ડાકોર ફાગણી પૂનમના મેળાને લઈને મોટા સમાચાર! 25 ફેબ્રુઆરીથી 4 માર્ચ સુધી ડાકોર જતા મુખ્ય માર્ગો પર ભારે વાહનો માટે પ્રવેશબંધી. પદયાત્રીઓ માટે DJ પર પ્રતિબંધ અને ST વિભાગ દ્વારા 650 વધારાની બસોની જાહેરાત. વાંચો સંપૂર્ણ વિગત.
ખેડા, બુધવાર
ખેડા જિલ્લાના સુપ્રસિદ્ધ યાત્રાધામ ડાકોરમાં ફાગણી પૂનમના મેળાનો અનેરો મહિમા છે. હોળી-ધૂળેટીના તહેવાર નિમિત્તે લાખોની સંખ્યામાં ભક્તો રાજા રણછોડના દર્શને ઉમટી પડે છે. ત્યારે પદયાત્રીઓની સુરક્ષા અને ટ્રાફિકની સમસ્યાને ધ્યાનમાં રાખીને તંત્ર દ્વારા મહત્વનો નિર્ણય લેવામાં આવ્યો છે. ડાકોર તરફ જતા રસ્તાઓ પર 25 ફેબ્રુઆરીથી 4 માર્ચ સુધી ભારે વાહનોની અવરજવર પર પ્રતિબંધ મુકવામાં આવ્યો છે.
ભારે વાહનો માટે કયા રસ્તા બંધ અને ક્યાં ડાયવર્ઝન?
પોલીસ અને વહીવટી તંત્ર દ્વારા મેળા દરમિયાન ટ્રાફિક જામ ન થાય તે માટે ખાસ પ્લાન તૈયાર કરવામાં આવ્યો છે. ખાનગી લક્ઝરી બસો અને માલવાહક વાહનોએ નીચે મુજબના વૈકલ્પિક રસ્તાઓનો ઉપયોગ કરવાનો રહેશે:
અમદાવાદથી ડાકોર: અમદાવાદ બાજુથી હાથીજણ, મહેમદાવાદ અને મહુધા થઈને આવતા ભારે વાહનો પર પ્રતિબંધ રહેશે.
નડિયાદથી ડાકોર: નડિયાદ ચોકડીથી જે વાહનો મહુધા તરફ જાય છે, તેમને ડાયવર્ટ કરવામાં આવ્યા છે.
આણંદ-ગોધરા હાઈવે: સેવાલિયા અને પાલી તરફથી આવતા ભારે વાહનોએ ફરજિયાત વૈકલ્પિક રૂટ પસંદ કરવો પડશે.
કપડવંજ-કઠલાલ: આ વિસ્તારમાંથી ડાકોર તરફ આવતા ભારે વાહનોને પણ અન્ય માર્ગે વાળવામાં આવશે.
પદયાત્રાના રસ્તા પર DJ અને સ્પીકર નહીં વાગે
ડાકોર મંદિર કમિટી અને તંત્ર દ્વારા આ વખતે એક સરાહનીય નિર્ણય લેવાયો છે. ડાકોર તરફ આવતા પદયાત્રીઓના રસ્તા પર કોઈપણ વ્યક્તિ કે સંસ્થા DJ કે મોટા અવાજે લાઉડ સ્પીકર વગાડી શકશે નહીં. આ નિર્ણય પાછળનો મુખ્ય હેતુ એ છે કે, ઘોંઘાટના કારણે વૃદ્ધો અને અશક્ત પદયાત્રીઓને મુશ્કેલી ન પડે. ઉપરાંત, DJ ના કારણે રસ્તા પર થતી ભીડ ઓછી થાય અને ટ્રાફિક હળવો રહે તે માટે આ પગલું ભરવામાં આવ્યું છે.
ભક્તો માટે 650 વધારાની બસો દોડશે
શ્રદ્ધાળુઓને ડાકોર પહોંચવામાં અને પરત ફરવામાં કોઈ તકલીફ ન પડે તે માટે એસટી નિગમ (GSRTC) પણ સજ્જ છે. તંત્ર દ્વારા 27 ફેબ્રુઆરીથી 3 માર્ચ સુધી ખાસ 650 વધારાની બસો ફાળવવામાં આવી છે. આ ઉપરાંત, ભક્તો ભીડમાં પણ સરળતાથી દર્શન કરી શકે તે માટે ઠેર-ઠેર મોટી LED સ્ક્રીન ગોઠવવાનું આયોજન પણ કરવામાં આવ્યું છે.
લોક ડાયરાની રમઝટ બોલાશે
મેળા દરમિયાન ભક્તિ સાથે મનોરંજનનો પણ સંગમ જોવા મળશે. ડાકોર ફાગણોત્સવ અંતર્ગત બે દિવસ ભવ્ય સાંસ્કૃતિક કાર્યક્રમો યોજાશે:
28 ફેબ્રુઆરી: ગુજરાતના પ્રખ્યાત લોકગાયિકા ગીતાબેન રબારી સુર રેલાવશે.
01 માર્ચ: લોક સાહિત્યકાર રાજભા ગઢવી ડાયરાની જમાવટ કરશે.
આમ, ડાકોરમાં ફાગણી પૂનમના મેળાને લઈને તંત્ર અને મંદિર ટ્રસ્ટ દ્વારા તમામ તૈયારીઓ પૂર્ણ કરી દેવામાં આવી છે. જો તમે પણ ડાકોર જવાનું વિચારી રહ્યા હોવ, તો ટ્રાફિકના આ નવા નિયમો ખાસ ધ્યાનમાં રાખજો.
