સુરત પૂર પ્રભાવિત વિસ્તારોની મુલાકાત લીધા વિના જ CM ભૂપેન્દ્ર પટેલે AC ચેમ્બરમાં બેસી 500 કરોડના પેકેજની જાહેરાત કરી. જાણો બંધ બારણે થયેલી બેઠક અને નેતાઓના પલાયનવાદની અસલી હકીકત.
સુરત, ગુરૂવાર
સુરતમાં ખાડી પૂરના કારણે હજારો પરિવારોની હાલત કફોડી બની ગઈ છે. લોકોના ઘરોમાં ગંદા પાણી ભરાઈ ગયા છે અને આખી જિંદગીની કમાણી પાણીમાં વહી ગઈ છે. આ ભયંકર સ્થિતિ વચ્ચે રાજ્યના મુખ્યમંત્રી ભૂપેન્દ્ર પટેલે સુરતની મુલાકાત તો લીધી, પણ આ મુલાકાત લોકોના આંસુ લૂછવા કરતા સરકારી ઔપચારિકતા વધુ લાગી રહી છે.
સૌથી આશ્ચર્યની વાત એ છે કે મુખ્યમંત્રીએ પૂર પ્રભાવિત એક પણ વિસ્તારની ગ્રાઉન્ડ ઝીરો પર જઈને મુલાકાત લીધી નથી. તેઓ હવાઈ માર્ગે આવ્યા અને એરપોર્ટથી સીધા VIP રોડ થઈને સુરત મહાનગરપાલિકાની ICCC બિલ્ડિંગ પહોંચી ગયા, જ્યાં રસ્તામાં કોઈ જ પાણી ભરાયા ન હતા. પૂરના કારણે જીવ ગુમાવનાર લોકોના પરિવારોને મળવાનું પણ તેમણે ટાળ્યું હતું. હવે જનતા સવાલ પૂછી રહી છે કે જે મુખ્યમંત્રી પૂરના ગંદા પાણીમાં ઉતર્યા જ નથી, તેમને સુરતીઓની અસલી પીડા અને તકલીફ કેવી રીતે સમજાશે?
500 કરોડના પેકેજની જાહેરાત અને તપાસનું નાટક?
AC ચેમ્બરમાં બેસીને થયેલી આ સમીક્ષા બેઠક બાદ રાજ્ય સરકારે સુરતને ખાડી પૂરથી મુક્તિ અપાવવા 500 કરોડનું વિશેષ પેકેજ જાહેર કર્યું છે. આ ભંડોળનો ઉપયોગ ખાડીને ઊંડી કરવા અને ગેરકાયદે દબાણો હટાવવા માટે કરવામાં આવશે.
મુખ્યમંત્રીએ 24 કલાકમાં અસરગ્રસ્તોને કેશડોલ ચૂકવવાનો આદેશ આપ્યો છે.
વરસાદમાં તૂટી ગયેલા કરોડોના નવા રસ્તાઓ મામલે કોન્ટ્રાક્ટરો અને અધિકારીઓ સામે ફોજદારી ગુનો નોંધવાની ચીમકી આપી છે.
જોકે, સુરતની જનતા સારી રીતે જાણે છે કે દર વર્ષે કરોડો રૂપિયા ભ્રષ્ટાચારમાં વહી જાય છે અને ભૂતકાળમાં કોઈ મોટા નેતા કે અધિકારી જેલમાં ગયા નથી. તેથી આ વખતે પણ તપાસના નામે માત્ર નાટક જ થશે તેવું લોકો માની રહ્યા છે.
બંધ બારણે બેઠક: સરકાર શું છુપાવવા માંગતી હતી?
સુરત સર્કિટ હાઉસ ખાતે યોજાયેલી આ બેઠકમાં લોકશાહીના ચોથા સ્તંભ સમાન મીડિયાને પ્રવેશ આપવામાં આવ્યો ન હતો. એટલું જ નહીં, કોઈ અંદરની વાત કે વીડિયો બહાર ન જાય તે માટે નેતાઓ અને મનપા કમિશનર સહિત તમામ અધિકારીઓના મોબાઈલ ફોન બહાર જમા કરાવી દેવામાં આવ્યા હતા. જો તંત્રએ બધું કામ બરાબર જ કર્યું છે, તો મીડિયાથી આટલો ડર શા માટે? બંધ બારણે આવી ગુપ્તતા રાખીને સરકાર કઈ વાસ્તવિકતા છુપાવવા માંગતી હતી તે મોટો સવાલ છે.
નેતાઓનો બચાવ અને અધિકારીઓ પર દોષનો ટોપલો
આશરે 2 કલાક ચાલેલી આ મેરેથોન બેઠકમાં નેતાઓએ પોતાની નિષ્ફળતા છુપાવવા માટે પલાયનવાદી રાજનીતિ રમી. પૂરના સમયે AC રૂમમાં ભરાઈ રહેલા કેટલાક સ્થાનિક ધારાસભ્યોએ બધો જ વાંક મનપાના અધિકારીઓ પર ઢોળી દીધો હોવાની ચર્ચા છે. મુખ્યમંત્રીએ પણ નેતાઓની વાતમાં સુર મિલાવીને અધિકારીઓને કડક કાર્યવાહીની ચેતવણી આપી.
પરંતુ, સુરતની જનતા પૂછી રહી છે કે શું આમાં માત્ર અધિકારીઓનો જ વાંક છે? વોટ લઈને AC ચેમ્બરોમાં બેસી રહેલા સાંસદો અને ધારાસભ્યોની કોઈ જવાબદારી નથી? જ્યારે ખાડી કિનારે ગેરકાયદે દબાણો થઈ રહ્યા હતા અને કરોડોનું બજેટ ભ્રષ્ટાચારમાં હોમાઈ રહ્યું હતું, ત્યારે આ લોકપ્રતિનિધિઓ શું આંખો બંધ કરીને બેઠા હતા? મુખ્યમંત્રીએ પોતાના નેતાઓને ઠપકો આપવાનું મુનાસિબ સમજ્યું નહીં.
મીડિયાના સળગતા સવાલોથી ડરીને સરકારનું પલાયન
આટલી મોટી આફત અને હાઈવોલ્ટેજ બેઠક પછી પણ સરકારે કોઈ પ્રેસ કોન્ફરન્સ યોજી ન હતી. સરકારને ખબર હતી કે જો મીડિયા સામે જઈશું તો ગ્રાઉન્ડ ઝીરો પરથી આવતા સળગતા સવાલોના જવાબ આપવામાં નેતાઓના પરસેવા છૂટી જશે. બેઠક પૂરી થયા પછી માત્ર ગૃહરાજ્યમંત્રીએ કેમેરા સામે આવીને સરકારની પીઠ થાબડતું નાનકડું નિવેદન આપી દીધું હતું. પણ સુરતની જનતાને આ નરકમાં કેમ ધકેલી દેવામાં આવી, તેનો સંતોષકારક જવાબ સરકાર પાસે ન હતો.
