ટીમ ઈન્ડિયાથી બહાર ચાલી રહેલા હાર્દિકને હવે સૈયદ મુશ્તાક અલી ટ્રોફી માટે બરોડાની ટીમમાં પણ સ્થાન મળ્યું નથી. ટૂર્નામેન્ટ 14 નવેમ્બરથી શરૂ થવાની છે.
ભારતીય ક્રિકેટ ટીમના સ્ટાર ઓલરાઉન્ડર હાર્દિક પંડ્યાની વાપસીની રાહ લાંબી થઈ શકે છે. ટીમ ઈન્ડિયાથી બહાર ચાલી રહેલા હાર્દિકને હવે સૈયદ મુશ્તાક અલી ટ્રોફી માટે બરોડાની ટીમમાં પણ સ્થાન મળ્યું નથી. આ ટૂર્નામેન્ટ 14 નવેમ્બરથી શરૂ થવાની છે.
હાર્દિકના ભાઈ કૃણાલ પંડ્યાને બરોડા ટીમની કમાન સોંપવામાં આવી છે. અગાઉ એવી અટકળો હતી કે હાર્દિક આ ટૂર્નામેન્ટ દ્વારા મેદાન પર વાપસી કરી શકે છે. જોકે, ટીમની જાહેરાત બાદ આ આશાઓ પર હાલ પૂરતું પાણી ફરી વળ્યું છે.
પગની ઈજાને કારણે હાર્દિક રિહેબ પ્રક્રિયામાં
હાર્દિક પંડ્યા હાલમાં પગની ઈજામાંથી બહાર આવવા માટે રિહેબ પ્રક્રિયામાંથી પસાર થઈ રહ્યો છે. તેની ફિટનેસ અંગે હજુ સુધી કોઈ સ્પષ્ટ અપડેટ સામે આવ્યું નથી.
હાર્દિકે IPL 2026 બાદ કોઈ વ્યાવસાયિક ક્રિકેટ મેચ રમી નથી. ઓક્ટોબરમાં ઓસ્ટ્રેલિયા A સામેની વનડે સિરીઝ માટે તેની ઈન્ડિયા A ટીમમાં પસંદગી થઈ હતી. જોકે, ઈજાના કારણે સિરીઝ શરૂ થાય તે પહેલાં જ તેને ટીમમાંથી બહાર થવું પડ્યું હતું.
બરોડાની ટીમમાં જીતેશ શર્મા અને દીપક હુડ્ડાનો સમાવેશ
સૈયદ મુશ્તાક અલી ટ્રોફી માટે બરોડાની ટીમમાં ઘણા જાણીતા ખેલાડીઓને સ્થાન મળ્યું છે. કૃણાલ પંડ્યા ટીમનું નેતૃત્વ કરશે, જ્યારે અતીત શેઠને ઉપકેપ્ટન બનાવવામાં આવ્યા છે.
ટીમમાં જીતેશ શર્મા, દીપક હુડ્ડા અને રસિક સલામ ડાર જેવા ખેલાડીઓનો પણ સમાવેશ કરવામાં આવ્યો છે.
સૈયદ મુશ્તાક અલી ટ્રોફી માટે બરોડાની ટીમ:
-
કૃણાલ પંડ્યા (કેપ્ટન)
-
અતીત શેઠ (ઉપકેપ્ટન)
-
દીપક હુડ્ડા
-
શિવાલિક શર્મા
-
શાશ્વત રાવત
-
અમિત પાસી (વિકેટકીપર)
-
જીતેશ શર્મા (વિકેટકીપર)
-
ભાનુ પનિયા
-
મહેશ પિઠિયા
-
પરીક્ષિત પાટીદાર
-
હેમંત પુંડે
-
રાજ લિમ્બાણી
-
રસિક ડાર
-
ધ્રુવ બી. પટેલ
-
સફવાન પટેલ
શુભમન ગિલે હાર્દિકની વાપસી અંગે શું કહ્યું?
ભારતીય ટીમના કેપ્ટન શુભમન ગિલ પણ હાર્દિક પંડ્યાની વાપસી અંગે નિવેદન આપી ચૂક્યા છે. તેમના મતે હાર્દિકની વાપસીથી ટીમનું લોઅર મિડલ ઓર્ડર વધુ મજબૂત બનશે. તેની સાથે બોલિંગમાં પણ ટીમને મોટો ફાયદો થશે.
જોકે, ટીમમાં પાછા ફરતાં પહેલાં હાર્દિકે ઘરેલુ ક્રિકેટ રમીને પોતાની મેચ ફિટનેસ સાબિત કરવી પડશે. 2027ના વનડે વર્લ્ડ કપને ધ્યાનમાં રાખતાં હાર્દિકની ફિટનેસ ભારતીય ટીમ માટે મહત્વની બની રહેશે.
