એપ્રિલ 2025માં થયેલા પહલગામ આતંકી હુમલામાં NIA એ મોટી કાર્યવાહી કરી છે. પાકિસ્તાનમાં બેઠેલા આતંકી હાફિઝ સઈદ વિરુદ્ધ ચાર્જશીટ દાખલ કરી પાકિસ્તાનનું મોટું કાવતરું ખુલ્લું પાડ્યું છે.
નવી દિલ્હી, સોમવાર
જમ્મુ-કાશ્મીરના પહલગામમાં થયેલા ભયાનક આતંકી હુમલા મામલે રાષ્ટ્રીય તપાસ એજન્સી (NIA) એ એક મોટી કાર્યવાહી કરી છે. તપાસ એજન્સીએ પાકિસ્તાનમાં છુપાઈને બેઠેલા આતંકી અને લશ્કર-એ-તૈયબા (LeT) ના વડા હાફિઝ સઈદ વિરુદ્ધ કોર્ટમાં નવી ચાર્જશીટ દાખલ કરી દીધી છે. આ ચાર્જશીટ મારફતે NIA એ પાકિસ્તાનના નાપાક ઇરાદા અને સરહદ પારથી ચાલતા આતંકવાદી નેટવર્કની આખી પોલ ખોલી નાખી છે.
26 નિર્દોષ લોકોએ ગુમાવ્યો હતો જીવ
આખો મામલો 22 એપ્રિલ, 2025 ના રોજ પહલગામમાં થયેલા ગોઝારા આતંકી હુમલા સાથે જોડાયેલો છે. આ કાયરતાપૂર્ણ હુમલામાં 25 પ્રવાસીઓ અને 1 સ્થાનિક નાગરિક એમ કુલ 26 નિર્દોષ લોકોના મોત થયા હતા. આ હુમલાનું આખું પ્લાનિંગ પાકિસ્તાનમાં બેસીને કરવામાં આવ્યું હતું, જેમાં લશ્કર-એ-તૈયબા અને તેના પ્રોક્સી સંગઠન ‘ધ રેઝિસ્ટન્સ ફ્રન્ટ’ (TRF) નો સીધો હાથ હોવાનું સામે આવ્યું છે.
ભારત વિરુદ્ધ યુદ્ધ છેડવાનો ગંભીર આરોપ
NIA ની તપાસ મુજબ, હાફિઝ સઈદ પર વ્યક્તિગત રીતે અને આતંકી સંગઠનોના વડા તરીકે ગુનો નોંધવામાં આવ્યો છે. એજન્સીએ આ ખુંખાર આતંકી પર નવા કાયદા ભારતીય ન્યાય સંહિતા (BNS)-2023 અને કડક આતંકવાદ વિરોધી કાયદા UAPA-1967 ની ગંભીર કલમો લગાવી છે. તેના પર સ્પષ્ટ આરોપ છે કે તેણે સરહદ પારથી કાવતરું ઘડીને ભારત દેશ સામે યુદ્ધ છેડવાનો પ્રયાસ કર્યો છે.
ચાર્જશીટ અને તપાસમાં થયેલા મોટા ખુલાસા
NIA દ્વારા કોર્ટમાં રજૂ કરાયેલા મજબૂત પુરાવાઓ અને તપાસની મુખ્ય બાબતો નીચે મુજબ છે:
1597 પાનાનો દસ્તાવેજ: હાફિઝ સઈદ વિરુદ્ધ દાખલ કરાયેલી આ સપ્લીમેન્ટરી ચાર્જશીટ એ અગાઉ રજૂ કરાયેલી 1597 પાનાની મુખ્ય ચાર્જશીટનો જ એક ભાગ છે, જેમાં પાકિસ્તાની કાવતરાના પાકા પુરાવા છે.
હેન્ડલર સામે કાર્યવાહી: આ નવી ચાર્જશીટ અગાઉની તપાસને વધુ સચોટ બનાવે છે. અગાઉ પાકિસ્તાન સ્થિત આતંકી હેન્ડલર સાજિદ જટ્ટ વિરુદ્ધ પણ ચાર્જશીટ દાખલ કરવામાં આવી હતી.
ઓપરેશન મહાદેવ: જુલાઈ 2025 માં સુરક્ષા દળો દ્વારા ચલાવવામાં આવેલા ‘ઓપરેશન મહાદેવ’ દરમિયાન 3 આતંકીઓને ઠાર કરવામાં આવ્યા હતા. આ ઉપરાંત હાલમાં પકડાયેલા 2 અન્ય આરોપીઓ પર પણ આરોપો નક્કી કરી દેવામાં આવ્યા છે.
NIAની આ લેટેસ્ટ ચાર્જશીટથી એ વાત સાબિત થઈ ગઈ છે કે પહલગામ હુમલા પાછળ પાકિસ્તાન અને હાફિઝ સઈદનું જ ભેજું હતું. ભારત સરકાર અને સુરક્ષા એજન્સીઓ આતંકવાદ સામે ‘ઝીરો ટોલરન્સ’ ની નીતિ અપનાવીને ગુનેગારોને કાયદાકીય સકંજામાં લેવા માટે સતત કડક પગલાં ભરી રહી છે.
