ગુજરાત UCCને રાષ્ટ્રપતિની મંજૂરી મળી. લગ્ન, છૂટાછેડા, વારસા અને લિવ-ઇન અંગે સમાન નિયમો લાગુ થશે, અનુસૂચિત જનજાતિઓ બાકાત.
ગુજરાતમાં યુનિફોર્મ સિવિલ કોડ (UCC) લાગુ કરવાનો માર્ગ મોકળો થયો છે. રાષ્ટ્રપતિએ આ કાયદાને મંજૂરી આપી છે. આ ખરડો 24 માર્ચે સાત કલાકથી વધુની ચર્ચા બાદ વિધાનસભામાં પસાર થયો હતો, અને ઉત્તરાખંડ પછી યુસીસી પસાર કરનાર ગુજરાત બીજું રાજ્ય બન્યું હતું.
કયા વિષયો પર નવા નિયમો?
આ કાયદો લગ્ન, છૂટાછેડા, વારસા અને લિવ-ઇન સંબંધો માટે સમાન કાનૂની માળખું આપે છે, અને અનુસૂચિત જનજાતિઓ તથા બંધારણીય રીતે સુરક્ષિત કેટલાક જૂથો સિવાય ગુજરાતના તમામ રહેવાસીઓને લાગુ પડે છે. આ કોડ રાજ્યની બહાર રહેતા ગુજરાતના રહેવાસીઓને પણ લાગુ પડશે.
મુખ્યમંત્રીએ ગણાવી મુખ્ય જોગવાઈઓ
મુખ્યમંત્રી ભૂપેન્દ્ર પટેલના જણાવ્યા મુજબ લગ્નની ફરજિયાત નોંધણી, લિવ-ઇન સંબંધોની નોંધણી, છૂટાછેડા માટે સમાન નિયમો, પુત્ર અને પુત્રી માટે સમાન વારસા હક અને નિયમોનું પાલન ન કરનારા માટે દંડની જોગવાઈ આ કાયદાની મુખ્ય બાબતો છે.
