ઇંગ્લેન્ડના પૂર્વ કેપ્ટન માઈકલ આથર્ટને ભારત અને પાકિસ્તાન વચ્ચેની ICC ટૂર્નામેન્ટ મેચોને નાણાકીય જરૂરિયાત ગણાવી છે અને ક્રિકેટ સંબંધો તોડી નાખવાની માંગ કરી છે. જાણો શું છે આખો વિવાદ.
અમદાવાદ, બુધવાર
ઇંગ્લેન્ડના પૂર્વ કેપ્ટન અને દિગ્ગજ ક્રિકેટર માઈકલ આથર્ટને ભારત અને પાકિસ્તાન વચ્ચેની ક્રિકેટ મેચોને લઈને અત્યંત ગંભીર સવાલો ઉઠાવ્યા છે. તેમનું સ્પષ્ટ માનવું છે કે, આ બંને દેશો વચ્ચેની મેચો ICC ટૂર્નામેન્ટમાંથી બિલકુલ હટાવી દેવી જોઈએ.
આથર્ટનનો દાવો છે કે, ICC ટૂર્નામેન્ટમાં ભારત અને પાકિસ્તાનની મેચો કરાવવા પાછળનો મુખ્ય હેતુ નાણાકીય જરૂરિયાતો પૂરી કરવાનો છે. આ મુકાબલાઓ માત્ર પૈસા કમાવવાનું એક સાધન બની ગયા છે. તેમણે એક જાણીતા અખબારમાં લખ્યું કે, બંને દેશો વચ્ચે ક્રિકેટ સંબંધો સંપૂર્ણપણે બંધ કરી દેવા જોઈએ, કારણ કે ક્રિકેટ હવે વ્યાપક તણાવ અને ખોટી માહિતી ફેલાવવાનું એક એજન્ટ બની ગયું છે.
લગભગ દરેક ICC ઈવેન્ટમાં મેચ ફિક્સ
આથર્ટને આ અંગે ચોંકાવનારો આંકડો આપ્યો છે. તેમના કહેવા મુજબ, વર્ષ 2013 પછીથી ભારત અને પાકિસ્તાન લગભગ દરેક ICC ઇવેન્ટના ગ્રુપ સ્ટેજમાં એકબીજા સામે રમ્યા છે. જેમાં ત્રણ 50-ઓવર વર્લ્ડ કપ, પાંચ T20 વર્લ્ડ કપ, અને ત્રણ ચેમ્પિયન્સ ટ્રોફીનો સમાવેશ થાય છે. ભલે ટૂર્નામેન્ટનો ફોર્મેટ ગમે તે હોય, આ મેચો ખાસ કરીને સુનિશ્ચિત કરવામાં આવી છે.
તાજેતરના વિવાદોએ વધાર્યું ટેન્શન
તાજેતરમાં એશિયા કપમાં બનેલી ઘટનાઓનો પણ આથર્ટને ઉલ્લેખ કર્યો. તેમણે કહ્યું કે, એશિયા કપ દરમિયાન ભારતીય ટીમે પાકિસ્તાની ખેલાડીઓ સાથે હાથ મિલાવવાનો ઇનકાર કર્યો હતો. આ સિવાય, જ્યારે ભારતીય ટીમે પાકિસ્તાનથી આવેલા એશિયન ક્રિકેટ કાઉન્સિલના ચેરમેન મોહસીન નકવી પાસેથી વિજેતા ટ્રોફી લેવાનો પણ ઇનકાર કર્યો ત્યારે માહોલ વધુ ગરમાયો હતો.
આથર્ટને પહલગામ આતંકવાદી હુમલા પછી બંને દેશો વચ્ચે વધેલા તણાવનો પણ ઉલ્લેખ કર્યો છે, જ્યાં પાકિસ્તાન સમર્થિત આતંકવાદીઓએ 26 ભારતીયોની હત્યા કરી હતી.
આ મેચનું આર્થિક મહત્ત્વ કેટલું મોટું?
આથર્ટને સ્પષ્ટ કર્યું કે આ મેચનું આર્થિક મહત્ત્વ ઘણું મોટું છે. ICC ટૂર્નામેન્ટના પ્રસારણ અધિકારો લગભગ $3 બિલિયન USDના છે. દ્વિપક્ષીય મેચોનું મહત્ત્વ ઘટતું જવાથી ICC ઇવેન્ટ્સનું મહત્ત્વ ખૂબ વધી ગયું છે, અને આથી જ આ રાઇવલરીને જીવંત રાખવામાં આવે છે.
તેમણે સવાલ ઉઠાવ્યો કે, એશિયા કપ જેવી ટૂંકી ટૂર્નામેન્ટમાં પણ બંને ટીમોને ત્રણ અઠવાડિયાની અંદર બેથી ત્રણ વખત મુકાબલો કરાવવામાં આવે છે. આથર્ટનનું માનવું છે કે, હવે સમય આવી ગયો છે કે, ICC ઇવેન્ટ્સમાં આ બંને હરીફોને વારંવાર એકબીજા સામે મુકવાની આ અધિકારોવાળી વ્યવસ્થાને હંમેશ માટે બંધ કરી દેવામાં આવે.
