નેપાળની નવી સરકારે એક મોટો રાજદ્વારી નિર્ણય લેતા ભારત સહિત 6 દેશોમાંથી પોતાના રાજદૂતોને પરત બોલાવ્યા છે. જાણો કયા દેશોનો સમાવેશ થાય છે અને આ નિર્ણય પાછળનું કારણ શું છે.
કાઠમંડુ, ગુરૂવાર
નેપાળમાં નવી રચાયેલી બાલેન સરકારે સત્તા સંભાળતાની સાથે જ વહીવટી તંત્રમાં મોટા ફેરફારો શરૂ કરી દીધા છે. આ જ ક્રમમાં એક મહત્ત્વપૂર્ણ રાજદ્વારી પગલું ભરતાં સરકારે ભારત સહિત કુલ 6 દેશોમાં અગાઉની ઓલી સરકાર દ્વારા નિયુક્ત કરાયેલા રાજદૂતોને પરત બોલાવવાનો નિર્ણય કર્યો છે. આ રાજદૂતોને પોતાનો કાર્યભાર સમેટીને સ્વદેશ પાછા ફરવા માટે એક મહિનાનો સમય આપવામાં આવ્યો છે.
કયા-કયા દેશોના રાજદૂતોને પાછા બોલાવાયા?
વિદેશ મંત્રાલયના પ્રવક્તા લોક-બહાદુર છેત્રીના જણાવ્યા અનુસાર, કેબિનેટની બેઠકમાં લેવાયેલા આ નિર્ણયથી રાજદ્વારી વર્તુળોમાં હલચલ મચી ગઈ છે. જે દેશોમાંથી રાજદૂતોને પાછા બોલાવવામાં આવ્યા છે તેમાં નીચેના દેશોનો સમાવેશ થાય છે:
ભારત
ઓસ્ટ્રેલિયા
શ્રીલંકા
ડેન્માર્ક
સાઉથ કોરિયા
સાઉથ આફ્રિકા
કોણ-કોણ પાછું ફરશે કાઠમંડુ?
સરકારના આ આદેશને પગલે ભારતમાં નેપાળના રાજદૂત શંકરપ્રસાદ શર્મા, ઓસ્ટ્રેલિયામાં ચિત્રલેખા યાદવ, ડેન્માર્કમાં સુમ્મનીમા તુલાધર, શ્રીલંકામાં પૂર્ણબહાદુર નેપાળી, સાઉથ કોરિયામાં શિવમય તુમ્લીહન્દે અને સાઉથ આફ્રિકામાં ડુવિલમન શ્રેષ્ઠને કાઠમંડુ પરત ફરવું પડશે. આ તમામ રાજદૂતોને સ્વદેશ પરત આવવા માટે 1 મહિનાની નોટિસ આપવામાં આવી છે.
આ પહેલા પણ બની છે આવી ઘટના
નેપાળના રાજકારણમાં આ પ્રકારની ઘટના પહેલીવાર નથી બની. આ પહેલા જ્યારે ચીન તરફી વલણ ધરાવતા કે.પી. શર્મા ઓલીને જન આંદોલનને કારણે વડાપ્રધાન પદ છોડવું પડ્યું હતું, ત્યારે આવેલી સુશીલા કાર્કીની વચગાળાની સરકારે પણ ઓલી દ્વારા નિયુક્ત કરાયેલા 17 રાજદૂતોમાંથી 11 ને પાછા બોલાવી લીધા હતા.
ઓલી સરકારના પતન બાદ આવેલી વચગાળાની સરકાર અને ત્યારબાદ ચૂંટણી પછી બનેલી બાલેનની નવી સરકાર નેપાળના સમગ્ર વહીવટી તંત્રમાં મોટા પાયે ફેરફાર કરી રહી છે. રાજદૂતોને પરત બોલાવવાનો આ નિર્ણય એ જ શૃંખલાનો એક ભાગ માનવામાં આવે છે, જે દર્શાવે છે કે નવી સરકાર પોતાની વિદેશ નીતિ અને રાજદ્વારી સંબંધોને નવેસરથી ગોઠવવા માંગે છે.
