દિવાળીના તહેવારમાં નાના વેપારીઓને ટાર્ગેટ કરતી નવી મોડ્સ ઓપરેન્ડી સામે આવી છે. PhonePe અને Paytm જેવી એપની નકલી એપ્લીકેશન દ્વારા QR કોડ સ્કેન કરીને પેમેન્ટના ખોટા સ્ક્રીનશોટ બતાવીને ફ્રોડ કરવામાં આવી રહ્યો છે. સાયબર ક્રાઇમ સેલે વેપારીઓને સાઉન્ડ બોક્સનો ઉપયોગ કરવાની અને સતર્ક રહેવાની સલાહ આપી છે.
અમદાવાદ, સોમવાર
તહેવારોની સિઝનમાં ભીડનો ફાયદો ઉઠાવીને છેતરપિંડી કરતી ગેંગ દ્વારા એક નવી મોડ્સ ઓપરેન્ડી શરૂ કરવામાં આવી છે. આ કૌભાંડમાં ખાસ કરીને ફટાકડા કે મીઠાઈની દુકાનના નાના વેપારીઓને ટાર્ગેટ કરવામાં આવી રહ્યા છે, જ્યાં રોકડ અને ઓનલાઈન પેમેન્ટનો ટ્રાફિક ખૂબ જ વધારે હોય છે.
નકલી એપ દ્વારા QR Code Fraud
છેતરપિંડી કરનારા લોકો હવે PhonePe અને Paytm જેવી લોકપ્રિય પેમેન્ટ એપ્સની બનાવટી એટલે કે ફેક એપ્લીકેશનનો ઉપયોગ કરી રહ્યા છે. જ્યારે ગ્રાહક તરીકે કોઈ વ્યક્તિ વસ્તુ ખરીદે છે, ત્યારે તેઓ વેપારીના QR કોડને સ્કેન કરે છે. નકલી એપમાં QR કોડ સ્કેન કર્યા બાદ, તેઓ વેપારીને પેમેન્ટ સફળ થયાનો એક બનાવટી સ્ક્રીનશોટ અથવા મેસેજ બતાવે છે. આ મેસેજ એટલો હૂબહૂ હોય છે કે તેમાં વેપારીની બેંકનો UPI ID પણ જોવા મળે છે. જેના કારણે વેપારીને તરત જ વિશ્વાસ આવી જાય છે કે નાણાં તેના એકાઉન્ટમાં આવી ગયા છે.
હકીકત શું છે?
સાયબર ક્રાઇમના અધિકારીઓના જણાવ્યા અનુસાર, આ માત્ર એક સ્ક્રીન પર દેખાતો બનાવટી મેસેજ હોય છે. હકીકતમાં, વેપારીના બેંક એકાઉન્ટમાં એક પણ રૂપિયો જમા થતો નથી. ગેંગ ભીડનો લાભ લઈને વેપારીને છેતરીને ત્યાંથી નીકળી જાય છે.
સાયબર ક્રાઇમની વેપારીઓને ખાસ સૂચના
આ ગંભીર મામલે સાયબર ક્રાઇમ સેલના એસીપીએ ખાસ કરીને નાના વેપારીઓને સતર્ક રહેવાની સૂચના આપી છે. તેમણે જણાવ્યું કે, આ પ્રકારની છેતરપિંડીમાં નાની રકમનું ફ્રોડ થવાની શક્યતા વધારે છે, પણ તેનો વ્યાપ મોટો હોઈ શકે છે.
વેપારીઓને સલાહ આપવામાં આવે છે કે
* સાઉન્ડ બોક્સનો ઉપયોગ કરો: નાણાં મળ્યાની ખાતરી કરવા માટે સાઉન્ડ બોક્સ’ પર મેસેજ અપડેટ થયા બાદ જ વસ્તુ ગ્રાહકને આપો.
* બેંક બેલેન્સ ચેક કરો: માત્ર મેસેજ પર નહીં, પરંતુ શક્ય હોય તો તરત જ પોતાનું બેંક બેલેન્સ અથવા પેમેન્ટ એપ્લિકેશનનું બેલેન્સ ચેક કરીને કન્ફર્મ કરો.
* શંકાસ્પદ વ્યવહારની જાણ કરો: જો કોઈ વ્યવહાર શંકાસ્પદ લાગે, તો તરત જ નજીકના પોલીસ સ્ટેશન અથવા સાયબર ક્રાઇમ સેલનો સંપર્ક કરો.
હાલમાં, સાયબર ક્રાઇમ સેલ દ્વારા આ સમગ્ર ફ્રોડ રેકેટ અંગે તપાસના ચક્રો ગતિમાન કરવામાં આવ્યા છે. વેપારીઓએ દિવાળીના તહેવારમાં આ પ્રકારની નવી મોડ્સ ઓપરેન્ડી થી ખાસ સાવચેત રહેવાની જરૂર છે.
