ગુજરાત સચિવાલયના 1000થી વધુ DySO કર્મચારીઓ 25 વર્ષની સેવા છતાં બઢતી વગર નિવૃત્ત થવાના આરે છે. DySOને પગાર વધશે, પણ હોદ્દો નહીં મળે. સામાન્ય વહીવટ વિભાગની ખામીયુક્ત નીતિ સામે કર્મચારીઓએ આંદોલનની ચીમકી આપી છે. સંપૂર્ણ માહિતી અને રજૂઆતો વિશે જાણો.
ગાંધીનગર, સોમવાર
ગુજરાત સચિવાલયમાં ફરજ બજાવતા હજારો કર્મચારીઓ માટે કેડર મેનેજમેન્ટની ખામી હવે એક ગંભીર કટોકટી બનીને સામે આવી છે. સામાન્ય વહીવટ વિભાગ (GAD)ના કથિત ખામીયુક્ત વ્યવસ્થાપનને કારણે, અંદાજે 1000થી વધુ કર્મચારીઓને પોતાની 25થી 30 વર્ષની લાંબી સેવા દરમિયાન એક પણ બઢતી લીધા વિના નિવૃત્ત થવાની ફરજ પડશે, જેના કારણે સચિવાલયના અનુભવી સ્ટાફમાં ભારે નિરાશા વ્યાપી છે.
પગાર વધશે, પણ હોદ્દો DySOનો જ રહેશે!
આ મામલો ખાસ કરીને નાયબ સેક્શન અધિકારીઓ માટે વધુ જટિલ બન્યો છે. માહિતી મુજબ, આશરે 1400 જેટલા DySO અધિકારીઓ વર્ષ 2031-32 સુધીમાં તો સેક્શન અધિકારીના પગાર ધોરણ સુધી પહોંચી જશે. જોકે, આ પગાર વધારા છતાં તેમનો હોદ્દો (પોસ્ટ) DySOનો જ રહેશે!
એટલે કે, તેમને વધુ પગાર મળશે, પણ પદ, પ્રતિષ્ઠા અને જવાબદારીમાં કોઈ વધારો નહીં થાય. કર્મચારી એસોસિએશનનું સ્પષ્ટ માનવું છે કે, આ પ્રકારની ખામીયુક્ત નીતિના કારણે અનુભવી અને કુશળ કર્મચારીઓની ક્ષમતાનો સરકાર યોગ્ય ઉપયોગ કરી શકતી નથી.
વારંવારની રજૂઆતો છતાં સરકારનું ‘મૌન’
બઢતીના અભાવને દૂર કરવા માટે કર્મચારી એસોસિએશને છેલ્લા કેટલાક વર્ષોમાં સતત સરકાર સમક્ષ રજૂઆતો કરી છે, પરંતુ તેનો કોઈ પ્રતિસાદ મળ્યો નથી. 1 જુલાઈ 2021, 2 ફેબ્રુઆરી 2022, 7 ફેબ્રુઆરી 2024, 24 જુલાઈ 2024, અને તાજેતરમાં 8 ઑગસ્ટ 2025 ના રોજ લેખિતમાં રજૂઆતો કરવામાં આવી છે.
એસોસિએશનનું કહેવું છે કે, જો રજૂઆત મુજબ બઢતી માટેનો રેશિયો (પ્રમાણ) સુધારી દેવામાં આવે, તો:
અનુભવી DySOને બઢતીની પૂરતી તકો મળે.
નીતિ ઘડતર જેવા મહત્વના સરકારી કામોમાં અનુભવી માનવબળનો લાભ મળે.
સરકાર પર વધારાનો નાણાકીય બોજ પણ ઘટે.
અન્ય વિભાગો માટે સુધારણા, સચિવાલય માટે ‘ઓરમાયું’ વલણ?
એસોસિએશનના પ્રતિનિધિઓએ આક્ષેપ કર્યો છે કે, રાજ્યના અન્ય વિભાગોમાં જ્યાં મામલતદાર, PI, PSI, સિનિયર કારકુન જેવા અનેક સંવર્ગો (કેડર)માં સીધી ભરતીનું પ્રમાણ ઘટાડીને યોગ્ય કેડર મેનેજમેન્ટ કરવામાં આવ્યું છે, ત્યાં સામાન્ય વહીવટ વિભાગે પોતાના વિભાગ માટે આવી કોઈ સમીક્ષા કરી જ નથી. પરિણામે, સચિવાલયના પાયાના કર્મચારીઓ માટે બઢતીની તકો સંપૂર્ણપણે અટકી ગઈ છે.
આ સતત અવગણનાના કારણે કર્મચારીઓમાં ભારે હતાશા અને ગુસ્સો છે. જો સરકાર આ મામલે તાત્કાલિક કોઈ નિર્ણય નહીં લે, તો નાછૂટકે આંદોલનાત્મક કાર્યક્રમો જાહેર કરવા સુધીની ચીમકી કર્મચારીઓ દ્વારા ઉચ્ચારવામાં આવી છે. એસોસિએશનની મુખ્ય માંગમાં વર્ગ 2ના અધિકારીઓની ભરતીના નિયમોમાં રેશિયાની પુન: સમીક્ષા કરવા અને યોગ્ય બઢતીની વ્યવસ્થા કરવા પર ભાર મૂકવામાં આવ્યો છે, જેથી અનુભવી સ્ટાફનો મહત્તમ ઉપયોગ થઈ શકે.
