બનાસકાંઠામાં મેઘતાંડવ વચ્ચે દિયોદરમાં 8.39 ઈંચ અને ભાભરમાં 7.87 ઈંચ વરસાદ ખાબક્યો છે. ખેતરો જળમગ્ન થતા પાકને નુકસાનની ભીતિ છે અને તંત્ર દ્વારા શાળાઓ-કોલેજોમાં રજા જાહેર કરવામાં આવી છે.
દક્ષિણ ગુજરાત બાદ હવે મેઘરાજાએ ઉત્તર ગુજરાત પર પોતાની કૃપા વરસાવી છે. ખાસ કરીને બનાસકાંઠાના વાવ-થરાદ પંથકમાં આજે મેઘરાજાએ સાંબેલાધાર બેટિંગ કરતા જનજીવન અસ્તવ્યસ્ત થઈ ગયું છે. આજે સવારે 6 થી રાત્રે 8 વાગ્યા સુધીમાં વરસેલા ભારે વરસાદના કારણે સમગ્ર પંથક જળબંબાકાર થયો છે.
વરસાદના આંકડા: દિયોદર અને ભાભરમાં જળબંબાકાર
આજે વરસેલા આંકડા પર નજર કરીએ તો:
-
દિયોદર: 213 મી.મી. (8.39 ઈંચ)
-
ભાભર: 200 મી.મી. (7.87 ઈંચ)
-
સુઈગામ: 101 મી.મી. (3.98 ઈંચ)
-
થરાદ: 69 મી.મી. (2.72 ઈંચ)
-
વાવ: 42 મી.મી. (1.65 ઈંચ) આ ઉપરાંત લાખાણી, ધરણીધર અને રાહ પંથકમાં પણ નોંધપાત્ર વરસાદ વરસ્યો છે.
ખેડૂતોની ચિંતા વધી: પાક નિષ્ફળ જવાની ભીતિ
દિયોદરના ખેતરોમાં પાણી ભરાઈ જવાથી મગફળી, જુવાર અને એરંડા જેવા તૈયાર પાક પાણીમાં ગરકાવ થઈ ગયા છે. ખેતરો બેટમાં ફેરવાઈ જતાં ખેડૂતોને પોતાના ઉભા પાકને થયેલા નુકસાનની મોટી ભીતિ સેવાઈ રહી છે. બીજી તરફ, દિયોદરના આદર્શનગર, કર્મચારીનગર અને અંબિકાનગર જેવી સોસાયટીઓમાં ઘરોમાં પાણી ઘૂસી જતાં લોકો ભારે મુશ્કેલીમાં મુકાયા છે. તંત્ર દ્વારા લક્ષ્મીપુરામાંથી ફસાયેલા 50 લોકોને સફળતાપૂર્વક રેસ્ક્યુ કરવામાં આવ્યા છે.
વેપારીઓની દોડધામ અને તંત્રના આદેશ
ભાભરના મુખ્ય બજારો જેવા કે લાટી બજાર, સોની બજાર અને મેઈન માર્કેટમાં પાણી ભરાઈ ગયા છે. દુકાનોમાં માલસામાનને પલળતો બચાવવા વેપારીઓએ ભારે દોડધામ કરી હતી. સ્થિતિની ગંભીરતાને જોતા જિલ્લા વહીવટી તંત્ર દ્વારા સુરક્ષાના ભાગરૂપે આવતીકાલે તમામ શાળાઓ અને કોલેજોમાં રજા જાહેર કરવામાં આવી છે.
