે જીપીએસસીને ફટકાર લગાવતા નીચે મુજબના મહત્વના અવલોકનો કર્યા:
વિદ્યાર્થીઓનું હિત સર્વોપરી: કોર્ટે સ્પષ્ટ કહ્યું કે, જ્યારે વાત વિદ્યાર્થીઓના ભવિષ્યની હોય અને પ્રશ્નમાં સ્પષ્ટતા ન હોય, ત્યારે કોર્ટ ચોક્કસથી દખલગીરી કરશે અને જરૂર પડ્યે દંડ પણ ફટકારશે.
યોગ્ય પુરાવાનો અભાવ: ઉમેદવારે પાઠ્યપુસ્તકના આધારે સાચો જવાબ લખ્યો હતો, જ્યારે સરકાર આ અંગે કોઈ સચોટ સંદર્ભ કોર્ટમાં રજૂ કરી શકી ન હતી.
ઉમેદવારને પ્રોત્સાહન આપો: હાઈકોર્ટે ટકોર કરી કે, જો કોઈ પ્રશ્નમાં શંકા હોય તો તેનો સીધો લાભ ઉમેદવારને મળવો જોઈએ. જો આવા તેજસ્વી ઉમેદવારો આગળ વધશે, તો તેનો સીધો ફાયદો આપણા સમાજને જ થવાનો છે.
કોર્ટની ગરિમા જાળવો: જીપીએસસીના અધિકારીઓને ચેતવણી આપતા કોર્ટે કહ્યું કે તેમણે કોર્ટની ગરિમા જાળવતા શીખવું પડશે.
હાલમાં ગુજરાત હાઈકોર્ટે આ મામલે સરકાર અને GPSC પાસે કડક શબ્દોમાં ખુલાસો માંગ્યો છે. આ ઘટનાએ ફરી એકવાર સરકારી પરીક્ષાઓની સિસ્ટમ અને પેપર ચેકર્સની કામગીરી સામે મોટા સવાલો ઊભા કર્યા છે. હવે જોવાનું એ રહે છે કે સરકાર આ મામલે કોર્ટમાં શું જવાબ રજૂ કરે છે અને પેપર સેટર પર કોઈ એક્શન લેવાય છે કે કેમ.
