અમદાવાદમાં સવારથી શરૂ થયેલા વરસાદના કારણે પકવાન અંડરપાસથી થલતેજ વચ્ચે 2 કિમીનો ટ્રાફિકજામ સર્જાયો છે અને પૂર્વ-પશ્ચિમના અનેક વિસ્તારો પાણીમાં ડૂબી ગયા છે.
અમદાવાદ શહેરમાં ફરી એકવાર વરસાદી માહોલ જામતા તંત્રની પ્રી-મોન્સૂન કામગીરીની પોલ ખુલી ગઈ છે. શહેરના અનેક વિસ્તારોમાં સામાન્યથી ભારે વરસાદના કારણે રસ્તાઓ પર પાણી ભરાવાની ગંભીર સમસ્યા સર્જાઈ છે. ખાસ કરીને પશ્ચિમ અમદાવાદના પોશ ગણાતા પકવાન અંડરપાસથી થલતેજ સુધીના માર્ગ પર ભારે પાણી ભરાવાને કારણે અંદાજે ૨ કિલોમીટર લાંબો ટ્રાફિકજામ સર્જાયો છે, જેના કારણે સવારના સમયે કામધંધે અને ઓફિસ જતાં નાગરિકોને ભારે હાલાકીનો સામનો કરવો પડી રહ્યો છે.
પૂર્વ અને પશ્ચિમ વિસ્તારોમાં જળબંબાકાર
-
પૂર્વ અમદાવાદ: નારોલ, ઇસનપુર, ઓઢવ, અને વસ્ત્રાલ સહિતના મુખ્ય વિસ્તારોમાં વરસાદી પાણી ભરાઈ જવાથી વાહનવ્યવહાર ગંભીર રીતે પ્રભાવિત થયો છે.
-
મુખ્ય માર્ગો પર મુશ્કેલી: વાહનચાલકોને પાણીથી ભરેલા રસ્તાઓ પરથી પસાર થવાની ફરજ પડી રહી છે, જેના કારણે વાહનો બંધ પડી જવાની અને ટ્રાફિક સર્જાવાની સમસ્યાઓ વધી ગઈ છે. સ્થાનિક નાગરિકોમાં તંત્રની લાપરવાહી સામે ભારે રોષ જોવા મળી રહ્યો છે.
