અમદાવાદમાં નરેન્દ્ર મોદી સ્ટેડિયમ પાસે ઓલિમ્પિક વિલેજ બનાવવા આસારામ આશ્રમના ગેરકાયદે બાંધકામો પર AMC બુલડોઝર ફેરવવાની તૈયારીમાં છે. જાણો શું છે 500 કરોડની જમીનનો વિવાદ અને ક્યારે શરૂ થશે ડિમોલિશન.
અમદાવાદ, ગુરૂવાર
અમદાવાદમાં સાબરમતી વિસ્તાર અને નરેન્દ્ર મોદી સ્ટેડિયમની આસપાસ આગામી સમયમાં મોટું પરિવર્તન જોવા મળશે. ભારત ઓલિમ્પિક્સ અને કોમનવેલ્થ ગેમ્સની યજમાની કરવા માટે તૈયારી કરી રહ્યું છે, ત્યારે અમદાવાદ મ્યુનિસિપલ કોર્પોરેશન એ પણ કમર કસી લીધી છે. આ મેગા પ્રોજેક્ટના રસ્તામાં આવતા ગેરકાયદે દબાણો હટાવવા માટે તંત્ર એક્શન મોડમાં આવી ગયું છે, જેમાં સૌથી મોટું નામ સાબરમતી સ્થિત આસારામ આશ્રમનું છે.
500 કરોડની સરકારી જમીન પર દબાણનો આરોપ
સાબરમતી નદીના કાંઠે આવેલો આસારામ આશ્રમ હાલ વિવાદનું કેન્દ્ર બન્યો છે. AMC ના સર્વે મુજબ, આ આશ્રમ જે જમીન પર ઉભો છે તે રાજ્ય સરકારની કિંમતી જમીન છે, જેની બજાર કિંમત અંદાજે 500 કરોડ રૂપિયા જેટલી થવા જાય છે. તપાસમાં સામે આવ્યું છે કે આશ્રમમાં કુલ 32 જેટલા બાંધકામો ગેરકાયદેસર રીતે ખડકી દેવામાં આવ્યા છે. આ દબાણો દૂર કરવા માટે AMCના પશ્ચિમ ઝોન દ્વારા અગાઉ પણ નોટિસ આપવામાં આવી હતી.
ઇમ્પેક્ટ ફીની અરજી નામંજૂર: હવે કાનૂની લડાઈ
જ્યારે આ દબાણો હટાવવાની વાત આવી ત્યારે આશ્રમના સંચાલકોએ આ બાંધકામોને કાયદેસર કરાવવા માટે ઇમ્પેક્ટ ફી ભરવાની તૈયારી બતાવી હતી અને તે માટે અરજી પણ કરી હતી. જોકે, મ્યુનિસિપલ કોર્પોરેશને કડક વલણ દાખવીને આ અરજી ફગાવી દીધી છે. હાલમાં આ મામલો એપેલેટ ઑથોરિટી સમક્ષ પેન્ડિંગ છે.
આજે બુધવારે મળેલી AMC લીગલ કમિટીની બેઠકમાં પણ આ મુદ્દો ગાજ્યો હતો. કમિટીના ચેરમેન પ્રકાશ ગુર્જરે સ્પષ્ટ સૂચના આપી છે કે આ કેસમાં તાત્કાલિક વકીલની નિમણૂક કરવામાં આવે અને કેસનો જલ્દી નિકાલ લાવવામાં આવે, જેથી વિકાસના કામોમાં આવતા અવરોધો દૂર કરી શકાય.
ઓલિમ્પિક વિલેજ માટે રસ્તો સાફ કરાશે
સરકારનું વિઝન છે કે નરેન્દ્ર મોદી સ્ટેડિયમની આસપાસ ઓલિમ્પિક વિલેજ અને વર્લ્ડ ક્લાસ સ્પોર્ટ્સ કોમ્પ્લેક્સનું નિર્માણ થાય. આ પ્રોજેક્ટના બીજા તબક્કા માટે આસપાસની જમીન ખુલ્લી કરવી અનિવાર્ય છે. આ લિસ્ટમાં માત્ર આસારામ આશ્રમ જ નથી, પરંતુ ભારતીય સેવા સમાજ, સદાશિવ આશ્રમ અને આસપાસના લગભગ 150 જેટલા રહેણાંક મકાનોને પણ નોટિસ ફટકારવામાં આવી છે.
ગમે ત્યારે ગરજી શકે છે બુલડોઝર
તંત્રના વલણને જોતા લાગી રહ્યું છે કે હવે આ કાર્યવાહીમાં મોડું કરવામાં નહીં આવે. લીગલ કમિટીના ચેરમેને સંકેત આપ્યા છે કે જેવો કોર્ટ કે ઓથોરિટીમાંથી કેસનો નિકાલ આવશે કે તરત જ ડિમોલિશનની કામગીરી શરૂ કરી દેવામાં આવશે. વર્ષો જૂના આ દબાણો પર બુલડોઝર ફરશે તે હવે લગભગ નક્કી માનવામાં આવી રહ્યું છે.
