સરકારે ખેડૂતોને જરૂર પૂરતું જ ખાતર ખરીદવાની અને તેનો બિનજરૂરી સ્ટૉક ન કરવાની અપીલ કરી છે. વધુમાં, કૃષિ મંત્રીએ એ પણ જણાવ્યું કે મગફળી જેવા પાકમાં યુરિયા ખાતરનો વધુ ઉપયોગ ટાળવો જોઈએ અને ડાંગર માટે એમોનિયમ સલ્ફેટ ખાતર વાપરવાની ભલામણ કરી છે.
ગાંધીનગર, શુક્રવાર
ગુજરાતમાં ખેડૂતો માટે ખાતરની અછતનો પ્રૉબ્લેમ હવે સોલ્વ થવા જઈ રહ્યો છે. કેન્દ્ર સરકારે રાજ્યને ખાતરનો નવો જથ્થો મોકલ્યો છે. આ નવા સપ્લાયથી ગુજરાતના જે જિલ્લાઓમાં ખાતરની શોર્ટેજ છે, ત્યાં તાત્કાલિક ધોરણે ખાતર મોકલવામાં આવશે.
મળતી માહિતી મુજબ હવે ગુજરાતને સેન્ટ્રલ ગવર્નમેન્ટ પાસેથી દરરોજ 8થી 10 હજાર મેટ્રિક ટન ખાતર મળશે. આ ઉપરાંત, હાલમાં રાજ્યના સેન્ટર્સ પર અંદાજે 1 લાખ મેટ્રિક ટન ખાતરનો સ્ટૉક ઉપલબ્ધ છે. ખેડૂતો આ ખાતર વિશે માહિતી મેળવવા માટે સ્પેશિયલ કંટ્રોલ રૂમનો સંપર્ક કરી શકે છે.
રાજ્યમાં વાવેતરની સ્થિતિ: કયા પાકનું વાવેતર ઘટ્યું, કયા પાકનું વધ્યું?
આ વર્ષે ગુજરાતમાં ટોટલ 82.35% વિસ્તારમાં જ વાવેતર થયું છે, જે ગત વર્ષની સરખામણીમાં ઓછું છે. ગયા વર્ષે 73.72 લાખ હેક્ટર વિસ્તારમાં વાવેતર થયું હતું, જ્યારે આ વર્ષે 70.47 લાખ હેક્ટરમાં થયું છે.
* ડાંગર અને બાજરી: આ વર્ષે 7.17 લાખ હેક્ટરમાં ડાંગર અને 1.53 લાખ હેક્ટરમાં બાજરીનું વાવેતર થયું છે.
* જુવાર: જુવારના વાવેતરમાં મોટો ઘટાડો નોંધાયો છે. ગયા વર્ષે 15 હજાર હેક્ટરમાં વાવેતર થયું હતું, જ્યારે આ વર્ષે માત્ર 5 હજાર હેક્ટરમાં જ થયું છે.
* મકાઈ: મકાઈનું વાવેતર 2.64 લાખ હેક્ટરમાં થયું છે.
* કઠોળ: કઠોળના વાવેતરમાં પણ ઘટાડો જોવા મળ્યો છે. ગયા વર્ષે 3.39 લાખ હેક્ટરની સામે આ વર્ષે 2.96 લાખ હેક્ટરમાં વાવેતર થયું છે.
* મગફળી અને કપાસ: મગફળીનું વાવેતર વધ્યું છે, જે 20.41 લાખ હેક્ટરમાં થયું છે. કપાસનું વાવેતર 20.35 લાખ હેક્ટરમાં થયું છે.
* તેલીબિયાં અને શાકભાજી: તેલીબિયાંના પાકોના વાવેતરમાં પણ વધારો થયો છે, જે 25.75 લાખ હેક્ટર સુધી પહોંચ્યું છે. શાકભાજીનું વાવેતર 2 લાખ હેક્ટરમાં થયું છે.
સંગ્રહખોરી અને કાળાબજારી અટકાવવા ખાસ અધિકારીની નિમણૂક
ખેડૂતોને સમયસર અને પૂરતું ખાતર મળે તે માટે રાજ્ય સરકાર સતત પ્રયત્નો કરી રહી છે. કૃષિ મંત્રી રાઘવજી પટેલે ખાતરના સપ્લાય અને ડિસ્ટ્રિબ્યુશન પર સતત મોનિટરિંગ રાખ્યું છે. તેમણે કહ્યું કે, રાજ્યમાં ખાતરની સંગ્રહખોરી, કાળાબજારી કે વધુ ભાવે વેચાણ ન થાય તે માટે સ્પેશિયલ ઑફિસરની પણ નિમણૂક કરવામાં આવી છે.
સરકારે ખેડૂતોને જરૂર પૂરતું જ ખાતર ખરીદવાની અને તેનો બિનજરૂરી સ્ટૉક ન કરવાની અપીલ કરી છે. વધુમાં, કૃષિ મંત્રીએ એ પણ જણાવ્યું કે મગફળી જેવા પાકમાં યુરિયા ખાતરનો વધુ ઉપયોગ ટાળવો જોઈએ અને ડાંગર માટે એમોનિયમ સલ્ફેટ ખાતર વાપરવાની ભલામણ કરી છે. ખાતર સંબંધી કોઈ પણ ફરિયાદ કે માહિતી માટે રાજ્ય, જિલ્લા અને તાલુકા લેવલે કંટ્રોલ રૂમ શરૂ કરવામાં આવ્યા છે.
