ICICI બેંકે ગ્રાહકોના પ્રતિસાદ બાદ મિનિમમ બેલેન્સના નિયમોમાં મોટો ફેરફાર કર્યો છે. હવે મેટ્રો, અર્ધ-શહેરી અને ગ્રામીણ વિસ્તારો માટે ન્યૂનતમ બેલેન્સની રકમ ઘટાડવામાં આવી છે. નવા નિયમો અને પેનલ્ટીની સંપૂર્ણ માહિતી અહીં જાણો.
અમદાવાદ, ગુરૂવાર
પ્રાઇવેટ સેક્ટરની અગ્રણી બેંક ICICIએ પોતાના ગ્રાહકો માટે એક મહત્વપૂર્ણ જાહેરાત કરી છે. બેંકે તેના સેવિંગ્સ એકાઉન્ટના મિનિમમ બેલેન્સના નિયમોમાં ફેરફાર કર્યો છે. ગ્રાહકોના પ્રતિસાદને ધ્યાનમાં રાખીને, બેંકે મેટ્રો અને અર્ધ-શહેરી વિસ્તારો માટે અગાઉ પ્રસ્તાવિત 50,000 અને 25,000ની રકમને ઘટાડીને અનુક્રમે 15,000 અને 7,500 કરી છે. આ ઉપરાંત, ગ્રામીણ વિસ્તારો માટે ન્યૂનતમ બેલેન્સ હવે 2,500 નક્કી કરવામાં આવ્યું છે.
આ ફેરફાર ગ્રાહકોની અપેક્ષાઓ અને પ્રાથમિકતાઓને વધુ સારી રીતે ધ્યાનમાં લેવા માટે કરવામાં આવ્યો છે. ગયા અઠવાડિયે જ્યારે બેંકે મિનિમમ બેલેન્સની રકમમાં વધારો કરવાનો પ્રસ્તાવ મૂક્યો હતો, ત્યારે ઘણા ગ્રાહકોએ સોશિયલ મીડિયા પર નારાજગી વ્યક્ત કરી હતી. આ પ્રતિસાદ પછી બેંકે પોતાના નિર્ણય પર ફરીથી વિચાર કર્યો અને નવા, વધુ સુલભ નિયમો જાહેર કર્યા છે.
નવા નિયમો અને પેનલ્ટીની વિગતો
નવા નિયમો અનુસાર, જો કોઈ ગ્રાહક તેના એકાઉન્ટમાં નિર્ધારિત મિનિમમ બેલેન્સ જાળવી શકશે નહીં, તો તેને પેનલ્ટી ભરવી પડશે. આ પેનલ્ટી શોર્ટફોલની 6% અથવા 500 બેમાંથી જે ઓછું હોય હશે.
આ એકાઉન્ટ્સ પર લાગુ નહીં થાય નવા નિયમો
ICICI બેંકે સ્પષ્ટ કર્યું છે કે આ નવા નિયમો કેટલાક વિશેષ પ્રકારના એકાઉન્ટ્સ પર લાગુ થશે નહીં. આ યાદીમાં સેલરી એકાઉન્ટ, સિનિયર સિટીઝન અને પેન્શનધારકોના એકાઉન્ટ, બેઝિક સેવિંગ્સ બેંક ડિપોઝિટ એકાઉન્ટ, જન ધન એકાઉન્ટ અને વિશેષ જરૂરિયાતવાળા એકાઉન્ટ્સનો સમાવેશ થાય છે. આ ઉપરાંત 60 વર્ષથી ઓછી ઉંમરના પેન્શનધારકો અને 1,200 પસંદગીના સંસ્થાના વિદ્યાર્થીઓને પણ મિનિમમ બેલેન્સની શરતમાંથી મુક્તિ આપવામાં આવી છે. આ ફેરફારથી બેંકના ગ્રાહકોને મોટી રાહત મળશે, કારણ કે હવે તેમને તેમના એકાઉન્ટમાં વધુ પડતી રકમ જાળવી રાખવાની જરૂરિયાત રહેશે નહીં.
