દિવાળી પછી વધેલા પ્રદૂષણ અને ખરાબ AQI થી ફેફસાંને બચાવવા માટે આ દેશી ઉકાળો પીવો. ન્યુટ્રિશનીસ્ટ લીમા મહાજન દ્વારા સૂચવેલ આ રેસીપી તમારી ઇમ્યુનિટી પણ બૂસ્ટ કરશે.
અમદાવાદ, ગુરૂવાર
દિવાળીના તહેવારો પુરા થઈ ગયા છે, પરંતુ તેની અસર હજુ પણ હવામાં સ્પષ્ટ દેખાઈ રહી છે. દર વર્ષની જેમ, ફટાકડા, ટ્રાફિક અને હવે શિયાળાની શરૂઆતના ધુમ્મસને કારણે હવાની ગુણવત્તા (AQI) ખૂબ જ ખરાબ સ્તરે પહોંચી ગઈ છે. આ ઝેરી હવામાં શ્વાસ લેવાથી આપણા ફેફસાં અને રોગપ્રતિકારક શક્તિ પર સીધી નકારાત્મક અસર પડે છે.
આ પ્રદૂષિત હવાથી સંપૂર્ણપણે બચવું લગભગ અશક્ય છે, પરંતુ આપણે આપણા શરીરને અંદરથી મજબૂત ચોક્કસ બનાવી શકીએ છીએ. આ ઝેરી હવા સામે લડવા માટે એક સરળ દેશી ઉપાય છે, જે તમારા ફેફસાં માટે ‘રક્ષા કવચ’ બની શકે છે. જાણીતા ન્યુટ્રિશનિસ્ટને પોતાના ઇન્સ્ટાગ્રામ હેન્ડલ પર આ પાવરફૂલ ઉકાળાની રેસીપી શેર કરી છે. તેમનું કહેવું છે કે દિવાળી પછીથી ફેબ્રુઆરી સુધી, જ્યારે હવા સૌથી વધુ પ્રદૂષિત અને ભારે હોય છે, ત્યારે આ ઉકાળો દરરોજ પીવાથી શરીરને ડિટોક્સ કરવામાં અને ઇમ્યુનિટી વધારવામાં અકલ્પનીય મદદ મળે છે.
પ્રદૂષણ ફેફસાંને કેવી રીતે નુકસાન કરે છે?
જ્યારે AQI લેવલ ખરાબ હોય છે, ત્યારે હવામાં PM 2.5 જેવા ઝીણા ઝેરી કણો હોય છે. આ કણો શ્વાસ દ્વારા ફેફસાંમાં ઊંડે સુધી જાય છે અને ત્યાં સોજો પેદા કરી શકે છે. જે લોકોને અસ્થમા કે શ્વાસની અન્ય તકલીફો હોય, તેમના માટે આ હવા ખૂબ જોખમી સાબિત થઈ શકે છે.
ફેફસાં માટે રક્ષણાત્મક ઉકાળો
ન્યુટ્રિશનિસ્ટ લીમા મહાજન સૂચવે છે કે આ ઉકાળો શુદ્ધ હવાનો વિકલ્પ નથી, પરંતુ તે ચોક્કસપણે તમારા ફેફસાંને પ્રદૂષણ સામે લડવાની તાકાત આપે છે. સારી વાત એ છે કે તેને બનાવવા માટેની તમામ સામગ્રી તમારા રસોડામાં સરળતાથી મળી રહે છે.
ઉકાળો બનાવવા માટે જરૂરી સામગ્રી:
1 ગ્લાસ પાણી
તુલસીના 7-8 પાન
1/2 ચમચી હળદર
4-5 કાળા મરી (આખા)
2-3 લવિંગ
નાનો ટુકડો ગોળ (સ્વાદ મુજબ, તે ફેફસાંને સાફ પણ કરે છે)
લીંબુનો રસ (છેલ્લે ઉમેરવા માટે)
બનાવવાની સરળ રીત:-
એક તપેલીમાં 1 ગ્લાસ પાણી લો.
તેમાં લીંબુના રસ સિવાયની અન્ય તમામ સામગ્રી (તુલસી, હળદર, કાળા મરી, લવિંગ અને ગોળ) ઉમેરો.
આ પાણીને 5 થી 7 મિનિટ સુધી ધીમા તાપે બરાબર ઉકાળો, જેથી બધી જડીબુટ્ટીઓનો અર્ક પાણીમાં ભળી જાય.
તૈયાર થયેલા ઉકાળાને એક કપમાં ગાળી લો.
છેલ્લે, તેમાં સ્વાદ મુજબ લીંબુનો રસ નીચોવીને ગરમાગરમ પીવો.
આ ઉકાળો કેમ છે આટલો અસરકારક?
આ ઉકાળામાં વપરાયેલી દરેક સામગ્રીનો પોતાનો ખાસ ગુણ છે:
તુલસી: આ એક કુદરતી ડિટોક્સિફાયર છે. તે કફને સાફ કરે છે અને શ્વાસ લેવામાં મદદ કરે છે.
હળદર: તેમાં રહેલું કરક્યુમિન શરીરમાં સોજા સામે લડે છે અને ઝેરી તત્વોને બહાર કાઢે છે.
કાળા મરી: તે હળદરના શોષણને વધારે છે, જેથી શરીરને તેનો પૂરો લાભ મળે.
લવિંગ: ગળાની ખરાશ અને બળતરાને શાંત કરે છે.
ગોળ: તે માત્ર મીઠાશ નથી આપતો, પરંતુ ફેફસાં માટે હળવા ક્લીન્ઝર (સફાઈકારક) તરીકે પણ કામ કરે છે, જે ઝીણી ધૂળ અને પ્રદૂષકોને દૂર કરવામાં મદદ કરી શકે છે.
લીંબુ: વિટામિન C થી ભરપૂર હોવાથી તે ઇમ્યુનિટીને મજબૂત બનાવે છે અને શરીરમાં ઓક્સિજનનો પ્રવાહ સુધારે છે.
ક્યારે પીવો આ ઉકાળો?
ન્યુટ્રિશનિસ્ટના મતે, આ ઉકાળો દિવસમાં એકવાર, ખાસ કરીને સવારે અથવા સાંજે પીવો જોઈએ. તે બાળકો અને પુખ્ત વયના લોકો, બધા માટે સલામત છે. તેના નિયમિત સેવનથી તમને ખાંસીમાં રાહત અને છાતીમાં થતી જકડનમાં હળવાશનો અનુભવ થઈ શકે છે.
ડિસ્ક્લેમર: આ લેખ ફક્ત સામાન્ય જાણકારી માટે છે. આ કોઈપણ પ્રકારે દવા કે તબીબી સારવારનો વિકલ્પ નથી. જો તમને શ્વાસ સંબંધિત કોઈ ગંભીર બીમારી હોય, તો કોઈપણ ઘરેલું ઉપાય અજમાવતા પહેલા તમારા ડૉક્ટરની સલાહ અચૂક લેવી.
