રાજ્યના તોલમાપ તંત્ર, ગાંધીનગર દ્વારા જારી કરાયેલી યાદી અનુસાર, નિયંત્રક, કાનૂની માપ વિજ્ઞાન અને ગ્રાહક બાબતોની કચેરીએ એક સામૂહિક ઝુંબેશ ચલાવી હતી.
ગાંધીનગર, રવિવાર
રાજ્યના તોલમાપ તંત્ર દ્વારા તાજેતરમાં હાથ ધરવામાં આવેલી વિશેષ ડ્રાઇવ અંતર્ગત, સમગ્ર ગુજરાતના 33 જિલ્લામાં આવેલા 267 પેટ્રોલ-ડીઝલ પંપો પર રાજ્યવ્યાપી દરોડા પાડવામાં આવ્યા હતા. આ દરોડા ગત 18 અને 19 જુલાઈના રોજ બે દિવસીય ઝુંબેશના ભાગ રૂપે યોજાયા હતા. આ ઓપરેશન દરમિયાન, 16 પેટ્રોલ-ડીઝલ પંપો પર ગેરરીતિઓ જણાતા તેમની સામે કાયદેસરની કાર્યવાહી કરવામાં આવી હતી અને દંડ વસૂલવામાં આવ્યો હતો.
રાજ્યના તોલમાપ તંત્ર, ગાંધીનગર દ્વારા જારી કરાયેલી યાદી અનુસાર, નિયંત્રક, કાનૂની માપ વિજ્ઞાન અને ગ્રાહક બાબતોની કચેરીએ એક સામૂહિક ઝુંબેશ ચલાવી હતી. આ ઝુંબેશમાં રાજ્યભરના અલગ-અલગ પેટ્રોલ-ડીઝલ પંપોની આકસ્મિક તપાસણી હાથ ધરવામાં આવી હતી.
કયા જિલ્લાઓમાં ગેરરીતિઓ મળી?
* ગેરરીતિઓ મળી આવેલા 16 પેટ્રોલ અને ડીઝલ પંપોમાં નીચેના જિલ્લાઓનો સમાવેશ થાય છે.
* અમદાવાદ: 3 પંપ
* પંચમહાલ: 2 પંપ
* વડોદરા, સુરત, કચ્છ, ગીર સોમનાથ, અમરેલી, ભાવનગર, બોટાદ, સુરેન્દ્રનગર, મહેસાણા, હિંમતનગર-સાબરકાંઠા અને મોરબી: દરેક જિલ્લામાં 1-1 પંપ
કેવી ગેરરીતિઓ સામે આવી?
આ તપાસણી દરમિયાન, પેટ્રોલ-ડીઝલ પંપો પર વિવિધ ગેરરીતિઓ જોવા મળી હતી, જેમાં મુખ્યત્વે નીચેની બાબતોનો સમાવેશ થાય છે.
* ડિલિવરી તપાસવા માટે જરૂરી સ્ટાન્ડર્ડ કેપેસિટી મેજર ન રાખવું.
* કેપેસિટી મેજરનું ફેરચકાસણી/મુદ્રાંકન ન કરાવવું.
* ડિસ્પેન્સિંગ યુનિટનું ફેરચકાસણી/મુદ્રાંકન ન કરાવવું.
* ખરાઈ પ્રમાણપત્ર પ્રદર્શિત ન કરવું.
તોલમાપ તંત્રના નાયબ નિયંત્રક, મદદનીશ નિયંત્રક અને ઇન્સપેક્ટરો દ્વારા આ ઝુંબેશ હાથ ધરવામાં આવી હતી. હાલમાં, આ અંગે વધુ તપાસની કાર્યવાહી ચાલુ છે.
ગ્રાહક સુરક્ષા અને જાગૃતિનો હેતુ
આ ઝુંબેશનો મુખ્ય હેતુ ગ્રાહકોના હિતનું રક્ષણ કરવાનો છે. દૈનિક જરૂરિયાતો પૂરી કરવા અથવા મુસાફરી દરમિયાન ગ્રાહકો મોટા પ્રમાણમાં પેટ્રોલ-ડીઝલ ખરીદે છે. આવા સમયે તેમને છેતરપિંડીનો ભોગ બનવું ન પડે અને ગ્રાહકો પોતાના અધિકારો પ્રત્યે જાગૃત થાય તે માટે આ પગલું લેવામાં આવ્યું છે. કાનૂની માપ વિજ્ઞાન તંત્ર દ્વારા ગ્રાહકોના હિતમાં નિયમો અને કાયદાઓની જોગવાઈઓનું પાલન થાય તે સુનિશ્ચિત કરવા આ રાજ્યવ્યાપી ઝુંબેશ હાથ ધરવામાં આવી છે.
