દિવાળીના તહેવારો પહેલાં CM ભૂપેન્દ્ર પટેલે ગુજરાતના લાખો સરકારી કર્મચારીઓ અને પેન્શનર્સ માટે મોંઘવારી ભથ્થામાં વધારાની જાહેરાત કરી છે. જાણો કોને અને કેટલો ફાયદો થશે અને એરિયર્સની રકમ ક્યારે મળશે.
ગાંધીનગર, મંગળવાર
દિવાળીના તહેવારો નજીક આવી રહ્યા છે ત્યારે ગુજરાતના લાખો સરકારી કર્મચારીઓ અને પેન્શનર્સ માટે ખુશીના સમાચાર આવ્યા છે. મુખ્યમંત્રી ભૂપેન્દ્ર પટેલની સરકારે કર્મચારીઓના હિતમાં એક મોટો નિર્ણય લેતા મોંઘવારી ભથ્થા (DA) માં વધારો કરવાની જાહેરાત કરી છે. આ નિર્ણયથી રાજ્યના લગભગ 9.5 લાખથી વધુ કર્મચારીઓ અને પેન્શનર્સને સીધો આર્થિક ફાયદો થશે.
કોને કેટલો મળશે લાભ?
સરકારના આ નિર્ણય મુજબ, કેન્દ્ર સરકારના ધોરણે રાજ્યના કર્મચારીઓને પણ મોંઘવારી ભથ્થાનો લાભ આપવામાં આવશે. 7મા પગાર પંચ મુજબ પગાર મેળવતા કર્મચારીઓ અને પેન્શનર્સના મોંઘવારી ભથ્થામાં 3%નો વધારો કરવામાં આવ્યો છે. 6ઠ્ઠા પગાર પંચ હેઠળ આવતા કર્મચારીઓ અને પેન્શનર્સને મોંઘવારી ભથ્થામાં 5%નો વધારો મળશે. આ વધારો 1 જુલાઈ, 2025થી લાગુ ગણવામાં આવશે, જેનો અર્થ છે કે કર્મચારીઓને એરિયર્સ પણ મળશે. 3 મહિનાનું એરિયર્સ એકસાથે ખાતામાં જમા થશે
સરકારની જાહેરાત મુજબ, 1 જુલાઈ, 2025થી 30 સપ્ટેમ્બર, 2025 સુધીના ત્રણ મહિનાના મોંઘવારી ભથ્થાના તફાવતની રકમ કર્મચારીઓ અને પેન્શનર્સને એક જ હપ્તામાં ચૂકવી દેવામાં આવશે. આનાથી તહેવારો દરમિયાન લોકોના હાથમાં રોકડ રકમ આવશે, જે ખરીદીમાં મદદરૂપ થશે.
સરકારી તિજોરી પર કેટલો બોજ પડશે?
આ નિર્ણયથી રાજ્ય સરકારના કુલ 4.69 લાખ કર્મચારીઓ અને 4.82 લાખ પેન્શનર્સને ફાયદો થશે. સરકાર એરિયર્સ પેટે કુલ 483.24 કરોડની ચુકવણી કરશે. આ વધારાને કારણે સરકાર પર વાર્ષિક 1932.92 કરોડનો નાણાકીય બોજ પડશે. મુખ્યમંત્રી ભૂપેન્દ્ર પટેલે આ નિર્ણયના તાત્કાલિક અમલ માટે નાણાં વિભાગને જરૂરી આદેશો જાહેર કરવા માટે સૂચના આપી દીધી છે, જેથી કર્મચારીઓને સમયસર લાભ મળી શકે.
