અક્ષય કુમારની આગામી ફિલ્મ જોલી LLB 3 વિવાદમાં સપડાઈ છે. ગુજરાત હાઈકોર્ટમાં એક અરજી દાખલ થઈ છે જેમાં ફિલ્મના ટીઝરને હટાવવા અને રિલીઝ પર રોક લગાવવાની માંગ કરવામાં આવી છે. જાણો આ આખો મામલો શું છે.
અમદાવાદ, શુક્રવાર
અક્ષય કુમાર અને અરશદ વારસીની કોમેડી-લીગલ ડ્રામા ફિલ્મ જોલી LLB 3ના ફેન્સ આતુરતાથી રાહ જોઈ રહ્યા છે, ત્યારે જ ફિલ્મને લઈને એક નવો વિવાદ સામે આવ્યો છે. અમદાવાદના એક રહેવાસીએ ગુજરાત હાઈકોર્ટમાં ફિલ્મની રિલીઝ પર રોક લગાવવાની માંગ સાથે એક પિટિશન દાખલ કરી છે, જેના પર 16 સપ્ટેમ્બરના રોજ સુનાવણી થવાની છે.
ટીઝરમાં ન્યાયતંત્રનું અપમાન?
આ અરજી કરનાર યતીન દેસાઈનું કહેવું છે કે ફિલ્મના ટીઝરમાં કેટલાક ડાયલોગ્સ અને દ્રશ્યો એવા છે જે ભારતીય ન્યાયતંત્રની છબીને નુકસાન પહોંચાડી શકે છે. અરજીમાં મુખ્યત્વે બે મુદ્દાઓ પર ફોકસ કરવામાં આવ્યો છે:
ટીઝર પર રોક: દેસાઈએ માહિતી અને પ્રસારણ મંત્રાલયને આ ટીઝરને તમામ ડિજિટલ પ્લેટફોર્મ પરથી હટાવવા માટે આદેશ આપવાની કોર્ટને વિનંતી કરી છે.
ફિલ્મની તપાસ: અરજીમાં કહેવામાં આવ્યું છે કે 19 સપ્ટેમ્બરના રોજ રિલીઝ થનારી આ ફિલ્મનું સર્ટિફિકેશન રદ કરવું જોઈએ અને તેની તપાસ માટે ન્યાયાધીશો, ભૂતપૂર્વ ન્યાયાધીશો, વકીલો અને નિષ્ણાતોની એક કમિટી બનાવવી જોઈએ.
દેસાઈએ સ્પષ્ટ કર્યું છે કે તેઓ ફિલ્મ પર સંપૂર્ણ પ્રતિબંધ નથી ઈચ્છતા, પરંતુ રિલીઝ પહેલાં તેના વાંધાજનક ભાગોને દૂર કરવામાં આવે. તેમનો આરોપ છે કે ટીઝરમાં જજને ગાળો બોલતા અને અભદ્ર ભાષાનો ઉપયોગ કરતા દર્શાવવામાં આવ્યા છે, જે ન્યાયતંત્રની ગરિમાની વિરુદ્ધ છે. તેમણે કહ્યું કે કોર્ટ માત્ર હાસ્ય કે મનોરંજન માટેનું પ્લેટફોર્મ નથી અને જજીસને જોકર તરીકે રજૂ કરવા યોગ્ય નથી.
જોલી LLB 2 વખતે પણ બન્યો હતો આવો જ કિસ્સો
આ પહેલીવાર નથી જ્યારે આ ફિલ્મ સિરીઝ વિવાદમાં ફસાઈ હોય. જોલી LLB 2 વખતે પણ આવો જ એક કેસ સામે આવ્યો હતો. તે સમયે, બોમ્બે હાઈકોર્ટની ઔરંગાબાદ બેન્ચે એક કમિટીની રચના કરી હતી જેણે ફિલ્મમાંથી ચાર સીન્સને હટાવવાનો આદેશ આપ્યો હતો.
