મહાગઠબંધનના મુખ્યમંત્રી પદના ઉમેદવાર તેજસ્વી યાદવે મતગણતરીના કામમાં જોડાયેલા અધિકારીઓને આકરી ચેતવણી આપી છે.
બિહાર વિધાનસભા ચૂંટણીના પરિણામો જાહેર થવાના થોડા કલાકો પહેલાં જ, મહાગઠબંધનના મુખ્યમંત્રી પદના ઉમેદવાર તેજસ્વી યાદવે મતગણતરીના કામમાં જોડાયેલા અધિકારીઓને આકરી ચેતવણી આપી છે. તેમણે અધિકારીઓને 2020ની ચૂંટણીની ભૂલ ન દોહરાવવા અને મતગણતરીમાં કોઈ પણ પ્રકારની ગેરરીતિ કે અન્યાય ન કરવા જણાવ્યું હતું. તેજસ્વી યાદવે દાવો કર્યો કે મહાગઠબંધન સ્પષ્ટ બહુમતી સાથે ચૂંટણી જીતી રહ્યું છે અને તેમના પક્ષના કાર્યકરો રાજ્યભરના મતગણતરી કેન્દ્રો પર સક્રિય છે. તેમણે ભારપૂર્વક જણાવ્યું હતું કે જો કોઈપણ વહીવટી અધિકારી 2020ની ચૂંટણી જેવી ભૂલ કરશે અને ગણતરી દરમિયાન ગડબડી કરશે, તો તેને “કરારો જવાબ” મળશે.
રાષ્ટ્રીય જનતા દળ (RJD)ના નેતા તેજસ્વી યાદવે મહાગઠબંધનની પ્રેસ કોન્ફરન્સમાં જણાવ્યું હતું કે જો કોઈ મતગણતરી અધિકારી અન્યાય કે ગેરબંધારણીય કાર્ય કરશે, તો જનતા તેનો જવાબ આપશે. તેમણે સ્પષ્ટતા કરી કે જે અધિકારીઓ પ્રમાણિકતાથી ગણતરી કરશે, તેમને ડરવાની જરૂર નથી, પરંતુ જેઓ કોઈના ઈશારા પર કામ કરશે અને તેમની મર્યાદા ઓળંગશે, તેમને પરિણામો ભોગવવા પડશે. આ સાથે, તેજસ્વી યાદવે એવો ગંભીર આરોપ પણ લગાવ્યો હતો કે ઘણા અધિકારીઓને પટના અને દિલ્હીથી ફોન કરીને સૂચનાઓ આપવામાં આવી રહી છે. તેમણે દાવો કર્યો હતો કે અધિકારીઓને ખાસ કરીને ઓછાં માર્જિનવાળી સીટો પર, જ્યાં મહાગઠબંધન જીતી રહ્યું છે, ત્યાં ગણતરી ધીમી કરવા અને પરિણામો મોડા જાહેર કરવા માટે કહેવામાં આવી રહ્યું છે. તેમણે અધિકારીઓને જનતાએ આપેલા મત સાથે ન્યાય કરવા અને નિષ્પક્ષ ગણતરી કરાવવા માટે અપીલ કરી હતી.
