આ અકસ્માતમાં મૃતકના પત્ની, ભાવનાબેન વિજયભાઈ જગેટીયા, અને પરિવારના અન્ય સદસ્ય સોનલબેન જગેટીયાને પણ ઈજા થઈ હતી. મૃતકના પત્ની ભાવનાબેન, માતા મંજુબેન મનોહરભાઈ જગેટીયા, પિતા મનોહરભાઈ ચુનીલાલ જગેટીયા, તેમજ ઈજા પામનાર ભાવનાબેન અને સોનલબેન જગેટીયાએ ગાંધીનગર ડિસ્ટ્રિક્ટ કોર્ટમાં વળતરનો દાવો કર્યો હતો.
ગાંધીનગર, શનિવાર
ગુજરાત હાઈકોર્ટના માર્ગદર્શન હેઠળ ડિસ્ટ્રિક્ટ લીગલ સર્વિસીસ ઓથોરિટી, ગાંધીનગર દ્વારા આયોજિત નેશનલ લોક અદાલતમાં એક ઐતિહાસિક અને પ્રેરણાદાયક નિર્ણય લેવામાં આવ્યો છે. લિંબડિયા કેનાલ બ્રિજ પાસે સાત મહિના પહેલા એક કાર અકસ્માતમાં મૃત્યુ પામેલા યુવકના પરિવારને 1.15 કરોડનું જંગી વળતર ચૂકવવામાં આવ્યું છે, જે મનુષ્ય જીવનના મૂલ્યને ફરી એકવાર રેખાંકિત કરે છે.
લોક અદાલત બની ઝડપી ન્યાયનો માર્ગ
વાહન અકસ્માતના આવા કેસોના નિકાલ માટે શનિવારે ગાંધીનગર સહિત દેશભરમાં રાષ્ટ્રીય લોક અદાલતનું આયોજન કરવામાં આવ્યું હતું. આ લોક અદાલતમાં જ વર્ષ 2024માં લિંબડિયા કેનાલ બ્રિજ પાસે ઊભેલી ટ્રકમાં કાર ઘૂસી જતાં 35 વર્ષીય વિજય જગેટીયાનું મૃત્યુ થયું હતું તે કેસ હાથ પર લેવામાં આવ્યો.
આ કેસમાં લોક અદાલતમાં બંને પક્ષો વચ્ચે સફળ સમાધાન થયું હતું. કેસના નિકાલના ભાગ રૂપે, મૃતક વિજય જગેટીયાના પરિવારને હાઈકોર્ટ જસ્ટિસના હસ્તે 1.15 કરોડના વળતરનો ચેક આપવામાં આવ્યો, જે પરિવારે ગુમાવેલા જીવની ખોટને કોઈ પણ રીતે ભરપાઈ ન કરી શકે, પરંતુ આર્થિક રીતે તેમને ટેકો પૂરો પાડી શકે.
દુર્ઘટનાની વિગતો અને પરિવારનો સંઘર્ષ
વસ્ત્રાલ, સૂર્યોની સ્કાયમાં રહેતા વિજયભાઈ જગેટીયા મારુતિ ઇનોક્સ (ઇન્ડિયા) પ્રાઇવેટ લિમિટેડમાં મેનેજર તરીકે કામ કરતા હતા અને તેમનો માસિક પગાર અંદાજે 72,000 હતો. તા. 07/12/2024 ના રોજ આશરે રાત્રે 11:00 વાગ્યાના સુમારે મોટા ચિલોડાથી અમદાવાદ જતાં લિંબડિયા કેનાલ બ્રિજ પાસે રોડની બાજુમાં ઊભેલી આઈવા ટ્રકની પાછળ તેમની અર્ટિગા કાર ઘૂસી ગઈ હતી. આ ગમખ્વાર અકસ્માતમાં વિજયભાઈ જગેટીયાનું ઘટનાસ્થળે જ મૃત્યુ થયું હતું.
આ અકસ્માતમાં મૃતકના પત્ની, ભાવનાબેન વિજયભાઈ જગેટીયા, અને પરિવારના અન્ય સદસ્ય સોનલબેન જગેટીયાને પણ ઈજા થઈ હતી. મૃતકના પત્ની ભાવનાબેન, માતા મંજુબેન મનોહરભાઈ જગેટીયા, પિતા મનોહરભાઈ ચુનીલાલ જગેટીયા, તેમજ ઈજા પામનાર ભાવનાબેન અને સોનલબેન જગેટીયાએ ગાંધીનગર ડિસ્ટ્રિક્ટ કોર્ટમાં વળતરનો દાવો કર્યો હતો.
ત્યારબાદ આ કેસ લોક અદાલતમાં મૂકવામાં આવ્યો હતો. બંને પક્ષકારોની સંમતિથી, મૃતક વિજયભાઈ જગેટીયાના પરિવારને 1.15 કરોડ, ઈજા પામનાર સોનલબેનને 17,30,000, અને ઈજા પામનાર ભાવનાબેનને 5,50,000નું વળતર આપવામાં આવ્યું છે.
આ કેસમાં અરજદારના વકીલ હર્ષિલ બી. શાહ અને ટાટા એ.આઈ.જી. જનરલ ઇન્સ્યોરન્સ કંપનીના વકીલ તરીકે આશુતોષભાઈ દવે ઉપસ્થિત રહ્યા હતા. આ ઉપરાંત, ઇન્સ્યોરન્સ કંપનીના ઓફિસર અને ડિસ્ટ્રિક્ટ જજ પણ આ ક્ષણે હાજર રહ્યા હતા.
