લિન્ક્ડઇન પર વધી રહ્યું છે એઆઈ જનરેટેડ કન્ટેન્ટનું પ્રમાણ. પેનગ્રામના રિસર્ચમાં ચોંકાવનારો ખુલાસો થયો છે કે 40 ટકાથી વધુ પોસ્ટ એઆઈ દ્વારા લખાય છે.
આજના આધુનિક સમયમાં આર્ટિફિશ્યલ ઇન્ટેલિજન્સ (AI) નો ઉપયોગ દરેક ક્ષેત્રમાં અભૂતપૂર્વ ઝડપે વધી રહ્યો છે. ઓછા સમયમાં અને સચોટ પરિણામો સાથે ઉત્તરો આપવાની ક્ષમતાને કારણે ખાસ કરીને કન્ટેન્ટ રાઇટિંગમાં એઆઈનો વ્યાપક ઉપયોગ શરૂ થયો છે. સોશિયલ મીડિયા માટે ડિસ્ક્રિપ્શન લખવું હોય, કેપ્શન તૈયાર કરવા હોય કે આકર્ષક ઈમેજ જનરેટ કરવી હોય, દરેક કામમાં એઆઈ અગ્રેસર છે. આ બાબતે એઆઈ ડિટેક્શન ક્ષેત્રે કામ કરતા જાણીતા સ્ટાર્ટઅપ ‘પેનગ્રામ’ (Pangram) દ્વારા તાજેતરમાં એક મહત્વપૂર્ણ સંશોધન કરવામાં આવ્યું છે. આ રિસર્ચમાં બહાર આવ્યું છે કે પ્રોફેશનલ પ્લેટફોર્મ લિન્ક્ડઇન (LinkedIn) પર સૌથી વધુ એઆઈ જનરેટેડ પોસ્ટ મૂકવામાં આવે છે, જેમાં આશરે 40% થી વધુ પોસ્ટ માત્ર એઆઈની મદદથી જ લખાયેલી હોય છે.
પ્લેટફોર્મ પર કેવી રીતે થાય છે એઆઈનો ઉપયોગ?
આજકાલ માત્ર લિન્ક્ડઇન જ નહીં, પરંતુ લગભગ તમામ સોશિયલ મીડિયા પ્લેટફોર્મ પર આર્ટિફિશ્યલ ઇન્ટેલિજન્સની હાજરી નોંધપાત્ર રીતે મજબૂત થઈ છે. પેનગ્રામના અહેવાલ અનુસાર, લિન્ક્ડઇન પર એઆઈ દ્વારા તૈયાર કરાયેલા કન્ટેન્ટને વધુ વ્યવસ્થિત અને કુદરતી બનાવવા માટે લિન્ક્ડઇનના પોતાના જ ઇન-બિલ્ટ ટૂલ ‘એન્હાન્સ પોસ્ટ’ નો વ્યાપક ઉપયોગ થાય છે. સામાન્ય રીતે યૂઝર્સ બે અલગ-અલગ પદ્ધતિથી આ સુવિધાનો લાભ લે છે. કેટલાક લોકો પોસ્ટનું આખું કન્ટેન્ટ અને ગ્રાફિક્સ એઆઈ દ્વારા જ તૈયાર કરાવી લે છે, જ્યારે કેટલાક યૂઝર્સ પોતાના સામાન્ય કન્ટેન્ટને વધુ પ્રભાવશાળી અને આકર્ષક બનાવવા માટે આ ટેક્નોલોજીની મદદ લે છે.
લિન્ક્ડઇન આ રેસમાં કેમ સૌથી આગળ છે?
એક મોટો સવાલ એ થાય છે કે એઆઈના ઉપયોગની બાબતમાં લિન્ક્ડઇન શા માટે મોખરે છે? આ પાછળનું મુખ્ય કારણ લિન્ક્ડઇન પર ઉપલબ્ધ એઆઈ રાઇટિંગ આસિસ્ટન્ટ ટૂલ ‘એન્હાન્સ પોસ્ટ’ (Enhance Post) છે. આ ફીચરની મદદથી યૂઝર્સ માત્ર એક જ ક્લિકમાં લાંબી અને વ્યવસ્થિત લખાણવાળી પોસ્ટ તૈયાર કરી શકે છે. યૂઝર્સે માત્ર પોતાના વિચારો કે આઈડિયાઝ ટૂંકમાં ટાઈપ કરવાના રહે છે અને આ સ્માર્ટ ટૂલ તેના આધારે વિગતવાર પોસ્ટ બનાવી આપે છે. આનાથી મહેનત બચે છે અને ઓછા સમયમાં પ્રોફેશનલ ગુણવત્તાવાળું લખાણ મળી જાય છે.
વધતી સ્પર્ધા અને સતત કન્ટેન્ટ પોસ્ટ કરવાનું ભારે દબાણ
લિન્ક્ડઇન એક વ્યાવસાયિક અને નેટવર્કિંગ પ્લેટફોર્મ હોવાથી અહીં લોકો મોટેભાગે કારકિર્દી માર્ગદર્શન, લીડરશીપ અને પ્રેરણાદાયી વિચારો શેર કરતા હોય છે. આ પ્રકારનું કન્ટેન્ટ તૈયાર કરવું એઆઈ મોડલ્સ માટે અત્યંત સરળ હોય છે. આ ઉપરાંત, આજના સમયમાં લિન્ક્ડઇન પર પોતાની પહોંચ (Reach) અને વિઝિબિલિટી જાળવી રાખવા માટે વ્યક્તિઓ અને મોટી કંપનીઓ પર રોજ નવું કન્ટેન્ટ અપલોડ કરવાનું સતત દબાણ રહે છે. સંશોધનમાં જાણવા મળ્યું છે કે રોજ નવા વિચારો લાવવા મુશ્કેલ હોવાથી લોકો સમય બચાવવા માટે આવા આધુનિક ટૂલ્સ પર વધુ નિર્ભર બની રહ્યા છે. જોકે, આ બદલાતા સમયમાં યુઝર્સે પણ એ બાબત પ્રત્યે સજાગ રહેવું પડશે કે તેઓ જે પોસ્ટ પર ભરોસો મૂકી રહ્યા છે, તે ખરેખર કોઈ વાસ્તવિક વ્યક્તિના અનુભવો છે કે પછી એઆઈ દ્વારા જનરેટ કરાયેલું લખાણ છે.
