જાણો કે કેવી રીતે આધુનિક જીવનના સ્ટ્રેસ અને ડિપ્રેશનથી બચવા માટે બાલાસન, સુખાસન અને શવાસન જેવા 3 સરળ યોગાસનો તમને મદદ કરી શકે છે.
અમદાવાદ, મંગળવાર
આધુનિક સમયમાં સ્ટ્રેસ અને ડિપ્રેશન આપણા જીવનનો એક સામાન્ય ભાગ બની ગયા છે. આ બિઝી લાઇફસ્ટાઇલ અને વધતી જવાબદારીઓને કારણે થતો તણાવ આપણા સ્વાસ્થ્ય માટે હાનિકારક સાબિત થઈ શકે છે. પરંતુ આ સમસ્યાનો ઉકેલ આપણી પાસે જ છે, અને તે છે યોગ. છેલ્લાં કેટલાંક વર્ષોમાં, યોગે કરોડો લોકોને શારીરિક અને માનસિક રીતે સ્વસ્થ રહેવામાં મદદ કરી છે.
યોગ સ્ટ્રેસ ઘટાડવામાં ખૂબ જ અસરકારક છે. જ્યારે આપણે સ્ટ્રેસમાં હોઈએ છીએ, ત્યારે આપણા શરીરમાં કોર્ટિસોલ નામનું હોર્મોન વધી જાય છે. યોગના નિયમિત અભ્યાસથી આ હોર્મોનનું લેવલ કંટ્રોલમાં રહે છે, જેના કારણે સ્ટ્રેસમાં ઘટાડો થાય છે. આ ઉપરાંત, યોગ આપણી નર્વસ સિસ્ટમને પણ શાંત રાખવામાં મદદ કરે છે, જે આપણા મનને એક પ્રકારની શાંતિ આપે છે.
જો તમે પણ આ પ્રકારના સ્ટ્રેસમાંથી પસાર થઈ રહ્યા હો, તો અહીં જણાવેલા 3 યોગાસન તમારા માટે ખૂબ ફાયદાકારક સાબિત થઈ શકે છે.
1. બાલાસન
બાલાસન સ્ટ્રેસ ઘટાડવા માટે એક ઉત્તમ આસન છે. આ કરવા માટે, ઘૂંટણિયે બેસીને પગની એડીઓ પર બેસો. પછી બંને હાથ ઉપર ઉઠાવીને ધીમે ધીમે આગળની તરફ ઝુકો, જાણે કોઈ બાળક સૂઈ રહ્યું હોય. આ મુદ્રામાં 5 મિનિટ સુધી રહેવાથી મન શાંત થાય છે અને માનસિક થાક દૂર થાય છે.
2. સુખાસન
સુખાસન એક સરળ અને અસરકારક આસન છે. આ કરવા માટે, પલાઠી વાળીને સીધા બેસો અને આંખો બંધ કરીને ઊંડા શ્વાસ લો. કરોડરજ્જુ સીધી રાખો. આ આસન એવા લોકો માટે ખૂબ ફાયદાકારક છે જેઓ નાની નાની બાબતોથી જલદી ચિંતામાં મુકાઈ જાય છે.
3. શવાસન
શવાસનને ‘વિશ્રામની મુદ્રા’ પણ કહેવામાં આવે છે. આ આસન માનસિક શાંતિ અને એકાગ્રતા વધારે છે. આરામદાયક સ્થિતિમાં પીઠ પર સૂઈ જાઓ અને શરીર અને મન બંનેને સંપૂર્ણ રીતે રિલેક્સ થવા દો. આનાથી ઊંઘની ક્વોલિટી સુધરે છે અને માનસિક સ્ટ્રેસ ઘટે છે. અનિદ્રાની સમસ્યા હોય તેવા લોકો માટે શવાસન એક વરદાન છે.
