ગાંધીનગરના સરઢવ ગામના ખેડૂત પરિવારને અમેરિકા મોકલવાના બહાને ચાર એજન્ટોએ 40 લાખ રૂપિયાનો ચૂનો લગાવ્યો. દીકરા અને પુત્રવધૂને દોઢ મહિના સુધી બાલી અને થાઇલેન્ડ જેવા દેશોમાં ફેરવીને છેતરપિંડી આચરી.
ગાંધીનગર, શનિવાર
ગાંધીનગર જિલ્લાના સરઢવ ગામમાં રહેતા એક ખેડૂત પરિવાર માટે તેમના દીકરાને અમેરિકા મોકલવાનું સપનું એક દુઃસ્વપ્ન બની ગયું. ચાર એજન્ટોએ ભેગા મળીને પરિવારને કાયદેસર રીતે અમેરિકામાં નોકરી અપાવીને સેટલ કરવાનું વચન આપ્યું હતું, પરંતુ અંતે તેમની સાથે 40 લાખ રૂપિયાની છેતરપિંડી આચરી હતી. આ મામલે પરિવારે પેથાપુર પોલીસ સ્ટેશનમાં ફરિયાદ નોંધાવી છે.
સરઢવ ગામના ખેડૂત જશવંતભાઈ બળદેવભાઈ પટેલ તેમના 25 વર્ષીય એમ.કોમ પાસ પુત્ર સાગર માટે ઉજ્જવળ ભવિષ્ય ઈચ્છતા હતા. સાગરનું સપનું અમેરિકા જઈને સ્થાયી થવાનું હતું, જેના માટે પરિવાર સારા એજન્ટની શોધમાં હતો. મે 2024 માં, તેમની મુલાકાત સંજય ગઢવી (સરગાસણ), નિલેશ પટેલ (પ્રાંતિજ), અને તલોદના દંપતી પિનાકીન પટેલ અને નીલમ પટેલ સાથે થઈ. એજન્ટોએ પોતાને સમાજના હોવાનું કહીને જશવંતભાઈનો વિશ્વાસ જીતી લીધો અને સાગર તેમજ તેની પત્નીને અમેરિકા મોકલવા માટે 1.20 કરોડ રૂપિયાનો સોદો નક્કી કર્યો.
વિશ્વાસમાં આવીને જશવંતભાઈએ પોતાની બચત અને અન્ય પાસેથી ઉછીના પૈસા લઈને 21 મે, 2024 ના રોજ એજન્ટોને 60 લાખ રૂપિયા રોકડા ચૂકવી દીધા. પૈસા મળ્યા બાદ એજન્ટો સાગર અને તેની પત્નીને એરપોર્ટ લઈ ગયા અને કહ્યું કે તેઓ પહેલા મુંબઈ જશે અને ત્યાંથી સીધા ન્યૂયોર્ક પહોંચી જશે, જ્યાં બધી વ્યવસ્થા થઈ ગઈ છે. પરંતુ હકીકત કંઈક અલગ જ હતી. દંપતીને મુંબઈમાં દસ દિવસ રોક્યા પછી અમેરિકાને બદલે બાલી, વિયેતનામ અને થાઇલેન્ડ જેવા દેશોમાં દોઢ મહિના સુધી ફેરવવામાં આવ્યા.
આ સમય દરમિયાન દીકરા સાથે સંપર્ક તૂટી જતાં ચિંતિત પિતાએ એજન્ટોને ફોન કર્યો. એજન્ટોએ બહાનું કાઢ્યું કે વિઝા પ્રક્રિયામાં સમસ્યા હોવાથી તેમને અલગ-અલગ દેશોમાં ફેરવવા પડી રહ્યા છે. એટલું જ નહીં, તેમણે અમેરિકાના વિઝા થઈ ગયા હોવાનો ખોટો દાવો કરીને જશવંતભાઈ પાસેથી વધુ 15 લાખ રૂપિયા પડાવી લીધા. પૈસા આપ્યા પછી પણ જ્યારે દીકરો અને પુત્રવધૂ અમેરિકા ન પહોંચ્યા, ત્યારે પરિવારને છેતરપિંડીનો અહેસાસ થયો.
આખરે, જશવંતભાઈએ જાતે જ થાઇલેન્ડથી અમદાવાદની ઓનલાઈન ટિકિટ બુક કરાવીને પોતાના દીકરા અને પુત્રવધૂને ભારત પાછા બોલાવ્યા. તેઓ પાછા આવ્યા પછી પણ એજન્ટોએ તેમના પાસપોર્ટ પરત આપવા માટે વધુ 10 લાખ રૂપિયા પડાવ્યા. જશવંતભાઈએ જ્યારે પોતાના પૈસા પાછા માંગ્યા, ત્યારે એજન્ટોએ ટુકડે-ટુકડે 45 લાખ રૂપિયા પરત કર્યા, પરંતુ બાકીના 40 લાખ આપવાનો સ્પષ્ટ ઇનકાર કરી દીધો અને પોતાના ફોન બંધ કરી દીધા. આ સમગ્ર મામલે પેથાપુર પોલીસે ચારેય એજન્ટો વિરુદ્ધ ગુનો નોંધીને વધુ તપાસ શરૂ કરી છે.
