થોડા અઠવાડિયા પહેલા અલાસ્કામાં ટ્રમ્પ અને પુતિન વચ્ચે થયેલી મુલાકાત બાદ એવી આશા હતી કે યુદ્ધ હવે સમાપ્ત થશે. પરંતુ સમય જતાં તે આશાઓ પણ ઠગારી નીવડી
નવી દિલ્હી,રવિવાર: યુક્રેન મુદ્દે અમેરિકા અને રશિયા વચ્ચે સતત ઝઘડો ચાલી રહ્યો છે. થોડા અઠવાડિયા પહેલા અલાસ્કામાં ટ્રમ્પ અને પુતિન વચ્ચે થયેલી મુલાકાત બાદ એવી આશા હતી કે યુદ્ધ હવે સમાપ્ત થશે. પરંતુ સમય જતાં તે આશાઓ પણ ઠગારી નીવડી. હવે રાષ્ટ્રપતિ ટ્રમ્પ ફરી એકવાર રશિયા પર નવા પ્રતિબંધો લાદવાની તૈયારી કરી રહ્યા છે. રશિયા દ્વારા યુક્રેન પર મોટા હવાઈ હુમલા બાદ તેમનું નિવેદન આવ્યું છે.
વ્હાઇટ હાઉસની બહાર મીડિયા સાથે વાત કરતી વખતે, ટ્રમ્પને પૂછવામાં આવ્યું કે શું તેઓ યુક્રેન પર તાજેતરના હુમલા પછી રશિયા પર નવા પ્રતિબંધો લાદવાની તૈયારી કરી રહ્યા છે. આના જવાબમાં ટ્રમ્પે કહ્યું કે તેઓ આ માટે સંપૂર્ણપણે તૈયાર છે. જોકે, ટ્રમ્પે રશિયા પર કેવા પ્રકારના નવા પ્રતિબંધો લાદવાની તૈયારી કરી રહ્યા છે તે અંગે વધુ માહિતી આપી નથી.
ટ્રમ્પ દ્વારા આ નિવેદન એવા સમયે આપવામાં આવ્યું છે જ્યારે રશિયાએ યુક્રેનની રાજધાની કિવ પર જોરદાર હુમલો કર્યો છે. 800 થી વધુ ડ્રોન, મિસાઇલ અને રોકેટ દ્વારા કરવામાં આવેલા આ હુમલાએ કિવમાં ભારે વિનાશ મચાવ્યો છે. આ હુમલામાં લગભગ બે લોકોના મોત થયા છે અને 15 થી વધુ લોકો ઘાયલ થયા છે. યુક્રેનિયન અધિકારીઓના મતે, 2022 માં યુદ્ધ શરૂ થયા પછી કિવ પર આ સૌથી મોટો રશિયન હુમલો છે. ગયા મહિને અલાસ્કામાં ટ્રમ્પની પુતિન સાથેની મુલાકાત પછી રશિયા સતત યુક્રેનને નિશાન બનાવી રહ્યું છે.
ટ્રમ્પના આ નિવેદનના અન્ય અર્થ પણ કાઢવામાં આવી રહ્યા છે, થોડા કલાકો પહેલા જ, યુએસ નાણામંત્રી સ્કોટ બેસન્ટે રશિયન તેલ ખરીદતા દેશો પર વધુ પ્રતિબંધો લાદવાની હાકલ કરી હતી. રશિયન તેલ ખરીદવાની બાબતમાં ભારત બીજા ક્રમે છે, અને અમેરિકા ચીન પર પ્રતિબંધો લાદવાના મૂડમાં નથી. તેથી, બેસન્ટનો આ કોલ ભારત સાથે સંબંધિત હોય તેવું લાગે છે. પોતાના કોલ પાછળનું કારણ આપતા, બેસન્ટે કહ્યું હતું કે જો આવું થાય છે, તો તેની રશિયાના અર્થતંત્ર પર ખૂબ જ ખરાબ અસર પડશે, જેનાથી તે યુક્રેન સાથે વાટાઘાટો કરવા મજબૂર થશે.
ટ્રમ્પ યુક્રેન અને રશિયાના મુદ્દા પર સતત પ્રયાસ કરતા જોવા મળે છે. આ મુદ્દા અને તેમના કથિત વ્યક્તિગત દુશ્મનાવટને કારણે, તેમણે ભારત સાથેના તેમના સંબંધો પણ બગાડ્યા છે. ભારત પર દબાણ લાવવાનો પ્રયાસ કરી રહેલા ટ્રમ્પ હવે આ મોરચે પણ નિષ્ફળ જતા દેખાય છે. તેમના યુરોપિયન સાથીઓ પણ તેમને ટોણા મારી રહ્યા છે. તાજેતરમાં, ફ્રાન્સના રાષ્ટ્રપતિ મેક્રોને આ મુદ્દા પર કહ્યું હતું કે જો પુતિન યુક્રેન પર હુમલા ઓછા નહીં કરે અથવા વાતચીત માટે તૈયાર નહીં થાય, તો તે ચોક્કસ છે કે તેમણે ફરી એકવાર ટ્રમ્પને બદનામ કર્યા છે.
