બન્ને બાળકોના સેમ્પલ તપાસ માટે મોકલાયા, હોસ્પિટલમાં આઈસોલેશન વોર્ડની તૈયારી : ચોમાસા વચ્ચે આરોગ્ય વિભાગ સતર્ક, વાલીઓને લક્ષણો દેખાય તો તાત્કાલિક સારવાર લેવા અપીલ
ગાંધીનગર, શનિવાર : ગાંધીનગરની સિવિલ હોસ્પિટલમાં ચાંદીપુરા વાયરસના બે શંકાસ્પદ બાળ દર્દીઓ દાખલ થતાં આરોગ્ય વિભાગમાં ચિંતાનો માહોલ સર્જાયો છે. બંને બાળકોમાં વાયરસ જેવા પ્રાથમિક લક્ષણો જોવા મળતાં તબીબોએ તાત્કાલિક સારવાર શરૂ કરી છે અને તેમની સ્થિતિ પર સતત નજર રાખવામાં આવી રહી છે.
હોસ્પિટલમાંથી મળતી માહિતી અનુસાર, દાખલ કરાયેલા બંને બાળકો પૈકી એક સાબરકાંઠા જિલ્લાનો જ્યારે બીજો ખેડા જિલ્લાનો રહેવાસી છે. તેમની ઉંમર અંદાજે એક વર્ષ અને ચાર વર્ષ હોવાનું જાણવા મળ્યું છે. બંનેના બ્લડ સેમ્પલ લેબોરેટરીમાં તપાસ માટે મોકલવામાં આવ્યા છે અને આગામી 24 કલાકમાં રિપોર્ટ મળવાની શક્યતા વ્યક્ત કરવામાં આવી રહી છે.
તબીબોના જણાવ્યા મુજબ, એક બાળકની તબિયત હાલ સ્થિર છે અને તેની સારવાર સામાન્ય દેખરેખ હેઠળ ચાલી રહી છે. જોકે બીજા બાળકની સ્થિતિ ગંભીર હોવાથી તેને વેન્ટિલેટર સપોર્ટ પર રાખીને નિષ્ણાત ડૉક્ટરો દ્વારા સતત સારવાર આપવામાં આવી રહી છે.
આ ઘટનાને પગલે ગાંધીનગર સિવિલ હોસ્પિટલને હાઈ એલર્ટ પર રાખવામાં આવી છે. સંભવિત સંક્રમણને ધ્યાનમાં રાખીને હોસ્પિટલમાં ખાસ ચાંદીપુરા વાયરસ આઈસોલેશન વોર્ડ તૈયાર કરવાની પ્રક્રિયા શરૂ કરવામાં આવી છે. સાથે જ બાળરોગ નિષ્ણાતો, તબીબો અને અનુભવી નર્સિંગ સ્ટાફની વિશેષ ટીમોને 24 કલાક માટે તહેનાત કરવામાં આવી છે.
દર વર્ષે ચોમાસાની ઋતુ દરમિયાન ચાંદીપુરા વાયરસના કેસોમાં વધારો જોવા મળે છે. ખાસ કરીને સાબરકાંઠા અને અરવલ્લીના ગ્રામ્ય વિસ્તારોમાં અગાઉ પણ અનેક કેસ નોંધાઈ ચૂક્યા છે. આ ઉપરાંત ખેડા, પંચમહાલ, મહીસાગર અને બનાસકાંઠાના કેટલાક વિસ્તારોમાં પણ આરોગ્ય વિભાગે વિશેષ સતર્કતા રાખવાનું શરૂ કર્યું છે.
આરોગ્ય નિષ્ણાતોના જણાવ્યા અનુસાર ચાંદીપુરા વાયરસ મુખ્યત્વે સેન્ડફ્લાય (રેતાળ માખી)ના કરડવાથી ફેલાય છે. કાચા મકાનો, ભેજવાળા વિસ્તારો અને દીવાલોની તિરાડોમાં આ માખી વધુ પ્રમાણમાં જોવા મળે છે. વાયરસ સીધી મગજ પર અસર કરતો હોવાથી ખાસ કરીને 14 વર્ષથી ઓછી ઉંમરના બાળકો માટે જોખમકારક માનવામાં આવે છે.
બાળકને અચાનક ઊંચો તાવ આવવો, સતત ઉલ્ટી થવી, શરીરમાં ખેંચ આવવી અથવા બેભાન જેવી સ્થિતિ સર્જાય તો તેને સામાન્ય તાવ સમજી અવગણવો નહીં. આવા લક્ષણો દેખાય તો તાત્કાલિક નજીકની સરકારી હોસ્પિટલ અથવા આરોગ્ય કેન્દ્રમાં લઈ જઈ સારવાર શરૂ કરાવવી જોઈએ.
આરોગ્ય વિભાગે લોકોને ઘરની આસપાસ સ્વચ્છતા જાળવવા, જંતુનાશક દવાઓનો છંટકાવ કરાવવા, ભેજ અને ગંદકી દૂર રાખવા તેમજ બાળકોને માખી અને જંતુઓના સંપર્કથી બચાવવા અપીલ કરી છે. રિપોર્ટ આવ્યા બાદ જ બંને બાળકોમાં ચાંદીપુરા વાયરસની સત્તાવાર પુષ્ટિ થશે.
