નેશનલ હાઇવે પર એક જ જગ્યાએ વારંવાર અકસ્માત થાય તો કોન્ટ્રાક્ટરને 25 લાખથી 50 લાખ સુધી દંડ. કેન્દ્ર સરકારનો નવો નિયમ અને અકસ્માત પીડિતો માટે 1.5 લાખ સુધીની મફત સારવારની યોજના.
નવી દિલ્હી, મંગળવાર
દેશમાં નેશનલ હાઇવે પર થતા અકસ્માતોને રોકવા કેન્દ્ર સરકારે સખત પગલું લીધું છે. હવે જો કોઈ એક જ જગ્યાએ એકથી વધુ વખત અકસ્માત થશે, તો રસ્તો બનાવનાર કોન્ટ્રાક્ટરને મોટો દંડ ભરવો પડશે. આ નિયમ મુખ્યત્વે BOT મોડલ પર બનેલા હાઇવે માટે લાગુ પડશે.
માર્ગ પરિવહન અને હાઇવે મંત્રાલયના સચિવ વી. ઉમાશંકરે જણાવ્યું કે, “જો કોઈ સ્થળે (અગાઉ અકસ્માત થયેલા સ્થળથી 500 મીટરની અંદર) ફરીથી અકસ્માત થાય, તો તે કોન્ટ્રાક્ટરની ભૂલ ગણાશે.” પહેલી વખત એવું થાય તો 25 લાખ રૂપિયા દંડ, અને ત્યારબાદ ફરી થાય તો 50 લાખ રૂપિયા સુધીનો દંડ થઈ શકે છે.
આ નિયમ BOT (બિલ્ડ-ઓપરેટ-ટ્રાન્સફર) મોડલ પર બનેલા હાઇવે માટે છે. આ મોડલમાં ખાનગી કંપની રસ્તો બનાવે છે, તેની જાળવણી કરે છે અને 15થી 20 વર્ષ સુધી તેની જવાબદારી રાખે છે. જો આ સમયગાળામાં એક જ જગ્યાએ વારંવાર અકસ્માત થાય, તો કંપની સામે કાર્યવાહી થશે.
સરકારનો હેતુ રસ્તાની ગુણવત્તા અને જાળવણી સુધારવાનો છે, જેથી અકસ્માત ઓછા થાય. આ સાથે અકસ્માત પીડિતો માટે મોટી રાહતના સમાચાર પણ છે. ટૂંક સમયમાં કેશલેસ સારવાર યોજના શરૂ થશે, જેમાં ઈજાગ્રસ્ત વ્યક્તિને 1.5 લાખ રૂપિયા સુધીની સારવાર મફત મળશે. આનાથી મૃત્યુદર ઘટવાની આશા છે.
આ પગલાંથી નેશનલ હાઇવે વધુ સુરક્ષિત બનશે અને કોન્ટ્રાક્ટરો પણ પોતાની જવાબદારી ગંભીરતાથી નિભાવશે.
