કુલગામ જિલ્લામાં આતંકવાદીઓ વિરુદ્ધ સુરક્ષાદળોનું ઓપરેશન ફરી તેજ બન્યું છે. બુધવાર, 18 નવેમ્બરની વહેલી સવારે સુરક્ષાદળો અને આતંકીઓ વચ્ચે ફરી અથડામણ શરૂ થઈ હતી.

જમ્મુ-કાશ્મીરના કુલગામ જિલ્લામાં આતંકવાદીઓ વિરુદ્ધ સુરક્ષાદળોનું ઓપરેશન ફરી તેજ બન્યું છે. બુધવાર, 18 નવેમ્બરની વહેલી સવારે સુરક્ષાદળો અને આતંકીઓ વચ્ચે ફરી અથડામણ શરૂ થઈ હતી. આ સંયુક્ત કાર્યવાહીમાં જમ્મુ-કાશ્મીર પોલીસ અને સુરક્ષાદળોની ટીમ સામેલ છે. અહેવાલો અનુસાર, લશ્કર-એ-તૈયબાનો કમાન્ડર મોહમ્મદ લતીફ ભટ સુરક્ષાદળોના ઘેરામાં ફસાયો છે.તેને સુરક્ષાદળોએ ઠાર માર્યો છે.
મસ્જિદમાં છુપાયેલા આતંકીને સરેન્ડર કરવાની અપીલ
અહેવાલો મુજબ, કુલગામના ઝાલંગામ વિસ્તારમાં લતીફ ભટ એક મસ્જિદમાં છુપાયો હોવાની માહિતી સામે આવી છે. સુરક્ષાદળોએ સમગ્ર વિસ્તારને ઘેરી લીધો છે.
કુલગામના SSP અનાયત અલીએ જણાવ્યું હતું કે પોલીસ અને સેનાના અધિકારીઓએ વીડિયો કોલ દ્વારા પણ આતંકીને આત્મસમર્પણ કરવા સમજાવવાનો પ્રયાસ કર્યો હતો. જોકે, તેણે સરેન્ડર કરવાનો ઇનકાર કર્યો હતો.
બુધવારે વહેલી સવારે આશરે 2:45 વાગ્યે અંદરથી ગોળીબાર શરૂ થતાં સુરક્ષાદળોએ જવાબી કાર્યવાહી કરી હતી. મસ્જિદને નુકસાન ન પહોંચે તે માટે સુરક્ષાદળો સાવચેતીપૂર્વક ઓપરેશન ચલાવી રહ્યાં છે.
CRPF કાફલા પરના હુમલા બાદ શરૂ થયું હતું સર્ચ ઓપરેશન
કુલગામના અખરાન વિસ્તારમાં 11 નવેમ્બરે CRPFના નાકા પર મોટરસાઇકલ સવાર હુમલાખોરોએ ગોળીબાર કર્યો હતો. આ હુમલામાં ત્રણ CRPF જવાનો ઘાયલ થયા હતા.
આ ઘટનાની તપાસ દરમિયાન પોલીસને નિસાર ડાર અને લતીફ ભટની સંડોવણી અંગે માહિતી મળી હતી. CCTV ફૂટેજમાં બંનેએ હુમલા પહેલાં મીર બજાર, અખરાન, હબલિશ અને કિલમ વિસ્તારમાં રેકી કરી હોવાની વિગતો સામે આવી હતી.
અગાઉની અથડામણમાં નિસાર ડાર માર્યો ગયો હતો
સોમવાર, 16 નવેમ્બરે કુલગામના લારૂ વિસ્તારમાં સુરક્ષાદળો અને આતંકીઓ વચ્ચે અથડામણ થઈ હતી. આ કાર્યવાહીમાં નિસાર ડાર માર્યો ગયો હતો, જ્યારે લતીફ ભટ સુરક્ષાદળોના ઘેરામાંથી નીકળી જવામાં સફળ રહ્યો હતો.
પોલીસના જણાવ્યા અનુસાર, નિસાર ડાર છેલ્લા પાંચથી છ મહિનાથી લતીફ ભટને આશ્રય અને અન્ય મદદ પૂરી પાડતો હતો. હવે સુરક્ષાદળો લતીફ ભટને પકડવા માટે કાર્યવાહી કરી રહ્યાં છે.
મસ્જિદને નુકસાન ન થાય તે માટે સાવચેતી
પોલીસ અધિકારીઓના જણાવ્યા અનુસાર, આતંકી મસ્જિદની અંદર છુપાયો હોવાથી સુરક્ષાદળો મહત્તમ સંયમ રાખી રહ્યાં છે. તેને વારંવાર આત્મસમર્પણ કરવાની અપીલ કરવામાં આવી છે.
હાલમાં સમગ્ર વિસ્તારને સુરક્ષાદળોએ ઘેરી લીધો છે અને ઓપરેશન ચાલુ છે. આ કાર્યવાહીનું પરિણામ અને આગળની સત્તાવાર વિગતોની રાહ જોવાઈ રહી છે.










