ગુરુવારે (5 નવેમ્બર) રમાયેલી ફાઇનલમાં ભારતે જાપાનને 4-1થી હરાવીને એશિયન ચેમ્પિયન્સ ટ્રોફી 2026નો ખિતાબ પોતાના નામે કર્યો છે.
ભારતીય હોકી ટીમે ફરી એકવાર એશિયામાં પોતાનું વર્ચસ્વ સાબિત કર્યું છે. ગુરુવારે (5 નવેમ્બર) રમાયેલી ફાઇનલમાં ભારતે જાપાનને 4-1થી હરાવીને એશિયન ચેમ્પિયન્સ ટ્રોફી 2026નો ખિતાબ પોતાના નામે કર્યો છે. આ સાથે ભારતે છઠ્ઠી વખત આ પ્રતિષ્ઠિત ટ્રોફી જીતીને નવો રેકોર્ડ બનાવ્યો છે.
મોહાલીના ઓલિમ્પિયન બલબીર સિંહ સિનિયર ઇન્ટરનેશનલ હોકી સ્ટેડિયમમાં રમાયેલી આ ફાઇનલમાં શરૂઆતથી જ બંને ટીમો વચ્ચે જોરદાર ટક્કર જોવા મળી હતી. ત્રણ ક્વાર્ટર સુધી મુકાબલો 1-1ની બરાબરી પર રહ્યો હતો. જોકે, અંતિમ ક્વાર્ટરમાં ભારતીય ખેલાડીઓએ આક્રમક રમત બતાવીને ત્રણ ગોલ ફટકાર્યા અને મેચ 4-1થી જીતી લીધી.
જાપાને શરૂઆતમાં જ કર્યો ગોલ
મુકાબલાની શરૂઆતમાં જાપાને આક્રમક રમત બતાવી હતી. મેચની ત્રીજી મિનિટે કોકી માત્સુમોટોએ ગોલ કરીને જાપાનને 1-0ની સરસાઈ અપાવી હતી. ત્યારબાદ ભારતીય ટીમે બરાબરી મેળવવા માટે સતત પ્રયાસો કર્યા હતા.
ભારતે બીજા અને ત્રીજા ક્વાર્ટરમાં પણ જાપાનની રક્ષણાત્મક રમત સામે સંઘર્ષ કર્યો હતો. આખરે 42મી મિનિટે શિલાનંદ લાકરાએ ગોલ કરીને ભારતને 1-1ની બરાબરી અપાવી હતી.
અંતિમ ક્વાર્ટરમાં ભારતે ફટકાર્યા ત્રણ ગોલ
ચોથા ક્વાર્ટરમાં ભારતીય ટીમે મેચનું ચિત્ર બદલી નાખ્યું હતું. 48મી મિનિટે દિલપ્રીત સિંહે ગોલ કરીને ભારતને 2-1થી આગળ કર્યું હતું. ત્યારબાદ 53મી મિનિટે જુગરાજ સિંહે ત્રીજો ગોલ ફટકાર્યો હતો.
ભારતનો આક્રમક મિજાજ અહીં અટક્યો નહોતો. 54મી મિનિટે સુખજીત સિંહે ચોથો ગોલ કરીને ભારતની જીત લગભગ નિશ્ચિત કરી દીધી હતી. આ રીતે અંતિમ ક્વાર્ટરમાં માત્ર છ મિનિટના ગાળામાં ભારતે ત્રણ ગોલ કરીને જાપાનને 4-1થી હરાવ્યું હતું.
ભારતનો છઠ્ઠો એશિયન ચેમ્પિયન્સ ટ્રોફી ખિતાબ
આ જીત સાથે ભારતે એશિયન ચેમ્પિયન્સ ટ્રોફીમાં છઠ્ઠી વખત ચેમ્પિયન બનવાની સિદ્ધિ મેળવી છે. ટૂર્નામેન્ટમાં ભારતે શાનદાર પ્રદર્શન કરીને ફાઇનલ સુધીની સફર પૂર્ણ કરી હતી.
ખાસ વાત એ છે કે, ભારતે સેમિફાઇનલમાં દક્ષિણ કોરિયાને 8-1થી હરાવીને ફાઇનલમાં પ્રવેશ કર્યો હતો. હવે જાપાન સામેની 4-1ની જીત સાથે ભારતીય ટીમે ટૂર્નામેન્ટનો અંત ચેમ્પિયન તરીકે કર્યો છે.ભારતની આ ઐતિહાસિક જીતથી દેશભરના હોકી ચાહકોમાં ખુશીની લહેર જોવા મળી રહી છે.
