અલ-ફલાહ યુનિવર્સિટી (Al-Falah University) સાથે જોડાયેલા લોકોની સંડોવણીના અહેવાલો સામે આવ્યા બાદ યુનિવર્સિટી સામે સખત કાર્યવાહી કરવામાં આવી છે
દિલ્હીમાં લાલ કિલ્લા નજીક થયેલા કાર બોમ્બ ધમાકાના ગંભીર કેસમાં ફરીદાબાદ સ્થિત અલ-ફલાહ યુનિવર્સિટી (Al-Falah University) સાથે જોડાયેલા લોકોની સંડોવણીના અહેવાલો સામે આવ્યા બાદ યુનિવર્સિટી સામે સખત કાર્યવાહી કરવામાં આવી છે. આ ઘટના બાદ તુરંત જ ભારતીય વિશ્વવિદ્યાલય સંઘ (AIU – Association of Indian Universities) દ્વારા યુનિવર્સિટીની સભ્યતા તાત્કાલિક અસરથી રદ (સસ્પેન્ડ) કરવામાં આવી છે. AIU દ્વારા સત્તાવાર પત્ર જાહેર કરીને આ નિર્ણયની જાણ કરવામાં આવી હતી, જેમાં જણાવાયું હતું કે મીડિયા અહેવાલો મુજબ અલ-ફલાહ યુનિવર્સિટી સંઘના નિયમો મુજબ ‘સારી સ્થિતિ’ (Good Standing) માં જણાતી નથી. આ નિર્ણય બાદ યુનિવર્સિટીને AIUનું લોગો હટાવવા અને કોઈપણ પ્રવૃત્તિમાં સંઘના નામનો ઉપયોગ ન કરવા માટે સ્પષ્ટ આદેશો આપવામાં આવ્યા છે.
આ સનસનાટીભર્યા મામલામાં યુનિવર્સિટી સામે માત્ર AIU એ જ પગલાં નથી લીધાં, પરંતુ કેન્દ્ર સરકાર દ્વારા પણ ગંભીરતાથી તપાસના આદેશ આપવામાં આવ્યા છે. સૂત્રોના જણાવ્યા મુજબ, ધમાકા સાથે જોડાયેલા શંકાસ્પદ લોકોના યુનિવર્સિટી સાથેના સંબંધો બહાર આવ્યા બાદ કેન્દ્ર સરકારે યુનિવર્સિટીના તમામ રેકોર્ડની ઝીણવટભરી તપાસ શરૂ કરાવી છે. આ ઉપરાંત, એન્ફોર્સમેન્ટ ડિરેક્ટોરેટ (ED) દ્વારા પણ યુનિવર્સિટીને મળતા ફંડ (Funding) ની સંપૂર્ણ તપાસ હાથ ધરવામાં આવી છે. આ તપાસનું મુખ્ય કારણ એ છે કે ધમાકા સાથે સંકળાયેલી કાર ચલાવનાર ડોક્ટર ઉમર નબી આ જ યુનિવર્સિટીમાં આસિસ્ટન્ટ પ્રોફેસર તરીકે કાર્યરત હતા, જે યુનિવર્સિટી અને ઘટના વચ્ચે સીધું જોડાણ દર્શાવે છે.
