ગુજરાતમાં શિયાળાની શરૂઆત સાથે જ વાતાવરણમાં અચાનક પલટો આવ્યો છે. રાજ્યના અનેક વિસ્તારોમાં ફરી ચોમાસા જેવો માહોલ સર્જાયો છે.
ગુજરાતમાં શિયાળાની શરૂઆત સાથે જ વાતાવરણમાં અચાનક પલટો આવ્યો છે. રાજ્યના અનેક વિસ્તારોમાં ફરી ચોમાસા જેવો માહોલ સર્જાયો છે. વેસ્ટર્ન ડિસ્ટર્બન્સ અને લો પ્રેશર સિસ્ટમની અસરને પગલે છેલ્લા 24 કલાકમાં રાજ્યના 21 તાલુકામાં કમોસમી વરસાદ નોંધાયો છે.
ખાસ કરીને સૌરાષ્ટ્ર અને દક્ષિણ ગુજરાતમાં વરસાદી માહોલ જોવા મળી રહ્યો છે. બીજી તરફ, ખેતરમાં તૈયાર પાકને નુકસાન થવાની આશંકાને કારણે ખેડૂતોની ચિંતામાં વધારો થયો છે.
ગુજરાતના 4 જિલ્લામાં ભારે વરસાદનું યલો એલર્ટ
હવામાન વિભાગે 31 ઓક્ટોબરના રોજ દેવભૂમિ દ્વારકા, જામનગર, પોરબંદર અને રાજકોટ જિલ્લામાં ભારે વરસાદની આગાહી સાથે યલો એલર્ટ જાહેર કર્યું છે.વિભાગના ત્રણ કલાકના Nowcast અનુસાર, રાત્રે 8 વાગ્યા સુધી આ જિલ્લાઓમાં ગાજવીજ અને પવન સાથે ભારે વરસાદ પડી શકે છે. આથી સંબંધિત વિસ્તારોના લોકોએ હવામાનની સ્થિતિને ધ્યાનમાં રાખીને સાવચેતી રાખવી જરૂરી છે.
7 જિલ્લામાં હળવાથી મધ્યમ વરસાદની આગાહી
રાજ્યના અન્ય વિસ્તારોમાં પણ કમોસમી વરસાદની શક્યતા વ્યક્ત કરવામાં આવી છે. હવામાન વિભાગની આગાહી મુજબ, નીચેના જિલ્લાઓમાં છૂટાછવાયા સ્થળોએ ગાજવીજ સાથે હળવાથી મધ્યમ વરસાદ પડી શકે છે.
- રાજકોટ
- અમરેલી
- ભાવનગર
- જૂનાગઢ
- ગીર સોમનાથ
- નવસારી
- વલસાડ
આ વિસ્તારોમાં વરસાદી માહોલ રહેવાની શક્યતા છે. તેથી ખેડૂતો અને નાગરિકોએ હવામાન વિભાગની તાજી સૂચનાઓ પર નજર રાખવી જોઈએ.
કમોસમી વરસાદથી ખેડૂતોની ચિંતા વધી
કમોસમી વરસાદે ખેડૂતોની મુશ્કેલીઓ વધારી છે. સૌરાષ્ટ્રમાં મગફળીનો પાક તૈયાર થવાની અવસ્થામાં છે. આવા સમયે વરસાદ પડે તો પાકની ગુણવત્તા અને ઉત્પાદન પર અસર થવાની ભીતિ છે.બીજી તરફ, દક્ષિણ ગુજરાતમાં સોયાબીન સહિતના પાકને નુકસાન થવાની આશંકા છે. ખેડૂતોના જણાવ્યા મુજબ, વરસાદનું પ્રમાણ વધશે તો ખેતરમાં તૈયાર પાકને મોટું નુકસાન થઈ શકે છે.ખાસ કરીને કાપણી અને પાકને સૂકવવાની કામગીરીમાં વિક્ષેપ પડવાની શક્યતા છે. હવે ખેડૂતોની નજર આગામી દિવસોની હવામાન આગાહી પર છે.
