છત્તીસગઢના બીજાપુર જિલ્લામાં નક્સલવાદીઓએ કરેલા IED બ્લાસ્ટમાં ડિસ્ટ્રિક્ટ રિઝર્વ ગાર્ડ (DRG)ના એક જવાન શહીદ થયા છે અને ત્રણ જવાન ઈજાગ્રસ્ત થયા છે. સુરક્ષા દળોએ વિસ્તારને કોર્ડન કરી સર્ચ ઓપરેશન શરૂ કર્યું છે.
છત્તીસગઢ, સોમવાર
છત્તીસગઢના બીજાપુર જિલ્લામાં નક્સલવાદીઓએ ફરી એકવાર સુરક્ષા દળોને નિશાન બનાવ્યા છે. ઇન્દ્રાવતી નેશનલ પાર્ક પાસે થયેલા એક મોટા IED બ્લાસ્ટમાં ડિસ્ટ્રિક્ટ રિઝર્વ ગાર્ડ (DRG)ના એક બહાદુર જવાન શહીદ થયા છે, જ્યારે અન્ય ત્રણ જવાનો ગંભીર રીતે ઈજાગ્રસ્ત થયા છે. આ ઘટના આજે સવારે બની હતી.
મળતી માહિતી મુજબ, DRG અને રાજ્ય પોલીસની ટીમે નક્સલવાદીઓ વિરુદ્ધ સંયુક્ત ઓપરેશન હાથ ધર્યું હતું. આ ઓપરેશન દરમિયાન, નક્સલવાદીઓએ રસ્તામાં એક શક્તિશાળી ઇમ્પ્રુવાઇઝ્ડ એક્સપ્લોઝિવ ડિવાઇસ (IED) પ્લાન્ટ કરી હતી. જ્યારે સુરક્ષા દળોની ટીમ આ વિસ્તારમાંથી પસાર થઈ રહી હતી, ત્યારે જ આ વિસ્ફોટ થયો.
આ દુર્ભાગ્યપૂર્ણ ઘટનામાં, DRGના જવાન દિનેશ નાગ શહીદ થયા છે. જ્યારે ઈજાગ્રસ્ત થયેલા ત્રણ જવાનોને તાત્કાલિક મેડિકલ હેલ્પ માટે નજીકની હોસ્પિટલમાં ખસેડવામાં આવ્યા છે. આ ઘટના બાદ સુરક્ષા દળોએ સમગ્ર વિસ્તારને કોર્ડન કરી લીધો છે અને નક્સલવાદીઓ વિરુદ્ધ સર્ચ ઓપરેશન વધુ ઝડપી બનાવ્યું છે. આ હુમલાએ ફરી એકવાર આ વિસ્તારમાં નક્સલવાદી પ્રવૃત્તિઓની ગંભીરતાનો અહેસાસ કરાવ્યો છે.
