Settled vs Closed: લોન સેટલમેન્ટ અને ક્લોઝરમાં શું ફરક છે? ક્રેડિટ સ્કોર પર 5 મુખ્ય અસર સમજો, નવી લોન મળવી સરળ થાય કે મુશ્કેલ? સંપૂર્ણ માહિતી વિશે જાણો ડિટેલમાં.
અમદાવાદ, શનિવાર
Settled vs Closed: આજકાલ લોન લઈને ઘર, ગાડી કે બિઝનેસ ચલાવવું સામાન્ય બન્યું છે. પણ જ્યારે ચૂકવવાનો સમય આવે ત્યારે ઘણા લોકો મુંઝાય છે – શું સેટલમેન્ટ કરીએ કે પૂરું લોન ચૂકવીને ક્લોઝ કરીએ? આ બેમાં નાનકડો ફરક તમારા ક્રેડિટ સ્કોરને આખી જિંદગી માટે અસર કરી શકે છે. આજે અમે તમને સાદી ભાષામાં 5 મુખ્ય તફાવત સમજાવીએ, જેથી તમે સાચો નિર્ણય લઈ શકો.
1. ચૂકવવાની રકમમાં ફરક
લોન સેટલમેન્ટમાં તમે બૅન્ક સાથે વાત કરીને બાકી રકમનો માત્ર એક ભાગ ચૂકવો છો. દાખલા તરીકે, 5 લાખની લોન હોય તો 3 લાખમાં વાત પતી જાય. પણ લોન ક્લોઝરમાં પૂરી 5 લાખ વ્યાજ સહિત ચૂકવવી પડે – એક પણ રૂપિયો ઓછો નહીં.
2. ક્રેડિટ સ્કોર પર અસર
સેટલમેન્ટ થાય તો તમારી ક્રેડિટ રિપોર્ટમાં ‘Settled’ લખાય છે, જે નેગેટિવ માર્ક છે. આનાથી ક્રેડિટ સ્કોર 50-100 પોઈન્ટ ઘટી શકે છે. જ્યારે ક્લોઝરમાં ‘Closed’ લખાય છે, જે પોઝિટિવ છે અને સ્કોર વધારે છે. નવી બૅન્ક તમને વિશ્વાસુ ગ્રાહક માને.
3. નવી લોન મળવાની શક્યતા
‘Settled’ જોઈને બૅન્કો તમને રિસ્કી ગણે, નવી લોન કે ક્રેડિટ કાર્ડ મળવું મુશ્કેલ થઈ જાય. ઘણી વખત એપ્લિકેશન રિજેક્ટ થાય. પણ ‘Closed’ વાળા લોકોને ઝડપથી અને સારા વ્યાજદરે લોન મળે.
4. દસ્તાવેજોનો તફાવત
સેટલમેન્ટ પછી બૅન્ક સેટલમેન્ટ લેટર આપે, જે કહે કે વાત પતી ગઈ. ક્લોઝરમાં No Objection Certificate (NOC) કે Loan Closure Certificate મળે, જે સાબિત કરે કે તમે પૂરું ચૂકવ્યું.
5. પેનલ્ટી અને ખર્ચ
સેટલમેન્ટમાં ક્યારેક પેનલ્ટી કે ટૅક્સની અસર પડે, અને લાંબા ગાળે ક્રેડિટ સ્કોરને નુકસાન. ક્લોઝરમાં ફોરક્લોઝર ચાર્જ લાગે (સામાન્ય 2-4%), પણ સ્કોર પર કોઈ ખરાબ અસર નહીં. આખરે, લોન ક્લોઝર તમારા ક્રેડિટ હેલ્થ માટે હંમેશા સારું છે. સેટલમેન્ટ ફક્ત ત્યારે જ કરો જ્યારે બીજો કોઈ રસ્તો ના હોય. નાણાકીય સલાહકારની મદદ લઈને નિર્ણય લો, જેથી તમારી ક્રેડિટ રિપોર્ટ હંમેશા સ્વચ્છ રહે.
