કલોલના ઉસ્તાદપુરામાં બકરી અને કોગળા કરવા જેવી સામાન્ય બાબતે બે પરિવારો વચ્ચે લોહિયાળ જંગ ખેલાયો. દાતરડા અને ધોકાથી હુમલો થતાં સામસામી પોલીસ ફરિયાદ નોંધાઈ. જાણો સમગ્ર મામલો.
કલોલ, સોમવાર
ઘણીવાર નાની-નાની વાતોમાં માણસનો ગુસ્સો એટલો વધી જતો હોય છે કે વાત લોહી રેડવા સુધી પહોંચી જાય છે. આવો જ એક કિસ્સો કલોલ શહેરમાંથી સામે આવ્યો છે. અહીંના ઉસ્તાદપુરા વિસ્તારમાં શનિવારે બકરી પાડોશીના ઘરે જવા અને થૂંકવા જેવી સાવ સામાન્ય બાબતે બે પાડોશીઓ વચ્ચે ધીંગાણું ખેલાયું હતું. વાત એટલી વણસી ગઈ કે બંને પક્ષે તલવાર, દાતરડા અને ધોકા જેવા હથિયારો ઉછળ્યા હતા. આ હિંસક અથડામણમાં એક વ્યક્તિને માથામાં ટાંકા આવ્યા છે અને બે લોકોને ફ્રેક્ચર થયું છે.
બકરી પાડોશીના ઘરે જતાં મામલો બિચક્યો
ઘટનાની વિગત એવી છે કે, કલોલના ઉસ્તાદપુરામાં રહેતા અને રિક્ષા ચલાવતા અનવરખાન પઠાણે પોલીસ ફરિયાદ નોંધાવી છે. તેમના કહેવા મુજબ, શનિવારે સવારે તેઓ પોતાની પત્ની સાથે ઘરના આંગણામાં તાપણી કરી રહ્યા હતા. તે સમયે તેમની બકરી ફરતી ફરતી સામે રહેતા પાડોશી સમીમબાનુ લુહારના ઘર પાસે પહોંચી ગઈ હતી.
બકરી ત્યાં જતાં જ સમીમબાનુએ ગાળાગાળી શરૂ કરી દીધી હતી. જોતજોતામાં મામલો ઉગ્ર બન્યો અને સમીમબાનુનો દીકરો સરફરાજ ધોકો લઈને, સમીર દાતરડું લઈને અને હસન તીર કામઠું લઈને હુમલો કરવા દોડી આવ્યા હતા. આ હુમલામાં અનવરખાનને જમણા હાથે ધોકો વાગતા હાડકું તૂટી ગયું હતું (ફ્રેક્ચર), જ્યારે હસને છોડેલું તીર સદનસીબે ઘરની દીવાલ સાથે અથડાયું હતું. ઝઘડામાં વચ્ચે પડેલા અનવરખાનના પત્નીને પણ માર મારવામાં આવ્યો હતો.
સામા પક્ષે કોગળા કરવા બાબતે હુમલો થયાનો આરોપ
બીજી તરફ, સામા પક્ષે પણ સરફરાજ લુહારે વળતી ફરિયાદ નોંધાવી છે. તેમના આરોપ મુજબ, તેમની દિવ્યાંગ બહેન સલમાબેન ઘરની બહાર કોગળા કરી રહ્યા હતા. તે સમયે સામે રહેતા સાહિલે “તું મને જોઈને કેમ કોગળા કરે છે?” તેમ કહીને તકરાર શરૂ કરી હતી.
વાત મારામારી પર આવી જતાં સાહિલે ઘરમાંથી દાતરડું લાવી સરફરાજના કપાળ પર ઝીંકી દીધું હતું, જેના કારણે તેમને ગંભીર ઈજા થઈ હતી. ત્યારબાદ સાહિલના પક્ષે યાકુબભાઈ, મોઈન અને અનવરખાને ભેગા મળીને લાકડાના ધોકાથી હુમલો કર્યો હતો. આ દરમિયાન સરફરાજની બહેન હુસેનાબાનુને પગના નળાના ભાગે જોરથી ધોકો વાગતા તેમને ગંભીર ફ્રેક્ચર થયું હતું.
પોલીસે તપાસ હાથ ધરી
આ લોહિયાળ જંગ બાદ ઘાયલોને તાત્કાલિક સારવાર માટે કલોલની શ્રદ્ધા હોસ્પિટલ અને ત્યારબાદ વધુ સારવાર અર્થે ગાંધીનગર સિવિલ હોસ્પિટલ ખસેડવામાં આવ્યા હતા. મેડિકલ રિપોર્ટમાં અનવરખાન અને હુસેનાબાનુને ફ્રેક્ચર હોવાનું સામે આવ્યું છે. હાલમાં કલોલ શહેર પોલીસે બંને પક્ષોની ફરિયાદ નોંધીને કાયદેસરની કાર્યવાહી હાથ ધરી છે.
